ភ្លើងឆេះឡានជាង៣០០​គ្រឿង​ក្នុង​បរិវេណ​ការិយាល័យ​​​គយថៃ​​ជាប់​ព្រំដែន​មីយ៉ាន់ម៉ា​

អគ្គិភ័យឆាបឆេះបំផ្លាញរថយន្តប្រហែល៣០០គ្រឿងដែលរឹបអូសបានរបស់ការិយាល័យគយក្នុងស្រុក Mae Sot ខេត្ត Tak ប្រទេសថៃកាលពីយប់ថ្ងៃអង្គារ។ នេះបើតាមការចេញផ្សាយរបស់សារព័ត៌មាន​ The Nations នៅថ្ងៃទី១៩ខែមីនានេះ។

រថយន្ត​ជាង​៣០០គ្រឿងបានរងការខូចខាតក្នុងអគ្គិភ័យកាលពីវេលាម៉ោង៧​​និង​៣០​នាទី​យប់ថ្ងៃអង្គារនៅឯកន្លែងរក្សាទុកនៅ​ខាង​ក្រោយ​ប៉ុស្តិ៍ត្រួតពិនិត្យគយនៅក្បែរស្ពានមិត្តភាព ថៃ-មីយ៉ាន់ម៉ា ទី២ក្នុងឃុំ Tha Sai Luat ស្រុក Mae Sot ខេត្ត Tak ខណៈដែលមានរថយន្តប្រហែល​៨០០គ្រឿងនៅក្នុងចំណតនេះ។

អ្នកនាំពាក្យនាយកដ្ឋានគយ លោក Phantong Loykulnanta បាននិយាយថា ភ្លើងឆេះដ៏ធំនៅក្នុងបរិវេណដាក់រថយន្តដែលរឹបអូសបានគឺមិនធ្លាប់មានពីមុនមកនោះទេ។ ទោះយ៉ាងណា​ក៏ដោយ យានជំនិះឆេះទាំងនោះ មានសភាពចាស់ មិនអាចប្រើប្រាស់បាន និងមិនមានរថយន្តទំនើបក្នុងចំណោមនោះទេ។

ឆ្លើយតបទៅនឹង​ហេតុការណ៍​នេះ រថយន្ត​ពន្លត់​អគ្គិភ័យ​ប្រមាណ​២០​គ្រឿង​ត្រូវ​បាន​ដាក់​ពង្រាយនិង​ប្រើ​ពេល​ប្រមាណ​៣​ម៉ោង​ទើប​រលត់​ភ្លើង​។ ក្នុងហេតុការណ៍នេះមិនមាន​នរណា​ម្នាក់​រង​របួស​ទេ ហើយ​ប៉ូលិស​កំពុង​ស៊ើបអង្កេត​រក​មូលហេតុ​នៃ​ការ​ឆេះ​នេះ។

មន្ត្រីគយប្រចាំស្រុក Mae Sot បានឲ្យដឹងថា រថយន្ត​ទាំង​អស់​ជា​រថយន្ត​ជជុះ​ដែល​នាំ​ចូល​ពី​ប្រទេស​ជប៉ុន និង​សម្រាប់​នាំ​ចេញ​ទៅ​ប្រទេស​មីយ៉ាន់ម៉ា។ ប៉ុន្តែ ក្រុមហ៊ុននាំចេញត្រូវផ្អាកប្រតិបត្តិការរបស់ពួកគេ ដោយសារតែការប្រយុទ្ធគ្នាញឹកញាប់នៅក្នុងប្រទេសមីយ៉ាន់ម៉ា ដែលបានធ្វើឱ្យស្ពានត្រូវបំផ្លាញ និងផ្លូវជាច្រើនត្រូវបានបិទ។

រថយន្តទាំងនេះបានចតនៅព្រំដែនហួសរយៈពេលកំណត់របស់នាយកដ្ឋានគយ ដូច្នេះហើយត្រូវបានរឹបអូសយកទៅរក្សាទុកជាភ័ស្តុតាង ដែលជាកន្លែងរក្សាទុកអស់ជាច្រើនឆ្នាំមកហើយ។ មន្ត្រី​រូប​នេះ​បាន​បន្ត​ថា ការិយាល័យ​គយ​បាន​ព្យាយាម​​ដាក់​លក់​ដេញ​ថ្លៃដែរ ប៉ុន្តែលក់មិនចេញ៕

អត្ថបទ៖ ប៊ុន សុភាព