ព័ត៌មានអន្ដរជាតិ

លោក ត្រាំថា ណាតូទទួលបានលុយរាប់រយពាន់លានដោយសារតែលោក

បានផុស

៤ សប្តាហ៍ មុន

នៅ

ថ្ងៃសុក្រ ១៤ មីនា ២០២៥

ដោយ

ការិយាល័យវិមានប្រធានាធិបតីសហរដ្ឋអាមេរិក ដែលគេស្គាល់ថា «White House» បានដាក់បង្ហាញរូបថតប៉ុន្មានសន្លឹកក្នុងជំនួបរវាងប្រធានាធិបតី ដូណាល់ ត្រាំ និងអគ្គលេខាធិការរបស់អង្គការ NATO ដោយភ្ជាប់ជាមួយសំណេរសម្រង់សម្តីដើមរបស់ប្រធានាធិបតី ដូណាល់ ត្រាំ ដែលបង្ហាញពីមោទនភាពក្នុងការទាក់ទាញធនធានរាប់រយពាន់លានចូលទៅក្នុងអង្គការណាតូត្រឹមតែមួយរំពេក។

លោក ដូណាល់ ត្រាំ ជួបជាមួយអគ្គលេខាធិការអង្គការណាតូ លោក Mark Rutte។ White House

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបនៅសេតវិមាន ជាទីដែលលោក ដូណាល់ ត្រាំ ប្រធានាធិបតីសហរដ្ឋអាមេរិកទទួលស្វាគមន៍ អគ្គលេខាធិការអង្គការណាតូ លោក Mark Rutte កាលថ្ងៃទី១៣ខែមីនា ការិយាល័យសេតវិមាន បានបង្ហាញរូបភាពសើចក្អាកក្អាយក្នុងចំណោមអ្នកចូលរួមជាពិសេសគឺលោក ដូណាល់ ត្រាំ និង លោក Mark Rutte។

ភ្ជាប់ជាមួយរូបថតនោះ សេតវិមាន បានស្រង់សម្តីលោក ដូណាល់ ត្រាំ ដែលនិយាយក្នុងខ្លឹមសារដើមថា៖«នៅពេលខ្ញុំទៅអង្គការណាតូដំបូង… ខ្ញុំសង្កេតឃើញថាមានមនុស្ស [ប្រទេស] តិចតួចណាស់ដែលបានបង់ប្រាក់ ហើយប្រសិនបើ ជាពួកគេ ពួកគេមិនបានបង់ចំណែកយុត្តិធម៌របស់ពួកគេទេ… ខ្ញុំអាចកៀរគបានប្រាក់រាប់រយពាន់លានដុល្លារ … លុយបានចាប់ផ្តើមហូរចូលមក ហើយណាតូកាន់តែរឹងមាំដោយសារតែសកម្មភាពរបស់ខ្ញុំ»។

ចាប់តាំងពីចូលកាន់តំណែងជាប្រធាធិបតីសហរដ្ឋអាមេរិកជាលើកទី២ លោក ដូណាល់ ត្រាំ បានបង្ខំឲ្យសមាជិកអង្គការណាតូនៅតំបន់អឺរ៉ុបបង្កើនការបង់ប្រាក់ បង្កើនប្រាក់ក្នុងវិស័យការពារជាតិ ព្រមទាំងគម្រាមដកអាមេរិកចេញពីអង្គការណាតូ ដែលមិនធ្វើតាមសំណើររបស់លោកផង។

ក្រោយពីការគម្រាមរបស់លោក ដូណាល់ ត្រាំ ប្រទេសសមាជិកអង្គការណាតូនៅតំបន់បាល់កង់ មានអេស្តនី និង រូម៉ានី ឡេតូនី ប៊ុលឡាវី ជាដើម បានបង្ហាញឆន្ទៈបង្កើនការចំណាយក្នុងវិស័យការពារជាតិស្របតាមសំណើររបស់ប្រធានាធិបតីសហរដ្ឋអាមេរិក។ ក្រៅពីនេះ ចក្រភពអង់គ្លេសដែលជាមហាអំណាចផងដែរនោះ ក៏បានបង្កើនការចំណាយលើវិស័យការពារជាតិយ៉ាងសន្ធឹកសន្ធាប់ដែរ៕

ដោយ រ៉ាន់ រើយ