ព័ត៌មានអន្ដរជាតិ

ការសិក្សា៖ ខ្យល់ពុលជំរុញឱ្យខូចលឿនដល់ប្រព័ន្ធខួរក្បាលរបស់មនុស្សចាស់

បានផុស

៣ ថ្ងៃ មុន

នៅ

ថ្ងៃពុធ ២៦ មីនា ២០២៥

ដោយ

យោងតាមការស្រាវជ្រាវថ្មីមានមូលដ្ឋានចេញពីតៃវ៉ាន់ បានឱ្យដឹងថា ខ្យល់ពុលអាចធ្វើឱ្យខូចសុខភាពខួរក្បាលចំពោះមនុស្សចាស់ ស្របពេលប្រទេសជាច្រើនលើពិភពលោកកំពុងប្រឈមនឹងការកើនឡើងនៃខ្យល់ពុល។ នេះបើយោងតាមទីភ្នាក់ងារសារព័ត៌មាន Central News ដែលមានមូលដ្ឋាននៅទីក្រុងតៃប៉ិ បានរាយការណ៍កាលពីថ្ងៃអង្គារទី២៥ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសិក្សាថ្មីមួយដែលចេញផ្សាយដោយសាកលវិទ្យាល័យជាតិ Yang Ming Chiao Tung បានរកឃើញថា ខ្យល់ពុលអាចប៉ះពាល់ដល់ប្រព័ន្ធភាពស៊ាំតាមរយៈក្លិន បង្កឱ្យមានការរលាក។ ការរលាកនេះអាចបំផ្លាញរបាំងឈាមខួរក្បាល ដែលនាំឱ្យមានរបួសដល់សរសៃឈាមខួរក្បាល ហើយចុងក្រោយប៉ះពាល់ដល់សុខភាពសរសៃប្រសាទ។

ដោយប្រើគំរូដើម្បីប៉ាន់ប្រមាណកម្រិតនៃការបំពុលបរិយាកាសរយៈពេល១០ឆ្នាំ អ្នកស្រាវជ្រាវបានសិក្សាលើមនុស្សពេញវ័យចំនួន៤១២នាក់ដែលមានអាយុចាប់ពី៦០ឆ្នាំឡើងទៅ ដែលរស់នៅក្នុងតំបន់ជនបទ និងទីក្រុង។ ពួកគេក៏បានធ្វើតេស្តសាកល្បងការយល់ដឹង និងការស្កែន MRI (ការធ្វើរោគវិនិច្ឆ័យដោយគ្មានការឈឺចាប់ អនុញ្ញាតឱ្យគ្រូពេទ្យមើលឃើញបញ្ហានៅទីអាថ៌កំបាំងបានច្បាស់លាស់ សម្រាប់ការធ្វើរោគវិនិច្ឆ័យ និងការព្យាបាលកាន់តែមានប្រសិទ្ធភាព ) ដើម្បីវិភាគការផ្លាស់ប្តូររចនាសម្ព័ន្ធខួរក្បាលរបស់ពួកគេ។

ការស្កែន MRI ក៏បង្ហាញពីការផ្លាស់ប្តូររចនាសម្ព័ន្ធនៅក្នុងតំបន់ខួរក្បាល ដែលទទួលខុសត្រូវចំពោះការយកចិត្តទុកដាក់ និងការចងចាំ នៅពេលដែលកំហាប់សារធាតុពុលកើនឡើង។

លោកស្រី Yi-Fang Chuang សាស្ត្រាចារ្យរងនៅវិទ្យាស្ថានសុខភាពសាធារណៈនៃសាកលវិទ្យាល័យជាតិ Yang Ming Chiao Tung បានឱ្យដឹងថា ខ្យល់ពុលគឺជាកត្តាហានិភ័យសម្រាប់មុខងារនៃការយល់ដឹងចុះខ្សោយ ខណៈការសិក្សានេះជួយបញ្ជាក់ពីទំនាក់ទំនងរវាងការបំពុលបរិយាកាស និងសុខភាពខួរក្បាលចំពោះមនុស្សចាស់។

លោកស្រី បានបន្ថែមថា ការកែលម្អគុណភាពខ្យល់គឺអាចលើកកម្ពស់សុខភាពខួរក្បាល និងមុខងារនៃការយល់ដឹងចំពោះមនុស្សចាស់ ដោយពន្យារហានិភ័យនៃជំងឺវង្វេងផងដែរ។

តាមការសិក្សាកន្លងមក ខ្យល់ពុលគឺជាមូលហេតុមួយដែលធ្វើឲ្យមនុស្សស្លាប់មុនអាយុ តាមរយៈផលប៉ះពាល់រយៈពេលវែង។ កម្រិត PM2.5 នៅក្នុងខ្យល់លើសកម្រិតអាចធ្វើឲ្យមានផលប៉ះពាល់ដល់សុខភាពផ្លូវដង្ហើម និង បង្កើនហានិភ័យសម្រាប់ជំងឺរ៉ាំរ៉ៃផ្សេងទៀតជាពិសេសចំពោះកុមារ មនុស្សចាស់ និងស្រីមានផ្ទៃពោះ ខណៈប្រទេសជាច្រើននៅលើពិភពលោកជាពិសេសប្រទេសក្នុងតំបន់អាស៊ីកំពុងប្រឈមនឹងការកើនឡើងនៃខ្យល់ពុលនេះ៕