ឆ្នាំមុនក្តៅខ្លាំងស្លាប់មនុស្សច្រើន ឆ្នាំនេះ ថៃ ព្រមានឲ្យប្រយ័ត្នមែនទែន ពិសេសអ្នកផឹកគ្រឿងស្រវឹង

ដោយសារតែឆ្នាំមុន ប្រទេសថៃមានមនុស្សស្លាប់លោតដល់ជាង៦០នាក់ដោយសារដាច់សរសៃឈាម ព្រោះតែអាកាសធាតុក្តៅខ្លាំងនោះ ឆ្នាំនេះ រដ្ឋាភិបាលទីក្រុងបាងកក បានព្រមានដល់ពលរដ្ឋត្រូវប្រុងប្រយ័ត្នឲ្យមែនទែន ជាពិសេសអ្នកផឹកគ្រឿងស្រវឹង ព្រោះ សីតុណ្ហភាពចាប់ផ្តើមហក់ឡើងក្នុងកម្រិតគួរឲ្យព្រួយបារម្ភហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន The Nation កាលពីថ្ងៃចន្ទទី២៤ខែមីនាឆ្នាំ២០២៥ បានដកស្រង់សម្តីអ្នកនាំពាក្យរងរដ្ឋាភិបាលថៃ Karom Polpornklang ដែលនិយាយថា សូមពលរដ្ឋប្រយ័ត្នខ្លួន ខណៈរលកកម្តៅនេះ បានឆក់យកជីវិតមនុស្សដល់ទៅ៦៣នាក់ឯណោះ កាលពីឆ្នាំ២០២៤។

អ្នកដែលមានហានិភ័យជាងគេគឺកម្មករដែលធ្វើការនៅហាលក្តៅឬនៅខាងក្រៅ និងអ្នកដែលមានជំងឺរ៉ាំរ៉ៃ ជាពិសេសអ្នកដែលទទួលទានគ្រឿងស្រវឹងតែម្តង ខណៈពិធីបុណ្យសង្ក្រាន្តឆ្នាំថ្មី ក៏ជិតចូលមកដល់។ 

យោងតាមទិន្នន័យកាលពីឆ្នាំមុន ក្នុងចំណោមមនុស្សបាត់បង់ជីវិតទាំង៦៣នាក់ ភាគច្រើនគឺជាអ្នកទទួលទានគ្រឿងស្រវឹងពេលមេឃកំពុងក្តៅខ្លាំង ហើយ ៧០%នៃការស្លាប់ គឺកើតឡើងក្នុងខែមេសា។

ការព្រមាននេះកើតឡើង មួយសប្តាហ៍បន្ទាប់ពីនាយកដ្ឋានឧតុនិយមថៃ ប្រកាសថា អាកាសធាតុក្នុងប្រទេសនេះ បានឡើងក្តៅខ្លាំងឈានដល់កម្រិតគ្រោះថ្នាក់ (ពណ៌ទឹកក្រូច) ពោលគឺនៅតំបន់ខ្លះសីតុណ្ហភាពបានហក់ដល់ ៤២ ទៅ៥១.៩ អង្សាសេរួចទៅហើយ។

ក្នុងរយៈពេលមួយសប្តាហ៍ រាប់ចាប់ពីថ្ងៃទី៥ដល់១៤ខែមីនា តំបន់ប៉ែកខាងត្បូង ខាងកើត កណ្តាលនិងឦសាន ជាកន្លែងមានហានិភ័យខ្លាំងជាងគេ ដោយសីតុណ្ហភាពហក់ឡើងដល់ក្បែរ៥២អង្សា​ឯណោះ៕

អត្ថបទ៖ សុខ សុវណ្ណ

ចុចអាន៖ មិនទាន់ចូលខែមេសាផង តែនៅ ថៃ ក្តៅខ្លាំង ឈានដល់កម្រិតគ្រោះថ្នាក់ ទៅហើយ