ព័ត៌មានអន្ដរជាតិ

ស្លាប់១៥នាក់នៅហ្គាហ្សាព្រោះការវាយប្រហាររបស់អ៊ីស្រាអែល ត្បិតមានបទឈប់បាញ់

បានផុស

៣០ វិនាទី មុន

នៅ

ថ្ងៃចន្ទ ១៧ មីនា ២០២៥

ដោយ

Chheang

យោងតាមក្រសួងសុខាភិបាលរបស់តំបន់ហ្គាហ្សាកាលពីថ្ងៃអាទិត្យទី១៦ខែមីនាឆ្នាំ២០២៥ នៅក្នុងរយៈពេល២៤ម៉ោងកន្លងមក ការវាយប្រហារតាមអាកាសរបស់អ៊ីស្រាអែលបានបណ្តាលឲ្យជនជាតិប៉ាឡេស្ទីនយ៉ាងហោចណាស់ ១៥នាក់បានស្លាប់។

ក្រុមគ្រួសារជនរងគ្រោះនៅក្នុងការវាយប្រហារបស់អ៊ីស្រាអែលថ្ងៃទី១៥ខែមីនាឆ្នាំ២០២៥ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅទីក្រុង Beit Lahiya កាលពីថ្ងៃសៅរ៍ មនុស្ស៩នាក់ត្រូវបានសម្លាប់ ដោយក្នុងនោះមានអ្នកកាសែតចំនួន៤នាក់។ យោធាអ៊ីស្រាអែល បានបញ្ជាក់ថា ការវាយប្រហារនោះបានកំណត់គោលដៅលើ «ភេរវករ» ហើយចោទប្រកាន់ថាមានជនសកម្មប្រយុទ្ធមួយចំនួនកំពុងបន្លំខ្លួនធ្វើជាអ្នកកាសែត។ ទោះជាយ៉ាងណាក៏ដោយ លោក Salama Marouf ប្រធានការិយាល័យប្រព័ន្ធផ្សព្វផ្សាយតំបន់ហ្គាហ្សារបស់ហាម៉ាស បានបដិសេធការអះអាងទាំងនេះ ដោយបញ្ជាក់ថា ជនរងគ្រោះគឺជាជនស៊ីវិលដែលបានចូលរួមក្នុងការងារសប្បុរសធម៌។

ក្រសួងសុខាភិបាលហ្គាហ្សា បានឲ្យដឹងទៀតថា នៅថ្ងៃសៅរ៍ដដែល ការវាយប្រហារដាច់ដោយឡែកមួយផ្សេងទៀតរបស់អ៊ីស្រាអែល បានឆក់យកជីវិតជនជាតិប៉ាឡេស្ទីនហោចណាស់៤នាក់។

លុះដល់ថ្ងៃអាទិត្យ បុរសអាយុ៦២ឆ្នាំម្នាក់ត្រូវបានសម្លាប់ដោយយន្តហោះគ្មានមនុស្សបើករបស់អ៊ីស្រាអែលនៅទីក្រុង Juhr Eldeek ខណៈមនុស្សម្នាក់ទៀតត្រូវបានសម្លាប់នៅទីក្រុង Zeitoun។ ការវាយប្រហារចុងក្រោយនេះ ត្រូវអ៊ីស្រាអែលបកស្រាយថាជាការកម្ចាត់«ភេរវករ» ដែលប៉ុនប៉ងបង្កប់គ្រាប់បែកនៅក្រោមដី។

សូមបញ្ជាក់ថា ឧប្បត្តិហេតុទាំងនេះកើតឡើងចំពេលដែលការចរចាបទឈប់បាញ់កំពុងបន្តសម្របសម្រួលដោយកាតា អេហ្ស៊ីប និងសហរដ្ឋអាមេរិក។ ទោះបីជាមានបទឈប់បាញ់ថ្ងៃទី១៩ខែមករាក៏ដោយ ក៏អរិភាពនៅតែបន្តធ្វើឲ្យដំណើរការសន្តិភាពមានភាពស្មុគស្មាញ។ អ៊ីស្រាអែលរក្សាថា សកម្មភាពរបស់ខ្លួនគឺជាការឆ្លើយតបការពារចំពោះការគំរាមកំហែងរបស់ភេរវករ ខណៈមន្ត្រីសុខាភិបាលប៉ាឡេស្ទីនរាយការណ៍ថាចំនួនអ្នកស្លាប់និងរបួសបន្តកើនឡើង៕

ដោយ៖ ឈាង