ហ្សេលេនស្គី ថា ពូទីន នឹងស្លាប់ឆាប់ៗ

អំឡុងពេលជួបជាមួយប្រធានាធិបតីបារាំង អេម៉ាញូអែល ម៉ាក្រុង ក្នុងទីក្រុងប៉ារីស កាលពីថ្ងៃពុធទី២៦ខែមីនឆ្នាំ២០២៥ មេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី បានបង្កការភ្ញាក់ផ្អើលយ៉ាងខ្លាំង ដោយលោកនិយាយថា​ ប្រធានាធិបតីរុស្ស៊ី វ្ល៉ាឌីមៀរ ពូទីន នឹងស្លាប់ក្នុងពេលឆាប់ៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail, លោកហ្សេលេនស្គី និយាយថា ពូទីន កំពុងព្យាយាមវាយបំបែកផ្ទៃក្នុងអឺរ៉ុប ដោយមានហុងគ្រីនៅខាងរុស្ស៊ីចាំជួយគាំទ្រ ប៉ុន្តែលោកពូទីន នឹងស្លាប់ឆាប់ៗ ហើយនោះគឺជាការពិត រឿងនឹងដល់ទីបញ្ចប់។

ទោះបីជាយ៉ាងណាក៏ដោយ គេមិនដឹងថា សម្តីរបស់លោកហ្សេលេនស្គី ចង់សំដៅទៅលើកត្តាអ្វីនោះទេ ដែលអាចឈានដល់ធ្វើឲ្យលោកពូទីនបាត់បង់ជីវិត ដ្បិតមួយរយៈចុងក្រោយនេះ មានពាក្យចចាមអារ៉ាមជុំវិញបញ្ហាសុខភាពរបស់មេដឹកនាំវិមានក្រឹមឡាំងក៏ដោយ។

សូមជម្រាបថា លោក ហ្សេលេនស្គី កំពុងស្ថិតនៅទីក្រុងប៉ារីសនៃប្រទេសបារាំង ដើម្បីជួបពិភាក្សាជាមួ​យលោក ម៉ាក្រុង ស្តីអំពីបទឈប់បាញ់នៅសមុទ្រខ្មៅ និងត្រៀមខ្លួនសម្រាប់កិច្ច​ប្រជុំ​កំពូល​សន្តិសុខ ដែលមាន​ការ​ចូលរួម​ពី​មេដឹកនាំអន្តរជាតិប្រមាណ៣០រូប ដោយផ្តោតលើការបង្កើនជំនួយដល់អ៊ុយក្រែន និងពិភាក្សាអំពីតួនាទីរបស់អឺរ៉ុបក្នុងការទប់ស្កាត់ការឈ្លានពានរបស់រុស្ស៊ីនាពេលអនាគត។

ក្នុងជំនួបនេះដែរ លោកម៉ាក្រុង បានប្រកាសផ្តល់ជំនួយយោធាទំហំទឹកប្រាក់ ២ពាន់លានអឺរ៉ូបន្ថែមទៀ​តដល់អ៊ុយក្រែន ក្នុងគោលបំណងពង្រឹងសមត្ថភាពការពាររបស់ទីក្រុង​កៀវ ។

កញ្ចប់ជំនួយ​ទាំង​នោះ រួមមាន៖

• មីស៊ីលប្រឆាំងរថក្រោះ៖ ការផ្តល់ប្រព័ន្ធមីស៊ីលប្រឆាំងរថក្រោះ MILAN ដើម្បីបង្កើនការការពារដីរបស់អ៊ុយក្រែនប្រឆាំងនឹងការគំរាមកំហែង​ពី​រថ​ពាសដែក​រុស្ស៊ី។
• ប្រព័ន្ធការពារអាកាស៖ ការផ្គត់ផ្គង់មីស៊ីល MICA ដើម្បីពង្រឹងសមត្ថភាពរបស់អ៊ុយក្រែនក្នុងការទប់ទល់នឹងការវាយប្រហារតាមអាកាស។
• រថពាសដែក៖ ការដឹកជញ្ជូនរថពាសដែកបន្ថែម ដើម្បីបង្កើនការចល័តទ័ព និងការការពារនៅលើសមរភូមិ។
• យន្តហោះគ្មានមនុស្សបើក៖ ការផ្តល់យានគ្មានមនុស្សបើកសម្រាប់ប្រតិបត្តិការឈ្លបយកការណ៍ និងយុទ្ធសាស្ត្រ។
• យន្តហោះចម្បាំង Mirage៖ យន្តហោះចម្បាំង Mirage ប្រើ​ដើម្បី​ពង្រឹងសមត្ថភាពទ័ពអាកាសរបស់អ៊ុយក្រែន៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី សង្ឃឹមថា ត្រាំ មិនទន់ចិត្ត ដកទណ្ឌកម្មពីរុស្ស៊ី តាមការទាមទាររបស់ ពូទីន