ស្ងាត់ៗ! លោក ស៊ី ជីនពីង និង គីម ជុងអ៊ុន ឆ្លើយឆ្លងសារនិយាយពីបញ្ហាមួយចំនួន

ប្រធានាធិបតីចិនលោក ស៊ី ជីនពីង និងមេដឹកនាំកូរ៉េខាងជើង គីម ជុងអ៊ុន បានឆ្លើយឆ្លងសារជាមួយគ្នាដើម្បីបញ្ជាក់ពីចេតនារបស់ពួកគេក្នុងការពង្រឹងទំនាក់ទំនង ។

ទីភ្នាក់ងារសារព័ត៌មានចិនស៊ីនហួបាននិយាយថា សារទាំងនេះត្រូវបានបញ្ជូនដោយមន្រ្តីនៃភាគីទាំងពីរនៅពេលពួកគេបានជួបគ្នានៅទីក្រុងប៉េកាំងកាលពីថ្ងៃចន្ទ ។

មន្ត្រីទាំងនោះគឺលោក Song Tao ប្រធាននាយកដ្ឋានអន្តរជាតិនៃគណៈកម្មាធិការមជ្ឈិមបក្សកុម្មុយនិស្តចិន និងឯកអគ្គរដ្ឋទូតកូរ៉េខាងជើងថ្មីប្រចាំនៅប្រទេសចិនគឺលោក Ri Ryong Nam ។

ទីភ្នាក់ងារសារព័ត៌មានចិនស៊ីនហួបានដកស្រង់សម្តីលោក ស៊ី ដែលបាននិយាយនៅក្នុងសារនោះថា មិត្តភាពជាប្រពៃណីរវាងចិន និងកូរ៉េខាងជើងគឺជា “កំណប់ទ្រព្យដ៏មានតម្លៃ” ដែលបានចែករំលែកដោយអ្នកទាំងពីរ ។

លោកបាននិយាយថា ប្រទេសចិនបានត្រៀមខ្លួនរួចជាស្រេចដើម្បីធ្វើការជាមួយប្រទេសកូរ៉េខាងជើង “ក្រោមស្ថានភាពថ្មី” ។

ទន្ទឹមនោះ ស៊ីនហួ ក៏បានដកស្រង់សម្តីរបស់លោក គីម ផងដែរដែលបានសន្យាពង្រឹង និងអភិវឌ្ឍទំនាក់ទំនងរបស់ពួកគេឲ្យទៅជាការច្រណែនរបស់ពិភពលោក ។

សាររបស់មេដឹកនាំទាំងពីរមិនបានសំដៅទៅលើសហរដ្ឋអាមេរិកដោយផ្ទាល់នោះទេ ប៉ុន្តែត្រូវបានគេមើលឃើញថាជាការខិតខំដើម្បីរក្សាចេតនាណាមួយដោយសង្កត់ធ្ងន់លើចំណងមិត្តភាពរវាងប្រទេសរបស់ពួកគេ ។

ស្របពេលជាមួយគ្នានេះរដ្ឋបាលរបស់ប្រធានាធិបតីអាមេរិក Joe Biden បានរិះគន់ចិនយ៉ាងខ្លាំងជុំវិញបញ្ហាសិទ្ធិមនុស្ស និងសន្តិសុខ ។ ទីក្រុងវ៉ាស៊ីនតោនបានសង្កត់ធ្ងន់លើកិច្ចសហប្រតិបត្តិការត្រីភាគីជាមួយជប៉ុន និងកូរ៉េខាងត្បូងក្នុងការដោះស្រាយជាមួយកូរ៉េខាងជើង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើងកំពុងទាញយកសារធាតុគីមីភ្លុយតូនីញ៉ូម ផលិតអាវុធនុយក្លេអ៊ែរបន្ថែម

ចុចអាន ៖ អាមេរិកចោទប្រកាន់ជនជាតិកូរ៉េខាងជើង៣នាក់ពីបទ​ Hack និងលួចលុយតាមអ៊ីនធើណិតយកទៅឲ្យលោក គីម ជុងអ៊ុន