ព័ត៌មានអន្ដរជាតិ

គ្រាន់តែ១សប្តាហ៍ បាញ់សម្លាប់នៅទីសាធារណៈ២ដងនៅអាមេរិក លោក បៃដិនជំរុញសភាអនុម័តច្បាប់គ្រប់គ្រងអាវុធ

បានផុស

៤ years មុន

នៅ

ថ្ងៃពុធ ២៤ មីនា ២០២១

ដោយ

សហរដ្ឋអាមេរិកដែលល្បីជាបិតាប្រជាធិបតេយ្យលើលោកត្រូវបានគេមើលឃើញថាជារឿយៗមានការបាញ់ប្រហារសម្លាប់ពលរដ្ឋតាមទីសាធារណៈជាញឹកញាប់ ហើយរាល់ការបាញ់ប្រហារម្តងៗមនុស្សជាច្រើនបានស្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងគ្រាន់តែមួយសប្តាហ៍កន្លងទៅនេះមានការបាញ់ប្រហារពីរលើកបណ្តាលឲ្យជនរងគ្រោះបាត់បង់ជីវិតសរុប១៨នាក់។

សេតវិមានបាននិយាយនៅថ្ងៃអង្គារម្សិលមិញ មួយថៃបន្ទាប់ពីការបាញ់ប្រហារបណ្តាលឲ្យមនុស្សស្លាប់លើកទី២ក្នុងមួយសប្តាហ៍ថា លោកប្រធាធិបតីអាមេរិក ចូ បៃដិន បានជំរុញឲ្យសភាឲ្យពន្លឿនអនុម័តច្បាប់គ្រប់គ្រងអាវុធ និងប្រហែលជាចាត់វិធានការដោយខ្លួនលោកផ្ទាល់ដើម្បីបញ្ឈប់ហិង្សា។

អ្នកប្រជាធិបតេយ្យម្នាក់បានអំពាវនាវឲ្យព្រឹទ្ធសភាអនុម័តសេចក្តីព្រាងច្បាប់ចំនួនពីរដែលត្រូវបានអនុម័តដោយសភាតំណាងរាស្ត្រនៅថ្ងៃទី១១ ខែមីនា ដែលនឹងពង្រីកលើការត្រួតពិនិត្យទៅលើអ្នកទិញអាវុធ។ លោកក៏បានអំពាវនាវឲ្យហាមឃាតក្នុងការប្រើអាវុធបែបវាយប្រហារ។

លោក បៃដិន បាននិយាយនៅសេតវិមានកាលពីថ្ងៃអង្គារថា ៖«ខ្ញុំមិនត្រូវរង់ចាំ សូម្បីតែមួយនាទី ធ្វើតែម្នាក់ឯងមួយម៉ោង ដើម្បីចាត់វិធានការរួមដើម្បីសង្គ្រោះអាយុជីវិតនាពេលអនាគត ហើយខ្ញុំជំរុញឲ្យសហការីរបស់ខ្ញុំនៅសភា និងព្រឹទ្ធសភាធ្វើសកម្មភាព»។

អ្នកនាំពាក្យសេតវិមានអ្នកស្រី Jen Psaki បានប្រាប់អ្នកកាសែតថា លោក បៃដិន កំពុងពិចារណាលើស៊េរីនៃវិធានការអនុវត្តដើម្បីព្យាយាមបញ្ឈប់ហិង្សាដោយអាវុធ។ សកម្មភាពបែបនេះមិនតម្រូវឲ្យមានការយល់ព្រមពីសភាឡើយ។

លោក បៃដិន ដែលបានកាន់តំណែងប្រធានាធិបតីកាលពីខែមករា បានសន្យាក្នុងយុទ្ធនាការណ៍ឃោសនាបោះឆ្នោតជ្រើសរើសប្រធានាធិបតីរបស់លោកដើម្បីអនុម័តវិធានការសុវត្ថិភាពកាំភ្លើង ប៉ុន្តែលោកត្រូវចំណាយពេលប៉ុន្មានខែដំបូងលើរឿងវ៉ាក់សាំងចាក់ការពារកូវីដ-១៩។

កាលពីថ្ងៃចន្ទ ខ្មាន់កាំភ្លើងម្នាក់បានបាញ់សម្លាប់មនុស្ស១០នាក់នៅផ្សារទំនើប Colorado មួយកន្លែង ដែលករណីបាញ់សម្លាប់នេះទើបតែ៦ថ្ងៃ បន្ទាប់ពីមនុស្ស៨នាក់ត្រូវបានបាញ់សម្លាប់នៅតំបន់ Atlanta។

ការបាញ់សម្លាប់នៅទីសាធារណៈទាំងពីរនេះបានក្លាយជាសម្ពាធលើលោកប្រធានាធិបតី ចូ បៃដិន ឲ្យចាត់វិធានការតាមការសន្យារបស់លោក។

ក្រុមជួយសង្គ្រោះជនរងគ្រោះពីការបាញ់ប្រហារ

យោងតាមការស្រាវជ្រាវរបស់ RAND Corp បង្ហាញថា សហរដ្ឋអាមេរិកមានអត្រាជនស៊ីវិលកាន់កាំភ្លើងច្រើនជាងគេបំផុតក្នុងពិភពលោក និងអត្រាអ្នកស្លាប់ដោយកាំភ្លើងក៏ខ្ពស់ជាងបណ្តាប្រទេសអ្នកមានដែរ។

តាមប្រភពចងក្រងរបស់ Gun Violence Archive បង្ហាញថា អ្នកស្លាប់ដោយសារកាំភ្លើងបាញ់ប្រហារកាលពីឆ្នាំមុនគឺ៤៣០០០នាក់នៅសហរដ្ឋអាមេរិក៕

ប្រែសម្រួល៖ វីរបុត្រ
ប្រភព៖ Reuters