អេស្ប៉ាញ​ជួប​​គ្រោះ​ទឹកជំនន់ភ្លាមៗ​ប៉ះពាល់​ផ្ទះរាប់​រយ​ខ្នង និង​​ជម្លៀសប្រជាជនចេញ​ដោយ​បង្ខំ​

ប្រទេសអេស្ប៉ាញជួបគ្រោះទឹកជំនន់ម្ដងទៀត ដោយទឹកជំនន់ភ្លាមៗលើកនេះវាយប្រហារលិចផ្ទះរាប់សិបខ្នងនិងបានធ្វើឲ្យគូស្វាមីភរិយាមួយគូបាត់ខ្លួន បន្ទាប់ពីទឹកជំនន់បោកបក់យករថយន្តរបស់ពួកគ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៩ខែមីនានេះ។

ទឹកជំនន់ភ្លាមៗបានកំពុងវាយប្រហារប្រទេសអេស៉្បាញ ជាពិសេសក្នុងតំបន់Andalusia។ ប្រធានតំបន់ Andalusia លោក Juanma Moreno Bonilla បានឲ្យដឹងថា រថយន្តរបស់ប្តីប្រពន្ធមួយគូ ត្រូវបានទឹកនាំទៅបាត់ នៅពេលដែលពួកគេកំពុងបើកបរក្នុងពេលទឹកជំនន់វាយប្រហារ។ ដោយសារតែទឹកជំនន់នេះអាជ្ញាធរ​បាន​បិទ​ផ្លូវ និង​បិទសាលា និង ​ជំរុញ​ឱ្យ​ប្រជាជន​គោរព​តាម​ការព្រមាន​អំពី​សុវត្ថិភាព ដោយមានផ្លូវហាយវេសរុបចំនួន៤០នៅទូទាំងតំបន់ Andalusia ក៏ដូចជាផ្លូវរថភ្លើងមួយចំនួនត្រូវបិទ។

ជាមួយគ្នានេះមន្ត្រីក្នុងតំបន់បានបញ្ជាឱ្យជម្លៀសប្រជាជនចេញពីផ្ទះចំនួន៣៦៥ខ្នងនៅក្នុងភូមិ Campanillas ក្បែរទីក្រុង Malaga បន្ទាប់ពីទន្លេនៅក្បែរនោះហក់ឡើងខ្លាំង ដោយមានទន្លេចំនួន ១៩ នៅ Andalusia ត្រូវបានប្រកាសអាសន្នពណ៌ក្រហមចំពោះទឹកជំនន់។ ស្របពេលជាមួយគ្នានេះ អាកាសធាតុអាក្រក់បានរីករាលដាលពីទីក្រុង Malagaទៅកាន់ទីក្រុង Seville និង Cordoba ។

សេវាសង្គ្រោះបន្ទាន់បានឆ្លើយតបទៅនឹងការហៅទូរសព្ទសុំជំនួយរាប់រយដងផងដែរអំឡុងពេលទឹកជំនន់នេះ។ ចំពោះទីក្រុង Malaga វាជាតំបន់តែមួយដែលធ្លាប់ត្រូវបានទឹកជំនន់វាយប្រហារកាលពីខែវិច្ឆិកា ដោយសារភ្លៀងធ្លាក់ខ្លាំង​ពាស​ពេញ​តំបន់ក្នុងប្រទេសអេស្ប៉ាញ នាំឱ្យមានការបំផ្លិចបំផ្លាញយ៉ាងធ្ងន់ធ្ងរនៅភាគខាងកើតរបស់ប្រទេសនិងបាន ឆក់យកជីវិតមនុស្ស២៣៣នាក់ ភាគច្រើននៅក្នុងទីក្រុង Valencia។

គួរបញ្ជាក់ថា ប្រទេសអេស្ប៉ាញបានទទួលរងពីគ្រោះរាំងស្ងួតដ៏យូរក្នុងរយៈពេលប៉ុន្មានឆ្នាំថ្មីៗនេះ តែបានទទួលភ្លៀងធ្លាក់​ជា​បន្តបន្ទាប់ ជាពិសេសនៅភាគខាងត្បូងប្រទេសក្នុងរយៈពេលពីរសប្តាហ៍ចុងក្រោយនេះ។ អ្នកវិទ្យាសាស្ត្រ និងមន្ត្រីរដ្ឋាភិបាលបានភ្ជាប់ការផ្លាស់ប្តូរទាំងនេះរវាងភាពស្ងួតខ្លាំង និងសើមខ្លាំងទៅនឹងការប្រែប្រួលអាកាសធាតុ ដែលបណ្តាល​ឱ្យ​រដូវក្តៅ​ ប្រឈម​អាកាសធាតុ​ក្តៅ​កាន់តែខ្លាំងនៅក្នុងប្រទេសអេស្ប៉ាញ៕

អត្ថបទ៖ ប៊ុន​ សុភាព