ត្រាំ បញ្ជា​ឲ្យបង្កើនផលិតកម្មរ៉ែក្នុង​ស្រុក ខណៈកិច្ចព្រមព្រៀងជាមួយ​អ៊ុយក្រែននឹង​ធ្វើ​ឆាប់ៗ

ប្រធានាធិបតីអាមេរិក លោក ដូណាល់ ត្រាំ កាល​ពី​ថ្ងៃ​ទី​២០​ខែ​មីនា​ឆ្នាំ​២០២៥ បានចុះហត្ថលេខាលើបទបញ្ជាប្រតិបត្តិ ដែលអំពាវនាវ​ឲ្យ​មានការ​បង្កើនផលិតកម្មក្នុងស្រុកនៃសារធាតុរ៉ែសំខាន់ៗ ក្នុងគោលបំណងកាត់បន្ថយការពឹងផ្អែកលើប្រភពបរទេស ជាពិសេសពី​ប្រទេសចិន។ ទន្ទឹម​នោះ​ លោក ត្រាំ ក៏បានប្រកាសថា កិច្ចព្រមព្រៀងរ៉ែជាមួយអ៊ុយក្រែន ត្រូវបានរំពឹងថានឹងបញ្ចប់ក្នុងពេលឆាប់ៗនេះ ដោយពង្រឹងផលប្រយោជន៍សេដ្ឋកិច្ច និងយុទ្ធសាស្ត្ររបស់សហរដ្ឋអាមេរិកនៅក្នុងតំបន់។

ការជំរុញផលិតកម្មរ៉ែរបស់សហរដ្ឋអាមេរិក

នៅក្រោមបទបញ្ជាប្រតិបត្តិ រដ្ឋបាលលោក ត្រាំ នឹងប្រើប្រាស់ច្បាប់ «Defense Production Act» ដើម្បីពន្លឿនការជីកយករ៉ែ និងដំណើរការរ៉ែសំខាន់ៗដូចជា លីចូម នីកែល និងធាតុកម្រមួយ​ចំនួន​ទៀត។ ធនធានទាំងនេះមានសារៈសំខាន់សម្រាប់ផលិតបច្ចេកវិទ្យាទំនើប រួមទាំងឧបករណ៍អេឡិចត្រូនិក អាគុយរថយន្តអគ្គិសនី និងប្រព័ន្ធការពារ។

បទបញ្ជានេះដឹកនាំភ្នាក់ងារសហព័ន្ធ ដើម្បីសម្រួលដំណើរការអនុម័តសម្រាប់គម្រោងរុករករ៉ែ និងកំណត់អត្តសញ្ញាណដី​រដ្ឋ​ដែលសមស្រប​សម្រាប់ការទាញយករ៉ែ។ ថ្លែងនៅឯសេតវិមាន លោក ត្រាំ បានសង្កត់ធ្ងន់លើតម្រូវការ​​គ្រប់គ្រង​ដោយ​ខ្លួនឯង​ឲ្យ​កាន់តែច្រើននៅក្នុងការផលិតរ៉ែ ដោយនិយាយថា៖ «យើងមិនអាច​ពឹងផ្អែកលើសត្រូវសម្រាប់ធនធាន ដែលមានសារៈសំខាន់ចំពោះសេដ្ឋកិច្ច និងសន្តិសុខជាតិរបស់យើងទេ»។

កិច្ចព្រមព្រៀង​អ៊ុយក្រែន​ត្រូវ​បាន​រំពឹងធ្វើ​​ក្នុង​ពេល​ឆាប់ៗ

ទន្ទឹមនឹងកិច្ចខិតខំប្រឹងប្រែងដើម្បីពង្រឹងផលិតកម្មរ៉ែរបស់សហរដ្ឋអាមេរិក លោក ត្រាំ បានបង្ហាញថា ការចរចាសម្រាប់កិច្ចព្រមព្រៀងពាណិជ្ជកម្មរ៉ែជាមួយអ៊ុយក្រែនជិតបញ្ចប់ហើយ។ កិច្ចព្រមព្រៀងនេះ នឹងផ្តល់ឲ្យអ៊ុយក្រែននូវការគាំទ្រផ្នែកសេដ្ឋកិច្ច ខណៈពេលដែលផ្តល់​ឲ្យ​សហរដ្ឋអាមេរិកនូវលទ្ធភាពទទួលបានធនធានរ៉ែសំខាន់ៗ។

ទោះបីជាព័ត៌មានលម្អិតជាក់លាក់នៅតែមិនត្រូវ​បាន​បង្ហាញក៏ដោយ ក៏​កិច្ចព្រមព្រៀងនេះត្រូវបានគេរំពឹងថានឹងរួមបញ្ចូលការវិនិយោគនៅក្នុងវិស័យរុករករ៉ែរបស់អ៊ុយក្រែន និងការផ្តល់ការចែករំលែកប្រាក់ចំណូលដែលមានសក្តានុពល។ លោក ត្រាំ បានលើក​ឡើង​ថា៖ «កិច្ចព្រមព្រៀងនេះនឹងមានប្រយោជន៍សម្រាប់ប្រជាជាតិរបស់យើងទាំងពីរ» ដោយកត់សម្គាល់ថា វានឹងជួយទីក្រុង​កៀវ ឲ្យ​ងើបឡើងវិញ​នូវ​ផ្នែកសេដ្ឋកិច្ច ចំពេលមានជម្លោះដែលកំពុងបន្តជាមួយរុស្ស៊ី។

ការចរចាសន្តិភាពអ៊ុយក្រែនកំពុងដំណើរការ

លោក ត្រាំ ក៏បានផ្តល់ព័ត៌មានថ្មីៗស្តីពីកិច្ចខិតខំប្រឹងប្រែង​ដើម្បី​សម្របសម្រួល​ឲ្យ​បាន​នូវ​សន្តិភាពរវាងអ៊ុយក្រែន និងរុស្ស៊ីផងដែរ។ ការពិភាក្សាការទូតនាពេលថ្មីៗនេះ ដែលពាក់ព័ន្ធនឹងប្រធានាធិបតីរុស្ស៊ី លោក វ្ល៉ាឌីមៀរ ពូទីន និងប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បើ​តាមសេចក្តីរាយការណ៍ បាននាំ​ឲ្យ​មានការផ្អាកជាបណ្តោះអាសន្ន​រយៈពេល​៣០​ថ្ងៃ​ក្នុងការវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែន។ ខណៈពេលដែលបទឈប់បាញ់ជាផ្លូវការមិនទាន់ត្រូវបានសម្រេច លោក ត្រាំ បានពណ៌នាអំពីស្ថានភាពនេះថាជា «ការដើរក្នុងទិសដៅ​ដ៏​ត្រឹមត្រូវ​មួយ»៕

ដោយ៖ ឈាង