ព័ត៌មានអន្ដរជាតិ

អង់គ្លេស៖ ពូទីន នឹងបំពានបទឈប់បាញ់ បើអ៊ុយក្រែនពុំត្រូវបានការពារឲ្យរឹងមាំ

បានផុស

៤០ វិនាទី មុន

នៅ

ថ្ងៃសុក្រ ២១ មីនា ២០២៥

ដោយ

Chheang

មេដឹកនាំរុស្ស៊ី លោក វ្ល៉ាឌីមៀ ពូទីន នឹងបំពានកិច្ចព្រមព្រៀងសន្តិភាពជាមួយអ៊ុយក្រែន ប្រសិនបើទីក្រុងកៀវមិនត្រូវបានការពារឲ្យរឹងមាំនោះទេ។ នេះគឺជាប្រសាសន៍របស់លោក Keir Starmer នាយករដ្ឋមន្ត្រីអង់គ្លេស កាលពីថ្ងៃទី២០ខែមីនាឆ្នាំ២០២៥ អំឡុងពេលកំពុងផ្ដល់បទសម្ភាសន៍ជាមួយសារព័ត៌មាន BBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោកនាយករដ្ឋមន្ត្រី Starmer កិច្ចព្រមព្រៀងណាមួយស្តីពីការបញ្ឈប់អរិភាពរវាងរុស្ស៊ី និងអ៊ុយក្រែននឹងអាចមានរយៈពេលយូរអង្វែង លុះត្រាតែមាន «ការរៀបចំសន្តិសុខនៅនឹងកន្លែង»។ លោក Starmer បានបន្ថែមថា ការរៀបចំសន្តិសុខនឹងបញ្ជាក់យ៉ាងច្បាស់ដល់ប្រទេសរុស្ស៊ីថានឹងរង «ផលវិបាកធ្ងន់ធ្ងរ ប្រសិនបើពួកគេចង់រំលោភលើកិច្ចព្រមព្រៀងណាមួយ»។

ទន្ទឹមនឹងការអំពាវនាវនេះ បណ្តាប្រទេសអឺរ៉ុបដែលដឹកនាំដោយចក្រភពអង់គ្លេស និងបារាំងកំពុងបង្កើតផែនការដាក់ពង្រាយទាហានពី ១០ ០០០នាក់ ទៅ ៣០ ០០០នាក់ទៅកាន់ប្រទេសអ៊ុយក្រែន ដើម្បីអនុវត្តកិច្ចព្រមព្រៀងសន្តិភាពនាពេលខាងមុខ ដោយមិនមានការចូលរួមពីយោធាសហរដ្ឋអាមេរិកដោយផ្ទាល់ទេ។ ការពិភាក្សាទាំងនេះ មានគោលបំណងបង្កើត «ក្រុមសម្ព័ន្ធនៃឆន្ទៈ» ដើម្បីពង្រឹងសមត្ថភាពការពារជាតិរបស់អ៊ុយក្រែន និងធានាបាននូវភាពធន់នៃកិច្ចព្រមព្រៀងសន្តិភាព។

បន្ថែមពីលើនេះ រដ្ឋមន្ត្រីការពារជាតិអង់គ្លេសលោក John Healey បានសង្កត់ធ្ងន់ថា អង់គ្លេសបានត្រៀមខ្លួនរួចជាស្រេចដើម្បីប្រើប្រាស់ការទប់ស្កាត់នុយក្លេអ៊ែររបស់ខ្លួន ក្នុងការឆ្លើយតបទៅនឹងការគំរាមកំហែង ជាពិសេសពីប្រទេសរុស្ស៊ី។ ជំហរនេះបញ្ជាក់ពីការប្តេជ្ញាចិត្តរបស់អង់គ្លេស សម្រាប់ការទប់ស្កាត់ការឈ្លានពាន និងការធានាសន្តិសុខជាតិនៅពេលប្រឈមមុខនឹងភាពតានតឹងផ្នែកភូមិសាស្ត្រនយោបាយដែលកំពុងបន្ត៕

ដោយ៖ ឈាង