​អំពើបាញ់​ប្រហារកើត​ឡើង​ថ្មី​​​​នៅ​អាមេរិក បណ្តាល​ឱ្យស្លាប់​​​៣នាក់ និងរបួស១៥នាក់

មនុស្ស៣នាក់បានស្លាប់ និង១៥នាក់ផ្សេងទៀតបានរងរបួសនៅក្នុងការបាញ់ប្រហារដ៏ធំ រវាងក្រុមជម្លោះពីរក្រុមនៅឯពិព័រណ៍រថយន្តនៅក្នុងរដ្ឋ New Mexico សហរដ្ឋអាមេរិក។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៤ខែមីនានេះ។

ការបាញ់ប្រហារនេះបានកើតឡើងនៅ Young Park ក្នុងទីក្រុង Las Cruces រដ្ឋ New Mexico ប្រហែលម៉ោង ២២:០០ ​(ម៉ោងក្នុងស្រុក) កាលពីថ្ងៃសុក្រ នៅ​ក្នុងពិព័រណ៍រថយន្តកែច្នៃដែលគ្មានអនុញាត្ត និងមានមនុស្សប្រមាណ ២០០​នាក់​ចូលរួម។

សេចក្តីថ្លែងការណ៍របស់ប៉ូលិស បានឱ្យដឹងថា Andrew Madrid អាយុ១៦ឆ្នាំ និង Jason Gomez អាយុ១៨ឆ្នាំបាន​ស្លាប់នៅកន្លែងកើតហេតុ ហើយ Dominick Estrada អាយុ១៩ឆ្នាំ បានស្លាប់នៅឯមន្ទីរពេទ្យ។ ចំណែក​អ្នករងរបួសដោយ​គ្រាប់​កាំភ្លើង មាន​​ប្រុស​៩​នាក់ និង​ស្រី​៦​នាក់​អាយុ​ចាប់ពី​១៦​ឆ្នាំ​ដល់​៣៦​ឆ្នាំ​ ដោយ​អ្នក​ខ្លះបាន​ព្យាបាល​នៅនឹងកន្លែងនិងខ្លះត្រូវបញ្ជូន​ទៅ​មន្ទីរពេទ្យ។

មេប៉ូលិស លោក Jeremy Story បានឲ្យដឹងថា សំបកកាំភ្លើងចន្លោះពី៥០ទៅ៦០ ត្រូវបានរកឃើញរាយប៉ាយពាសពេញកន្លែងកើតហេតុ។ បើតាមមេប៉ូលិសរូបនេះ មានការឈ្លោះប្រកែកគ្នារវាងមនុស្សពីរក្រុម ហើយការឈ្លោះប្រកែកគ្នាឈានដល់ការបាញ់ប្រហារគ្នា។

បន្ទាប់​ពីហេតុការណ៍នេះ ប៉ូលិសបានចាប់ខ្លួន មនុស្ស៤នាក់ រួមមានក្មេងប្រុសអាយុ១៧ឆ្នាំពីរនាក់ ក្មេងប្រុសអាយុ ១៥ឆ្នាំម្នាក់ និងបុរសអាយុ ២០ឆ្នាំ។ ប៉ូលិស​ក៏បាន​ស្នើ​ឱ្យ​សាក្សី​ណា​ម្នាក់​ចេញ​មុខ​ផ្តល់​ព័ត៌មាន ឬ​វីដេអូកើតហេតុផងដែរ។

សហរដ្ឋ​អាមេរិក​មាន​ការ​ជជែក​ដេញដោល​នយោបាយ​ជា​យូរ​មក​ហើយ​អំពី​កម្រិត​ដែល​ពលរដ្ឋ​គួរ​ត្រូវ​បាន​អនុញ្ញាត​ឱ្យ​ទិញ​និង​កាន់​កាំភ្លើង។ ទោះបីជារដ្ឋធម្មនុញ្ញរបស់សហរដ្ឋអាមេរិកធានាដល់ជនជាតិអាមេរិកនូវសិទ្ធិ «រក្សា និងកាន់អាវុធ» ក៏ដោយ ច្បាប់សហព័ន្ធគ្រប់គ្រងយ៉ាងទូលំទូលាយនូវការចូលប្រើកាំភ្លើង រដ្ឋនីមួយៗនៃ៥០ មានបទប្បញ្ញត្តិផ្សេងៗគ្នាអំពីការទិញ កាន់កាប់ និងប្រើអាវុធ។

ចំពោះរដ្ឋ New Mexico អនុញ្ញាត​ឱ្យ​មនុស្ស​កាន់​កាំភ្លើង​ជា​សាធារណៈ​ដោយគ្មានការស្នើសុំ ខណៈអាជ្ញាធរមិនបានផ្តល់ព័ត៌មានលម្អិតអំពីស្ថានភាពផ្លូវច្បាប់នៃកាំភ្លើងដែលប្រើប្រាស់ក្នុងការបាញ់ប្រហារកាលពីថ្ងៃសុក្រនោះទេ៕

អត្ថបទ៖ ប៊ុន សុភាព