ព័ត៌មានអន្ដរជាតិ

រូបភាពរលំបាក់អគារគួររន្ធត់នៅថៃ ប៉ុន្តែអាជ្ញាធរបញ្ជាក់ថា ចំនួនអ្នកស្លាប់មាន៩នាក់ដល់ពេលនេះ

បានផុស

២ ថ្ងៃ មុន

នៅ

ថ្ងៃសុក្រ ២៨ មីនា ២០២៥

ដោយ

ថ្វីត្បិតតែរូបភាពនៃការរលំបាក់អគារដ៏ស្កឹមស្កៃកម្ពស់ជាង៣០ជាន់ហាក់បង្កក្តីរន្ធត់ខ្លាំងនិងមានការបារម្ភពីការស្លាប់មនុស្សច្រើនក្នុងអគារនោះ អាជ្ញាធរថៃបានបញ្ជាក់នៅរាត្រីថ្ងៃសុក្រថា មានអ្នកស្លាប់យ៉ាងហោចណាស់៩នាក់ ខណៈអាជ្ញាធរកំពុងបន្តប្រតិបត្តិការសង្គ្រោះ។

នាយករដ្ឋមន្ត្រី ផែថងថាន ស៊ីណាវ៉ាត្រា ចុះទៅពិនិត្យកន្លែងរលំបាក់អគារ។ Ing Shinawatra

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងហោចណាស់មនុស្សប្រាំបួននាក់បានស្លាប់នៅក្នុងទីក្រុងបាងកក មន្ត្រីថៃនិយាយថា «យើងក៏កំពុងទទួលបានចំនួនចុងក្រោយបង្អស់ផងដែរ ពីក្រោយការរញ្ជួយដីនៅទីក្រុងបាងកក»។

អភិបាលរងក្រុងបាងកក លោក Tavida Kamolvej និយាយថា យ៉ាងហោចណាស់មនុស្ស ៩នាក់បានស្លាប់ដោយសារការរញ្ជួយដីនៅក្នុងរដ្ឋធានីថៃ។

ក្នុងចំនួននោះ មាន៨នាក់បានស្លាប់នៅពេលដែលអគារដែលកំពុងសាងសង់បានបាក់រលំ និងម្នាក់ទៀតស្លាប់នៅកន្លែងផ្សេង។

នៅវេលាម៉ោង ១:២០នាទី រសៀលថ្ងៃទី២៨ មីនានេះ ហេតុការណ៍គ្រោះរញ្ជួយដីកម្រិត៧,៧រ៉ិចទ័រមាន ជម្រៅ១០គីឡូម៉ែត្រ នៅកម្រិត 96.12°E 22.07°N កើតឡើងនៅក្នុងប្រទេសមីយ៉ាន់ម៉ា ហើយរញ្ជួយដីដ៏ខ្លាំងនេះបានជះឥទ្ធិពលដល់ប្រទេសថៃ។

ក្នុងការទទួលរងឥទ្ធិពលនោះ អគាខ្ពស់មួយចំនួនក្នុងក្រុងបាងកក និងអគារវិមានរដ្ឋាភិបាល វិមានរដ្ឋសភា ញ័ររង្គើ ហើយអគារកម្ពស់ប្រមាណ៣០ជាន់កំពុងសាងសង់មួយកន្លែងនៅក្នុងតំបន់ចតុចក្រ (ក្រុងបាងកក) បានបាក់រលំ ខណៈដែលកម្មករកំពុងបំពេញការងារនៅឡើយ។

នាយករដ្ឋមន្ត្រីថៃ ផែថងថាន ស៊ីណាវ៉ាត្រា បានដឹកនាំមន្ត្រីរដ្ឋាភិបាលខ្លួនចុះទៅទីតាំងរលំបាក់អគារនោះទាំងយប់ បន្ទាប់ពីបានធ្វើដំណើរត្រឡប់មកវិញជាបន្ទាន់ពីដំណើរទស្សនកិច្ចទៅកាន់ខេត្តភូកេត។

បន្ទាប់ពីកិច្ចប្រជុំបន្ទាន់ដំបូងដើម្បីផ្តល់ការណែនាំនោះ លោកស្រីនាយករដ្ឋមន្ត្រីបានអំពាវនាវឲ្យមានកិច្ចប្រជុំបន្ទាន់មួយទៀតនៃស្ថាប័នពាក់ព័ន្ធទាំងអស់ ដើម្បីទទួលបានរបាយការណ៍លម្អិត៕

ដោយ រ៉ាន់ រើយ