ចិន ទាត់ចោលរបាយការណ៍ដែលថា ខ្លួនចូលរួមបេសកកម្មរក្សាសន្តិភាពនៅអ៊ុយក្រែន 

កាលពីថ្ងៃចន្ទទី២៤ខែមីនាឆ្នាំ២០២៥ ប្រទេសចិន បានបដិសេធយ៉ាងដាច់អហង្ការចំពោះការចូលរួមណាមួយ នៅក្នុងបេសកកម្មរក្សាសន្តិភាពនៅអ៊ុយក្រែន ដែលស្នើឡើងដោយសហភាពអឺរ៉ុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗនេះមានសារព័ត៌មានជាច្រើន ជាពិសេសកាសែតអាល្លឺម៉ង់ Welt am Sonntag បានចុះផ្សាយថា អ្នកការទូតចិន បានទាក់ទងទៅ EU ដើម្បីស្វែងយល់ពីលទ្ធភាពដែលទីក្រុងប៉េកាំង អាចចូលរួមក្នុងសម្ព័ន្ធរក្សាសន្តិភាពនៅអ៊ុយក្រែនបាន ខណៈហេតុផលនៅពីក្រោយគំនិតនេះគឺថា ការចូលរួមរបស់ចិនអាចធ្វើឲ្យបេសកកម្ម កាន់តែអាចទទួលយកបានសម្រាប់រុស្ស៊ី ដោយសារទំនាក់ទំនងជិតស្និទ្ធរបស់ទីក្រុងប៉េកាំងជាមួយមូស្គូ។

ទោះជាយ៉ាងណា អ្នកនាំពាក្យក្រសួងការបរទេសចិន លោក Guo Jiakun បានទាត់ចោលព័ត៌មាននេះ ដោយសង្កត់ធ្ងន់ថា ខ្លួននៅតែប្តេជ្ញាចិត្តចំពោះដំណោះស្រាយដោយសន្តិវិធីតាមរយៈកិច្ចសន្ទនា ជាជាងការអន្តរាគមន៍ផ្នែកយោធា។

ប្រទេសចិនបានខិតខំខ្លាំងណាស់ សម្រាប់កិច្ចចរចាផ្នែកការទូតដើម្បីបញ្ចប់ជម្លោះ ជាជាងការអន្តរាគមន៍ផ្នែកយោធាដោយកម្លាំងខាងក្រៅ។ ខ្លួនសូមរក្សាជំហរអព្យាក្រឹត ដោយអំពាវនាវឲ្យមានបទឈប់បាញ់និងការចរចាសន្តិភាព ហើយប្រឆាំងនឹងទណ្ឌកម្មលើរុស្ស៊ី។

សូមជម្រាបជាថ្មី គំនិតនៃការបង្កើតក្រុមប្រទេសដែលត្រៀមខ្លួនគាំទ្រផ្នែកយោធាដល់ទីក្រុងកៀវ ត្រូវបានស្នើឡើងជាលើកដំបូងដោយនាយករដ្ឋមន្ត្រីអង់គ្លេស Keir Starmer ក្នុងកិច្ចប្រជុំកំពូលបន្ទាន់មួយនៅទីក្រុងឡុងដ៍កាលពីដើមខែនេះ។

ផែនការនេះរួមបញ្ចូលទាំងការដាក់ពង្រាយកងទ័ពនិងយន្តហោះផងដែរ ហើយទទួលបានការគាំទ្រយ៉ាងខ្លាំងពីសំណាក់ប្រធានាធិបតីបារាំង Emmanuel Macron ប៉ុន្តែនិយាយថា កងកម្លាំងលោកខាងលិចនឹងមិនត្រូវបានដាក់ពង្រាយទៅអ៊ុយក្រែនទេ រហូតដល់ស្ថានភាពនៅលើដីគោកមានសុវត្ថិភាពសម្រាប់ពួកគេ។

លោក Macron និង Starmer ត្រូវបានគេរំពឹងថានឹងធ្វើកិច្ចប្រជុំដោយឡែកពីគ្នានៅទីក្រុងឡុងដ៍និងប៉ារីសក្នុងសប្តាហ៍នេះ ដោយផ្តោតលើការរៀបចំយោធាសម្រាប់អ៊ុយក្រែន៕

អត្ថបទ៖ សុខ សុវណ្ណ

ចុចអាន៖ ចិន៖ អាមេរិកកុំ​ចេះលូក​ដៃ ​ក្នុង​កិច្ចសហ​ប្រតិបត្តិការ​ចិន-ថៃ