ព័ត៌មានអន្ដរជាតិ

UN៖ ប្រជាជនហ្គាហ្សាភៀសខ្លួនជាថ្មី ដោយត្រឹមមួយសប្តាហ៍មានជាង១៤ម៉ឺននាក់

បានផុស

១ ថ្ងៃ មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

ការវាយប្រហារជាថ្មីរបស់អ៊ីស្រាអែលលើតំបន់ហ្គាហ្សាបានបន្តរយៈពេលប្រាំបួនថ្ងៃជាប់គ្នាសម្លាប់ប្រជាជនប៉ាឡេស្ទីនរាប់សិបនាក់ ខណៈដែលអង្គការសហប្រជាជាតិ ថាមានមនុស្សជាង១៤ម៉ឺននាក់ត្រូវបានផ្លាស់ទីលំនៅ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៧ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារមនុស្សធម៌របស់អង្គការសហប្រជាជាតិ (OCHA) បានឲ្យដឹងថា ជនជាតិប៉ាឡេស្ទីន១៤២០០០ នាក់បានផ្លាស់ទីលំនៅដោយបង្ខំចាប់តាំងពីអ៊ីស្រាអែលបានបន្តសង្រ្គាមរបស់ខ្លួនម្ដងទៀតនៅលើតំបន់ហ្គាហ្សានៅថ្ងៃទី១៨ខែមីនា។ បើតាមភ្នាក់ងារនេះ មនុស្សជាច្រើននាក់កំពុងស្នាក់នៅតាមដងផ្លូវ ហើយត្រូវការអាហារ ទឹកស្អាត និងទីជម្រកជាចាំបាច់។

ក្នុងរយៈពេល១៤ម៉ោង ក្រសួងសុខាភិបាលនៅតំបន់ហ្គាហ្សា បានឲ្យដឹងថា ការវាយប្រហាររបស់អ៊ីស្រាអែលបានសម្លាប់មនុស្សយ៉ាងហោចណាស់៣៩នាក់ រួមទាំងកុមារនិង១២៤នាក់ បានរងរបួសនៅទូទាំងតំបន់ហ្គាហ្សា។ ការវាយប្រហារត្រូវបានគេរាយការណ៍នៅទូទាំងតំបន់ហ្គាហ្សារួមទាំងនៅភាគខាងជើងនៃតំបន់ Jabalia ព្រមទាំងតំបន់ Khan Younis និង Rafah។ យោងតាម OCHA របស់អង្គការសហប្រជាជាតិ ប្រជាជនប៉ាឡេស្ទីនរាប់ពាន់នាក់ទៀតត្រៀមជម្លៀសផងដែរ។

លើសពីចំនួនជនស៊ីវិលដែលបានបាត់បង់ជីវិត OCHA បាននិយាយថា យ៉ាងហោចណាស់បុគ្គលិកជំនួយ៨នាក់ត្រូវបានសម្លាប់នៅហ្គាហ្សា ចាប់តាំងពីអ៊ីស្រាអែលបានបន្តសង្គ្រាមកាលពីសប្តាហ៍មុន ដែលនាំឱ្យចំនួនមនុស្សសរុបដែលត្រូវបានសម្លាប់ចាប់តាំងពីការរំលោភបទឈប់បាញ់កើនដល់៣៩៩នាក់។

ចាប់តាំងពីអ៊ីស្រាអែលចាប់ផ្តើមសង្រ្គាមឡើងវិញ យោធារបស់ខ្លួនបានចេញសេចក្តីជូនដំណឹងចំនួន៦លើក ដោយដាក់ប្រហែល១៥ភាគរយនៃតំបន់ហ្គាហ្សាស្ថិតនៅក្រោមការជម្លៀសខ្លួន។ ស្របពេលជាមួយគ្នានេះជំនួយមនុស្សធម៌ក៏កំពុងខ្វះខាតយ៉ាងខ្លាំងដោយប្រព័ន្ធទឹកដែលនៅសេសសល់របស់ហ្គាហ្សាស្ថិតក្នុងគ្រោះថ្នាក់ ហើយនឹងដួលរលំទាំងស្រុង ប្រសិនបើការផ្គត់ផ្គង់ប្រេងឥន្ធនៈអស់ ខណៈការបិទផ្លូវដាក់ទណ្ឌកម្មរបស់អ៊ីស្រាអែលបានឈានដល់ថ្ងៃទី២៥មីនា៕