ព័ត៌មានអន្ដរជាតិ
ក្លិនសាកសពស្អុយរលួយ សាយភាយក្នុងទីក្រុង Mandalay ខណៈតួលេខមនុស្សស្លាប់ នឹងហក់ឡើងខ្ពស់
គ្រោះរញ្ជួយដីកម្រិតធ្ងន់ ៧.៧រ៉ិចទ័របានវាយប្រហារប្រទេសមីយ៉ាន់ម៉ា យ៉ាងដំណំកាលពីថ្ងៃសុក្រទី២៨ខែមីនាឆ្នាំ២០២៥ សម្លាប់មនុស្សរាប់ពាន់នាក់ ខណៈពេលនេះ ក្រុមរុករកនៅតែបន្តធ្វើប្រតិបត្តិការជួយសង្គ្រោះនិងស្វែងរកមនុស្សបន្ថែមទៀត ទាំងដែលក្លិនសាកសពស្អុយរលួយ កំពុងសាយភាយនៅក្នុងទីក្រុងធំលំដាប់ទី២របស់មីយ៉ាន់ម៉ា គឺ Mandalay។

គិតត្រឹមថ្ងៃទី៣១ខែមីនាឆ្នាំ២០២៥ ចំនួនអ្នកស្លាប់ដោយសារគ្រោះរញ្ជួយដីកម្រិត ៧,៧រិចទ័រ ដែលវាយប្រហារប្រទេសមីយ៉ាន់ម៉ាកាលពីថ្ងៃសុក្រសប្ដាហ៍មុន បានកើនឡើងដល់ប្រមាណ ២ ៩៤០នាក់ និងរបួសជាង ៣ ៤០០នាក់។ នេះបើយោងតាមការចុះផ្សាយរបស់សមាគមសំឡេងប្រជាធិបតេយ្យភូមា ខណៈរបាយការណ៍ពីរបបសឹកយោធា បានបង្ហាញតួលេខអ្នកស្លាប់ចំនួន ១ ៦៤៤នាក់ គិតត្រឹមថ្ងៃទី៣០ខែមីនា។
ទោះបីជាយ៉ាងណាក៏ដោយ ក្រុមជួយសង្គ្រោះព្រមានថា តួលេខមនុស្សស្លាប់អាចហក់ឡើងខ្ពស់ទៀត ព្រោះមានមនុស្សច្រើននៅជាប់ក្រោមគំនរអគារបាក់រលំ ចំណែកអ្នកខ្លះអាចបាត់បង់ជីវិតនៅតាមតំបន់ឆ្ងាយៗពិបាកទៅដល់។ ណាមួយ ដោយសារតែប្រទេសនេះញាំញីដោយសង្គ្រាម ទើបធ្វើឲ្យប្រតិបត្តិការសង្គ្រោះត្រូវជួបឧបសគ្គ។

ពេលដែលកើតរញ្ជួយដីដំបូង មិនទាន់មានជំនួយពីបរទេសឡើយ ដូច្នេះក្រុមសង្គ្រោះក្នុងស្រុកត្រូវបង្ខំចិត្តពុះពារធ្វើប្រតិបត្តិការយ៉ាងលំបាក ដោយអ្នកខ្លះត្រូវប្រើដៃទទេ ដើម្បីរើដុំថ្មជួយសង្គ្រោះមនុស្ស។
អ្នកក្រុង Mandalay ត្រូវរងទុក្ខដោយសារតែគ្រោះមហន្តរាយដ៏អាក្រក់នេះ។ ពួកគេត្រូវបង្ខំចិត្តដេកហាលខ្យល់នៅខាងក្រៅ ហើយត្រូវស៊ូទ្រាំនឹងក្លិនសាកសពស្អុយរលួយសាយភាយពេញផ្លូវ។

សូមជម្រាបថា ជំនួយអន្តរជាតិកំពុងចាប់ផ្តើមដឹកទៅដល់មីយ៉ាន់ម៉ា ដោយប្រទេសមួយចំនួន ដូចជា ឥណ្ឌា ចិន ថៃ ម៉ាឡេស៊ី សិង្ហបុរី និងរុស្ស៊ី បានបញ្ជូនក្រុមជួយសង្គ្រោះ និងការផ្គត់ផ្គង់។
ចំណែកសហរដ្ឋអាមេរិក បានសន្យាផ្តល់ជំនួយទឹកនប្រាក់ ២លានដុល្លារ។ ទោះបីជាយ៉ាងណាក៏ដោយ តំបន់ជាច្រើននៅតែរាយការណ៍ពីការខ្វះខាតស្បៀងអាហារ ទឹក និងការផ្គត់ផ្គង់ផ្នែកវេជ្ជសាស្រ្ត៕
អត្ថបទ៖ សុខ សុវណ្ណ
ចុចអាន៖ តួលេខអ្នកស្លាប់នៅមីយ៉ាន់ម៉ា កើនឡើងជិត ៣ ០០០នាក់ហើយ ព្រោះគ្រោះរញ្ជួយដី

-
ព័ត៌មានអន្ដរជាតិ៤ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម៥ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ១ សប្តាហ៍ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ៤ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៧ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
សន្តិសុខសង្គម១៣ ម៉ោង ago
នគរបាលឡោមព័ទ្ធខុនដូមួយកន្លែងទាំងយប់ ឃាត់ជនបរទេសប្រុសស្រីជាង ១០០នាក់
-
សន្តិសុខសង្គម៤ ថ្ងៃ ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
ព័ត៌មានអន្ដរជាតិ២ ថ្ងៃ ago
កើតក្តីបារម្ភបាក់ទំនប់វារីអគ្គិសនីនៅថៃ ក្រោយរញ្ជួយដី