ខេត្ត Chiang Mai ជាប់ចំណាត់ថ្នាក់ទី៧ ដែលមានខ្យល់ពុលបំផុតនៅលើពិភពលោក

យោងតាមការចេញផ្សាយរបស់សារព័ត៌មាន The Nation នៅថ្ងៃទី២៥ខែមីនានេះ ទីក្រុង Chiang Mai ភាគខាងជើងប្រទេសថៃបានជាប់ចំណាត់ថ្នាក់ទី៧ ក្នុងចំណោមទីក្រុងចំនួន១៧០ ដែលមានខ្យល់ពុលខ្លាំង​បំផុតនៅលើពិភពលោក ដោយ​ផ្អែក​តាម​​គេហទំព័រត្រួតពិនិត្យគុណភាពខ្យល់ IQAir។

ការវាស់គុណភាពខ្យល់របស់ IQAir នេះមាន៦ប្រភេទ៖ ០-៥០ (គុណភាពខ្យល់ល្អ), ៥១-១០០ (កម្រិតមធ្យម), ១០១-១៥០ (មិនសូវល្អ), ១៥១-២០០ (មិនល្អ), ២០១-៣០០ (មិនល្អខ្លាំង) និងលើសពី ៣០១(គ្រោះថ្នាក់)។

បើយោងតាម ​​IQAir គិតត្រឹមម៉ោង ១០ៈ៣០ ព្រឹកថ្ងៃអង្គារនេះ ទីក្រុងទាំង ១០ ដែលមានការបំពុលខ្យល់អាក្រក់បំផុតនៅលើពិភពលោកគឺ៖

១. ទីក្រុង Delhi ប្រទេសឥណ្ឌា ៣០៨ មីក្រូក្រាមក្នុងមួយម៉ែត្រគូប(µg/m³)

២. ទីក្រុង Dakar ប្រទេសសេណេហ្គាល់ ២៣២ µg/m³

៣. ទីក្រុង Lahore ប្រទេសប៉ាគីស្ថាន ១៩១ µg/m³

៤. ទីក្រុង Hanoi ប្រទេសវៀតណាម ១៨៦ µg/m³

៥. ទីក្រុង Dhaka ប្រទេសបង់ក្លាដែស ១៨១ µg/m³

៦. ទីក្រុង Kathmandu ប្រទេសនេប៉ាល់ ១៨០ µg/m³

៧. ទីក្រុង Chiang Mai ប្រទេសថៃ ១៧០ µg/m³

៨. ទីក្រុង Incheon ប្រទេសកូរ៉េខាងត្បូង ១៦៤ µg/m³

៩.ទីក្រុង Seoul ប្រទេសកូរ៉េខាងត្បូង ១៦៤ µg/m³

១០.ទីក្រុង Yangon ប្រទេសមីយ៉ាន់ម៉ា ១៥៩ µg/m³

ចំណែក រាជធានីបាងកករបស់ប្រទេសថៃស្ថិតក្នុងចំណាត់ថ្នាក់ទី ១៦ ជាមួយនឹង AQI នៃ ១៣៤µg/m³កាលពីថ្ងៃអង្គារ។

គួរបញ្ជាក់ប្រទេសមួយរយៈចុងក្រោយនេះបានប្រឈមនឹងការកើនឡើងនៃខ្យល់ពុល បូករួមជាមួយនឹងភ្លើងឆេះព្រៃដែលមិនទាន់រលត់នៅខេត្តChiang Maiបានធ្វើឲ្យកម្រិត PM2.5កាន់តែកើនឡើងអាក្រក់ទៅៗ។

PM2.5 គឺជាភាគល្អិតល្អិតល្អន់ដែលមានអង្កត់ផ្ចិត 2.5 មីក្រូម៉ែត្រ ឬតិចជាង។ ភាគល្អិតនេះអាចប៉ះពាល់ដល់សុខភាព ប្រសិនបើដកដង្ហើមចូលទៅក្នុងសួត អាចបង្កើតជាជំងឺផ្លូវដង្ហើម បង្កើនហានិភ័យដល់ជំងឺរាំរ៉ៃមួយចំនួនដូចជាលើស​ឈាម​​ និង ជំងឺបេះដូងជាដើម។ ក្រុមមនុស្សដែលងាយរងគ្រោះមានដូចជា មនុស្សចាស់ ស្ត្រីមានផ្ទៃពោះ និងកុមារអាយុក្រោម៥ឆ្នាំ៕

អត្ថបទ៖ ប៊ុន សុភាព