ព័ត៌មានអន្ដរជាតិ

ភ្នាក់ងារUN អំពាវនាវរកជំនួយ៩៣០លានដុល្លារ សម្រាប់ជនភៀសខ្លួនរ៉ូហ៊ីងយ៉ានៅបង់ក្លាដែស

បានផុស

៣ ថ្ងៃ មុន

នៅ

ថ្ងៃពុធ ២៦ មីនា ២០២៥

ដោយ

ទីភ្នាក់ងាររបស់អង្គការសហប្រជាជាតិចំនួន២ បានអំពាវនាវឲ្យមានជំនួយហិរញ្ញវត្ថុបន្ថែមទៀតសម្រាប់ជនភៀសខ្លួនរ៉ូហ៊ីងយ៉ានៅក្នុងប្រទេសបង់ក្លាដែស បើមិនដូច្នេះទេពួកគេត្រូវប្រឈមនឹង «ផលវិបាកធ្ងន់ធ្ងរ»។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៦ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារ២ រួមមាន អង្គការសហប្រជាជាតិទទួលបន្ទុកជនភៀសខ្លួន (UNHCR) និងអង្គការអន្តរជាតិសម្រាប់ទេសន្តរប្រវេសន៍(IOM) បានចេញសេចក្តីថ្លែងការណ៍រួមគ្នាមួយ ដោយអំពាវនាវរកជំនួយជាង៩៣០លានដុល្លារអាមេរិកសម្រាប់ជួយជនភៀសខ្លួន រ៉ូហ៊ីងយ៉ា ដែលភៀសខ្លួនពីប្រទេសមីយ៉ាន់ម៉ាទៅរស់នៅក្នុងជំរំក្នុងប្រទេសបង់ក្លាដែស។

គិតត្រឹមចុងខែកុម្ភៈ មានជនភៀសខ្លួនរ៉ូហ៊ីងយ៉ាប្រហែល១លាននាក់នៅក្នុងប្រទេសបង់ក្លាដែស ហើយពាក់កណ្តាលនៃជនភៀសខ្លួនទាំងនេះគឺជាស្ត្រី និងកុមារី ដែលងាយប្រឈមនឹងហានិភ័យខ្ពស់ពីអំពើហិង្សា និងការកេងប្រវ័ញ្ចលើយេនឌ័រ។ មួយភាគបីនៃចំនួនប្រជាជននេះមានអាយុចន្លោះពី១០ទៅ២៤ឆ្នាំ មិនមានលទ្ធភាពទទួលបានការអប់រំផ្លូវការ និងការសិក្សាជំនាញអភិវឌ្ឍសម្ថភាពគ្រប់គ្រាន់នោះទេ។

ទីភ្នាក់ងារទាំង២នេះ បានអះអាងថា កង្វះខាតថវិកាសម្រាប់ជំនួយស្បៀងអាហារ និងទីជម្រកអាចបង្ខំមនុស្សជាច្រើនបាក់ទឹកចិត្តនិងអស់សង្ឃឹម ដែលអាចឲ្យពួកគេខ្លះបង្ខំចិត្តធ្វើដំណើរតាមទូកដ៏គ្រោះថ្នាក់ដើម្បីស្វែងរកសុវត្ថិភាពក្នុងប្រទេសផ្សេងទៀត។

ទីភ្នាក់ងាររបស់អង្គការសហប្រជាជាតិទាំងនេះកំពុងអំពាវនាវដល់សហគមន៍អន្តរជាតិឱ្យបន្តផ្តល់មូលនិធិជំនួយសង្គ្រោះអាយុជីវិត និងឱកាសដែលអាចឱ្យជនភៀសខ្លួនអាចពឹងផ្អែកលើខ្លួនឯងបាន ខណៈដែលការផ្ដាច់ជំនួយរបស់សហរដ្ឋអាមេរិកប៉ះពាល់ដល់ប្រជាជនក្នុងប្រទេសអាស៊ីអាគ្នេយ៍នេះជាខ្លាំង៕