អនុប្រធានាធិបតីអាមេរិក នឹងអមដំណើរភរិយាទៅទស្សនកិច្ច Greenland ចំពេលស្ថានការណ៍កំពុងក្តៅ

តាមការចុះផ្សាយរបស់ BBC នៅថ្ងៃពុធទី២៦ខែមីនាឆ្នាំ២០២៥, អនុប្រធានាធិបតីអាមេរិក JD Vance និងអមដំណើរភរិយារបស់លោក ធ្វើទស្សនកិច្ចតំបន់ Greenland ស្របពេលភាពតានតឹងជុំវិញបញ្ហាដែនកោះនេះកាន់តែតានតឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការយកដែនកោះដ៏ធំបំផុតរបស់ពិភពលោក​ដែល​សម្បូរទៅដោយ​​ធនធានរ៉ែ ប្រេង និងឧស្ម័នធម្មជាតិមួយ​នេះមកគ្រប់គ្រង បានក្លាយជាមុខព្រួញរបស់ប្រមុខសេតវិមាន ដូណាល់ ត្រាំ ចាប់តាំងពីលោកចូលដឹកនាំអាណត្តិទី២ ហើយថែមទាំងមានការឲ្យតម្រុយ អំពីវិធីសាស្រ្តប្រើកម្លាំងទ័ពដើម្បីសម្រេចគោលដៅនេះថែមទៀតផង។

ដូច្នេះហើយ ទើបដំណើរទស្សនកិច្ចរបស់មន្ត្រីជាន់ខ្ពស់អាមេរិកទៅ Greenland នៅថ្ងៃសុក្រនេះ បានក្លាយប្រធានបទក្តៅដែលពិភពលោក តាមដានយ៉ាងយកចិត្តទុកដាក់ជាទីបំផុត។

តាមការបញ្ជាក់ពីសេតវិមាន, លោក Vance នឹងអមដំណើរភរិយាដែលត្រូវជាជំទាវទី២អាមេរិក Usha Vance ក្នុងដំណើរទស្សនកិច្ចនេះ ហើយក្នុងនោះអ្នកទាំងពីរ នឹងទៅមើលមូលដ្ឋានអវកាស Pituffik ដើម្បីស្តាប់របាយការណ៍និងជួបជាមួយកងទ័ពអាមេរិក ដែលឈរជើងនៅទីនោះ។

Pituffik ដែលមានទីតាំងនៅភាគខាងជើងឆៀងខាងលិចកោះ Greenland ជាមូលដ្ឋានចេញការព្រមានអំពីមីស៊ីល បំពាក់ខែលការពារដែនអាកាស និងធ្វើបេសកកម្មឃ្លាំមើលទីអវកាស។

ទោះបីជាយ៉ាងណាក៏ដោយ មន្ត្រី Greenland បានថ្កោលទោសខ្លាំងៗ ចំពោះដំណើរទស្សនកិច្ចនេះ ដោយរិះគន់ថា វាជាកាយវិការដែលគ្មានការគោរពទាល់តែសោះ។

សូមជម្រាបថា Greenland មានប្រជាជន​​​​​​ប្រមាណ​​៥៦ ០០០​នាក់ដែលស្ថិតនៅចន្លោះមហាសមុទ្រអាកទិកនិងអាត្លង់ទិក ត្រូវប្រទេសដាណឺម៉ាកកាន់កាប់អស់រយៈពេលប្រហែល៣០០ឆ្នាំមកហើយ។ ដែនកោះនេះ គ្រប់គ្រងកិច្ចការក្នុងស្រុកផ្ទាល់ខ្លួន ប៉ុន្តែរដ្ឋាភិបាលទីក្រុងកូប៉ិនហាក គឺជាអ្នកសម្រេចលើកិច្ចការគោលនយោបាយការបរទេសនិងការពារជាតិ៕

អត្ថបទ៖ សុខ សុវណ្ណ

ចុចអាន៖ ជំទាវទី២ អាមេរិក នឹងធ្វើទស្សនកិច្ចកោះ Greenland នាំទាំងរដ្ឋមន្ត្រីក្រសួងថាមពល ទៅជាមួយ