ព័ត៌មានអន្ដរជាតិ

ប៉េរូដាក់ប្រទេសក្នុងគ្រាអាសន្ន៣០ថ្ងៃនិងពង្រាយកងទ័ព ខណៈអំពើហិង្សាកើនឡើង

បានផុស

២ សប្តាហ៍ មុន

នៅ

ថ្ងៃពុធ ១៩ មីនា ២០២៥

ដោយ

ប្រធានាធិបតីប្រទេសប៉េរូបានប្រកាសភាពអាសន្ននៅក្នុងរដ្ឋធានីចាប់ពីថ្ងៃចន្ទ និងបានបញ្ជាឱ្យដាក់ពង្រាយទាហានដើម្បីជួយប៉ូលិសក្នុងការដោះស្រាយការកើនឡើងនៃអំពើហិង្សា ចំពេលមានការតវ៉ាយ៉ាងទូលំទូលាយមួយថ្ងៃបន្ទាប់ពីការសម្លាប់តារាចម្រៀងដ៏មានប្រជាប្រិយម្នាក់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៩ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលរបស់ប្រធានាធិបតី Dina Boluarte បានចេញផ្សាយក្រឹត្យមួយប្រកាសភាពអាសន្នរយៈពេល៣០ថ្ងៃ ហើយអាជ្ញាធរនឹងរឹតបន្តឹងសិទ្ធិមួយចំនួន រួមទាំងសេរីភាពនៃការប្រមូលផ្តុំ និងសកម្មភាពផងដែរ។ ការប្រកាសនេះមានន័យថា ប៉ូលិស និងកងទ័ពនឹងអាចឃុំខ្លួនមនុស្សដោយគ្មានដីកាពីតុលាការ។

ប្រទេសប៉េរូប្រឈមការកើនឡើងនៃការសម្លាប់ ការចាប់ជំរិតដោយហិង្សា និងការវាយប្រហារលើទីសាធារណៈក្នុងប៉ុន្មានខែថ្មីៗនេះ។ ប៉ូលិសបានរាយការណ៍ពីការសម្លាប់ចំនួន ៤៥៩ករណី ពីថ្ងៃទី១ខែមករាដល់ថ្ងៃទី១៦ខែមីនា ហើយរបាយការណ៍ជំរិតទារប្រាក់ចំនួន១៩០៩ ករណីនៅក្នុងខែមករាតែមួយប៉ុណ្ណោះ។

ប៉ុន្តែកំហឹងបានកើតឡើងខ្លាំងបន្ទាប់ពីការសម្លាប់លោក Paul Flores ដែលជាអ្នកចម្រៀងឈានមុខវ័យ ៣៩ឆ្នាំនៃក្រុមតន្ត្រី Cumbia Armonia 10។ លោក Flores ត្រូវបានគេបាញ់សម្លាប់កាលពីព្រឹកថ្ងៃអាទិត្យ លើរថយន្តក្រុងដែលគាត់ និងមិត្តរួមក្រុមកំពុងធ្វើដំណើរ បន្ទាប់ពីការប្រគំតន្ត្រីក្នុងទីក្រុង Lima។

ការវាយប្រហារលើតារាចម្រៀងដ៏ល្បីរូបនេះមិនមែនជាព្រឹត្តិការណ៍ហិង្សាតែមួយគត់កាលពីចុងសប្តាហ៍នេះទេ។ កាលពីថ្ងៃសៅរ៍ ក៏មានហេតុការណ៍ផ្ទុះនៅភោជនីយដ្ឋានមួយក្នុងរដ្ឋធានី ដោយបានបណ្តាលឲ្យមនុស្សយ៉ាងតិច១១នាក់រងរបួស។

ពាក់ព័ន្ធបញ្ហានេះ សមាជិកសភាបក្សប្រឆាំងបានស្នើសុំការបោះឆ្នោតមិនទុកចិត្តលើរដ្ឋមន្ត្រីមហាផ្ទៃ Juan Jose Santivanez ដែលខ្វះផែនការដើម្បីប្រយុទ្ធប្រឆាំងនឹងការកើនឡើងនៃអំពើហិង្សា។ ការបោះឆ្នោតនេះត្រូវបានគេរំពឹងថានឹងត្រូវពិភាក្សានៅក្នុងកិច្ចប្រជុំពេញអង្គរបស់សភានៅចុងសប្តាហ៍នេះ។

គួររម្លឹកថា រដ្ឋាភិបាលរបស់ប្រធាធិបតី Boluarte កាលពីឆ្នាំមុនក៏ធ្លាប់បានប្រកាសដាក់ប្រទេសក្នុងភាពអាសន្នក្នុងការប៉ុនប៉ងដើម្បីទប់ស្កាត់អំពើហិង្សារវាងខែកញ្ញាដល់ខែធ្នូផងដែរ៕