ត្រាំ ត្រៀមដកទណ្ឌកម្មខ្លះពីរុស្ស៊ី ដើម្បីលួងចិត្តពូទីន ឲ្យព្រមឈប់បាញ់

ប្រធានាធិបតីអាមេរិក ដូណាល់ ត្រាំ បានបញ្ជាក់ថា លោកកំពុងគិតចង់បន្ធូរបន្ថយទណ្ឌកម្មខ្លះលើប្រទេសរុស្ស៊ី ដើម្បីលួងចិត្តឲ្យលោក វ្ល៉ាឌីមៀរ ពូទីន ឲ្យឯកភាពលើបទឈប់បាញ់នៅសមុទ្រខ្មៅជាមួយអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុននេះ រុស្ស៊ីនិងអ៊ុយក្រែន បានឯកភាពឈប់បាញ់នៅសមុទ្រខ្មៅ ក្នុងគោលបំណងធានាសុវត្ថិភាពនៃការធ្វើនាវាចរណ៍និងទប់ស្កាត់ ការយកកប៉ាល់ពាណិជ្ជកម្មទៅបម្រើការឲ្យយោធា ក្រោមសំណើដែលដាក់ស្នើឡើងនិងមានការសម្របសម្រួលពីសហរដ្ឋអាមេរិក។

យ៉ាងណា ភាគីរុស្ស៊ីបានដាក់លក្ខខណ្ឌថា បទឈប់បាញ់ដែនសមុទ្រនេះ អាចចូលជាធរមានបានលុះត្រាតែ ប្រទេសលោកខាងលិចដកទណ្ឌកម្មមួយចំនួនលើការធ្វើពាណិជ្ជកម្មស្បៀងនិងជីរបស់ខ្លួន ជាមុនសិន។

ដូច្នេះហើយទើបលោក ត្រាំ ថ្លែងប្រាប់អ្នកសារព័ត៌មានក្នុងសេតវិមាននៅថ្ងៃពុធទី២៦ខែមីនាឆ្នាំ២០២៥ ថា សហរដ្ឋអាមេរិក នឹងពិនិត្យមើលលទ្ធភាពនៃការបន្ថយទណ្ឌកម្មលើរុស្ស៊ី ហើយទីក្រុងវ៉ាស៊ីនតោនកំពុងធ្វើការលើរឿងនេះ។ មានលក្ខខណ្ឌ ៥ទៅ៦ចំណុច ហើយអាមេរិក កំពុងពិនិត្យមើលសិន។

ទោះបីជាយ៉ាងណាក៏ដោយ លោក ត្រាំ មិនទាន់បកស្រាយលម្អិតអំពីរឿងនេះទេ គ្រាន់តែបញ្ជាក់ថា វាអាចទៅរួចដែលអាមេរិក នឹងដកទណ្ឌកម្មចេញខ្លះពីទីក្រុងមូស្គូ។

សូមជម្រាបថា ក្រៅពីបទឈប់បាញ់នៅសមុទ្រខ្មៅ ភាគីរុស្ស៊ី-អ៊ុយក្រែន ក៏បានប្តេជ្ញាពង្រឹងវិធានការដើម្បីអនុវត្តបទឈប់បាញ់ដែលព្រមព្រៀងលើកមុន លើការវាយប្រហារលើហេដ្ឋារចនាសម្ព័ន្ធថាមពលរបស់គ្នាទៅវិញទៅមកផងដែរ។

រុស្ស៊ីបានបង្ហាញបញ្ជីមួយដែលមានបញ្ជាក់អំពីទីតាំងថាមពលចំនួន៨ ដែលខ្លួននឹងផ្អាកវាយប្រហារក្រោមបទឈប់បាញ់រយៈពេល៣០ថ្ងៃជាមួយអ៊ុយក្រែន ខណៈដែលអាមេរិកឯណោះក៏អះអាងដែរថា បទឈប់បាញ់នេះ អាចពង្រីកដល់លើសមួយខែឯណោះ ប្រសិនបើគ្រប់យ៉ាងដំណើរការទៅដោយរលូន។

ទីតាំងថាមពលដែលរុស្ស៊ីរាយក្នុងបញ្ជីដាក់ជូនទៅអាមេរិកមានដូចជា៖ ១.រោងចក្រចម្រាញ់ប្រេង, ២.កន្លែងកែច្នៃប្រេងនិងឧស្ម័ន, ៣.ស្តុកប្រេងនិងឧស្ម័ន, ៤.បំពង់បង្ហូរនិងស្ថានីយបូម, ៥.រោងចក្រផលិតអគ្គិសនី, ៦.ហេដ្ឋារចនាសម្ព័ន្ធចែកចាយអគ្គិសនី, ៧.រោងចក្រថាមពលនុយក្លេអ៊ែរនិង ៧.ទំនប់វារីអគ្គិសនី៕

អត្ថបទ៖ សុខ សុវណ្ណ

ចុចអាន៖ រុស្ស៊ី បង្ហាញទីតាំងថាមពលចំនួន៨ ដែលខ្លួននឹងផ្អាកវាយប្រហារ ក្នុងបទឈប់បាញ់ជាមួយ អ៊ុយក្រែន