ព័ត៌មានអន្ដរជាតិ

អនុប្រធានាធិបតីស៊ូដង់ខាងត្បូងត្រូវចាប់ខ្លួន ខណៈមន្ត្រី UN អំពាវនាវភាគីជម្លោះអត់ធ្មត់

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

អនុប្រធានាធិបតីទីមួយរបស់ប្រទេសស៊ូដង់ខាងត្បូង លោក Riek Machar ត្រូវបានចាប់ខ្លួន ស្របពេលដែលបេសកជនរបស់អង្គការសហប្រជាជាតិនៅស៊ូដង់ខាងត្បូង (UNMISS) បានអំពាវនាវឱ្យភាគីជម្លោះទាំងអស់អត់ធ្មត់។ លោក Riek Machar ជាគូប្រជែងដ៏យូរអង្វែងរបស់ប្រធានាធិបតីរបស់ប្រទេសនេះលោក Salva Kiir។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Al Jazeera បានផ្សាយនៅថ្ងៃទី២៧ខែមីនានេះ ឲ្យដឹងថា ប្រធាន UMISS លោក Nicholas Haysom បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយនៅព្រឹកថ្ងៃព្រហស្បតិ៍នេះថា មេដឹកនាំរបស់ប្រទេសនេះកំពុងឈរនៅលើគែមនៃការវិលត្រលប់ទៅក្នុងជម្លោះពីមុនវិញ។

លោក Haysom បានបន្ថែមថា ការវិលត្រឡប់ទៅកាន់ការប្រយុទ្ធគ្នាម្ដងទៀត នឹងមិនត្រឹមតែបំផ្លិចបំផ្លាញប្រទេស ស៊ូដង់ខាងត្បូងប៉ុណ្ណោះទេ ប៉ុន្តែថែមទាំងប៉ះពាល់ដល់តំបន់ទាំងមូលផងដែរ។

យោងតាមគណបក្ស Sudan People’s Liberation Army In Opposition (SPLM/IO) របស់លោក Machar ក្បួនរថយន្តដែលមានអាវុធធុនធ្ងន់ចំនួន ២០ គ្រឿងបានចូលដោយបង្ខំ ទៅកាន់គេហដ្ឋានរបស់អនុប្រធានាធិបតីទីមួយក្នុងទីក្រុង Juba ហើយបានដកហូតអាវុធពីអង្គរក្សរបស់គាត់កាលពីថ្ងៃពុធ។

លោក Reath Muoch Tang ប្រធានគណៈកម្មាធិការទំនាក់ទំនងបរទេសរបស់លោក Machar បានឱ្យដឹងថា «ដីកាចាប់ខ្លួនត្រូវបានបញ្ជូនទៅគាត់ក្រោមការចោទប្រកាន់មិនច្បាស់លាស់»។

លោក Tang បាននិយាយថា៖«ទង្វើនេះគឺជាការរំលោភយ៉ាងធ្ងន់ធ្ងរលើរដ្ឋធម្មនុញ្ញ និងកិច្ចព្រមព្រៀងសន្តិភាព»។ ទោះយ៉ាងណាអ្នកនាំពាក្យរដ្ឋាភិបាលមិនអាចទាក់ទងភ្លាមៗដើម្បីសុំការអត្ថាធិប្បាយទាក់ទងរឿងចាប់ខ្លួនអនុប្រធានាធិបតីនេះបានទេ។

បើតាមអង្គការសហប្រជាជាតិបានរាយការណ៍ពីការប៉ះទង្គិចគ្នាក្នុងរយៈពេល ២៤ ម៉ោងចុងក្រោយរវាងកងកម្លាំងដែលគាំទ្រប្រធានាធិបតី Kiir និងអនុប្រធានាធិបតី Machar នៅខាងក្រៅរដ្ឋធានី Juba ខណៈដែលធ្វើឲ្យប្រទេសនេះអាចធ្លាក់ចូលនៅក្នុងសង្គ្រាមវិញនិងបញ្ចប់កិច្ចព្រមព្រៀងងសន្តិភាពឆ្នាំ២០១៨។

(រូបភាព៖ Reuters) លោក Riek Machar និងលោក Salva Kiir

ប្រទេសស៊ូដង់ខាងត្បូង ដែលជាប្រទេសក្មេងជាងគេបំផុតរបស់ពិភពលោក បានធ្លាក់ចូលទៅក្នុងសង្រ្គាមស៊ីវិលដ៏បង្ហូរឈាមមួយភ្លាមៗ បន្ទាប់ពីទទួលបានឯករាជ្យនៅឆ្នាំ២០១១ ដោយសារតតែអភិបាលកិច្ចទន់ខ្សោយ និងភាពតានតឹងជនជាតិភាគតិចដែលមានស្រាប់បានទម្លាក់រដ្ឋឯករាជ្យថ្មីទៅក្នុងភាពចលាចលនយោបាយ។ បន្ទាប់មកភាពតានតឹងបានផ្ទុះឡើងជាសង្គ្រាមស៊ីវិលក្នុងខែធ្នូ ឆ្នាំ ២០១៣ ដោយសារការតស៊ូនយោបាយរវាងប្រធានាធិបតី Salva Kiir និងអនុប្រធានាធិបតី Riek Macha ។

កងកម្លាំងចម្រុះគាំទ្រលោក Kiir ដែលជាជនជាតិ Dinka បានប្រយុទ្ធជាមួយអ្នកគាំទ្រលោក Machar ដែលជាជនជាតិ Nuer។ ជម្លោះនេះបានសម្លាប់មនុស្សជាង ៤០០០០ នាក់ មុនពេលកិច្ចព្រមព្រៀងសន្តិភាពឆ្នាំ ២០១៨ ដែលធ្វើឲ្យភាគីទាំងពីរបង្កើតរដ្ឋាភិបាលបង្រួបបង្រួមជាតិ៕