​​​ទូក​ដឹក​ជន​ចំណាកស្រុក​លិច​នៅ​​​សមុទ្រ​អ៊ីតាលី​បណ្តាល​ស្លាប់​​និង​បាត់​ខ្លួន​​ជិត​​៥០​នាក់

​​ក្រុម​ជនចំណាកស្រុក​​​យ៉ាង​ហោច​ណាស់​​៦នាក់បានស្លាប់និង៤០នាក់កំពុងបាត់ខ្លួន បន្ទាប់ពីទូក​របស់​ពួកគេបានលិចនៅ​ជិត​កោះ Lampedusa ក្នុងសមុទ្រមេឌីទែរ៉ាណេ ក្នុងដែនទឹក​​របស់​​ប្រទេស​អ៊ីតាលី។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២០ខែមីនានេះ។

តំណាង UNHCR លោក Chiara Cardoletti បានឲ្យដឹងថា ទូកធុនតូចបានចាកចេញពីប្រទេសទុយនេស៊ីកាលពីថ្ងៃ​ចន្ទដោយដឹកមនុស្សចំនួន​៥៦នាក់ លើសចំណុះ​​ច្រើន​ពេក​ ទើប​បណ្តាល​ឲ្យទូក​លិចនៅសមុទ្រមេឌីទែរ៉ាណេជិតកោះ Lampedusa ប្រទេសអ៊ីតាលី។

ទីភ្នាក់ងារសារព័ត៌មាន ANSA របស់ប្រទេសអ៊ីតាលី បានរាយការណ៍ថា នាវាឆ្មាំឆ្នេរសមុទ្រអ៊ីតាលីបានជួយសង្គ្រោះមនុស្សចំនួន១០​នាក់ និងបន្តការស្វែងរកអ្នកដែលបាត់ខ្លួន។​ សាក្សី​​ដែល​​នៅរស់រានមានជីវិត​ពី​ហេតុការ​ណ៍​នោះ​​ បាននិយាយថា អ្នកបាត់ខ្លួនមួយចំនួនបានធ្លាក់ពីលើទូកពេលធ្វើដំណើរក្នុងសមុទ្រដ៏លំបាក។ អ្នកដំណើរនៅលើទូកទាំងនោះមានមកពីប្រទេសកូតឌីវ័រ ប្រទេសម៉ាលី ហ្គាំប៊ី និងកាមេរូន នៅ​ក្នុង​ទ្វីប​អាហ្រ្វីក​។

កាលពីថ្ងៃអង្គារមាន​ទូក​ដឹក​​មនុស្ស​​ចំនួនប្រាំ​ បាន​ចូល​ចត​​នៅកោះ Lampedusa ដោយមានមនុស្សសរុបចំនួន ២១៣​នាក់​បានមកដល់អ៊ីតាលីដែលនាំឱ្យចំនួនមនុស្សនៅមជ្ឈមណ្ឌលទទួលជនចំណាកស្រុករបស់កោះនេះកើនឡើងដល់​២៣០នាក់។

ក្រសួងមហាផ្ទៃរបស់ប្រទេសអ៊ីតាលី បានឱ្យដឹងថា មនុស្សប្រហែល​ ៨៧៤៣​នាក់ បានមកដល់ប្រទេសអ៊ីតាលីក្នុងឆ្នាំនេះ ច្រើនជាងការមកដល់ក្នុងរយៈពេលដូចគ្នា​ធៀប​​ឆ្នាំមុន។

អង្គការអន្តរជាតិសម្រាប់ការធ្វើចំណាកស្រុក (IOM) ដែលជាអង្គការរបស់អង្គការសហប្រជាជាតិ បាននិយាយថា មនុស្ស​ជាង ៣១៥០០​នាក់​បានស្លាប់ ឬបាត់ខ្លួននៅក្នុងសមុទ្រមេឌីទែរ៉ាណេចាប់តាំងពីឆ្នាំ ២០១៤ ខណៈនៅឆ្នាំនេះរហូតមកដល់ពេលនេះមានអ្នកស្លាប់មានចំនួន២៤៦​នាក់៕

អត្ថបទ៖ ប៊ុន សុភាព