ត្រាំ ប្រកាសក្តែងៗថា អាមេរិក ​នឹងយកបាន Greenland ១០០%

ប្រមុខសេតវិមានលោក ដូណាល់ ត្រាំ ប្រកាសក្តែងៗថា សហរដ្ឋអាមេរិក នឹងដណ្តើមយកការគ្រប់គ្រងកោះ Greenland បាន១០០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអះអាងបែបនេះ ក្នុងអំឡុងផ្តល់បទសម្ភាសជាមួយសារព័ត៌មាន NBC News កាលពីថ្ងៃអាទិត្យទី៣០ខែមីនាឆ្នាំ២០២៥ ហើយក្នុងអំឡុងពេលនោះ ប្រធានាធិបតីអាមេរិក ក៏បញ្ជាក់ដែរថា លោកពិភាក្សាគ្នាអំពីផែនការកាត់យកដែនដីស្វយ័តរបស់ដាណឺម៉ាក មួយនេះរួចរាល់អស់ហើយ។

លោក ត្រាំ លើកឡើងថា «យើងនឹងយក Greenland! មែនហើយគឺ១០០%។ យើងមានលទ្ធភាពយកវាបានទាំងមិនចាំបាច់ប្រើកម្លាំងយោធា។ យ៉ាងណា យើងនៅតែរក្សាជម្រើសគ្រប់បែបយ៉ាង។ ការកាត់យក Greenland គឺជាបញ្ហានៃសន្តិភាពអន្តរជាតិនិង សន្តិសុខនិងកម្លាំងអន្តរជាតិ។ ខ្ញុំមិនខ្វល់ពីប្រតិកម្មឬពិភពលោកគិតបែបណានោះទេ»។

ការអះអាងរបស់លោក ត្រាំ កើតឡើងបន្ទាប់ពីអនុប្រធានាធិបតីអាមេរិក JD Vance ធ្វើទស្សនកិច្ចនៅ Greenland ដែលជាដំណើរមួយបង្កឲ្យមានភាពចម្រូងចម្រាសយ៉ាងខ្លាំង ហើយដំណើរនេះត្រូវគេមើល​ឃើញ​ថា ​ជា​ផ្នែក​មួយ​នៃ​យុទ្ធសាស្ត្រ​មេរបស់​សហរដ្ឋអាមេរិក ​ដើម្បី​អះអាង​ពី​ផលប្រយោជន៍​របស់​ខ្លួន​នៅ​ក្នុង​តំបន់​អាក់ទិក។

ទោះយ៉ាងណា ជុំវិញរឿង Greenland នេះដែរ ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានព្រមានឲ្យត្រាំ ប្រយ័ត្នប្រយែងចំពោះផែនការនៅទីនោះ ព្រោះថា វាក៏ជាទីតាំងយុទ្ធសាស្រ្តរបស់រុស្ស៊ី។

ថ្លែងនៅឯវេទិកាអាកទិកអន្តរជាតិក្នុងទីក្រុង Murmansk កាលពីសប្តាហ៍មុន លោកពូទីនគូសបញ្ជាក់ថា សហរដ្ឋអាមេរិកចាប់អារម្មណ៍ Greenland យូរហើយ ជាពិសេសការប៉ុនប៉ងជាប្រវត្តិសាស្ត្រដើម្បីគ្រប់គ្រងទឹកដីនោះ តាំងពីសតវត្សទី១៩និងក្រោយសង្គ្រាមលោកលើកទីពីរ។ ចេតនា​អាមេរិក​បច្ចុប្បន្ន​ក្រោម​ការ​ដឹកនាំ​របស់​លោក ត្រាំ គឺ​ច្បាស់ៗ ហើយ​មិន​មែន​គ្រាន់​តែ​ជា​វោហាសាស្ត្រ​ទេ។

សូមជម្រាបថា Greenland មានប្រជាជន​​​​​​ប្រមាណ​​៥៦ ០០០​នាក់ដែលស្ថិតនៅចន្លោះមហាសមុទ្រអាកទិកនិងអាត្លង់ទិក ត្រូវប្រទេសដាណឺម៉ាកកាន់កាប់អស់រយៈពេលប្រហែល៣០០ឆ្នាំមកហើយ។ ដែនកោះនេះ គ្រប់គ្រងកិច្ចការក្នុងស្រុកផ្ទាល់ខ្លួន ប៉ុន្តែរដ្ឋាភិបាលទីក្រុងកូប៉ិនហាក គឺជាអ្នកសម្រេចលើកិច្ចការគោលនយោបាយការបរទេសនិងការពារជាតិ៕

អត្ថបទ៖ សុខ សុវណ្ណ

ចុចអាន៖ ពូទីន ព្រមានខ្លាំងៗទៅ ត្រាំ រឿងកោះ Greenland