ថៃ រកឃើញសពមនុស្ស ៦នាក់ទៀត នៅក្នុងគំនរអគារបាក់រលំ

ក្រុមរុករកបានសន្មត់ថា ពួកគេរកឃើញសាកសពមនុស្សបន្ថែម៦នាក់ទៀតជាប់នៅក្នុងគំនរអគារសវនកម្មដែលបាក់រលំដោយសារឥទ្ធិពលនៃគ្រោះរញ្ជួយដីកម្រិត៧.៧រ៉ិចទ័រជះពីប្រទេសមីយ៉ាន់ម៉ា។ នេះបើយោងតាមការចុះផ្សាយរបស់ The Nation នៅថ្ងៃអង្គារទី១ខែមេសាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុដែលក្រុមរុករកហ៊ានសន្មត់បែបនេះគឺដោយសារតែ ការស្កេន X-Ray នៅ Zone A និង​ Zone C របស់អគារបង្ហាញថា អ្នកទាំងនោះមិនធ្វើចលនាអ្វីសោះហើយគ្មានសញ្ញានៃជីវិតឡើយ ពោលពួកគេគឺជាសាកសព។

តាមការបញ្ជាក់ពីអភិបាលរងក្រុងបាងកកអ្នកស្រី Tavida Kamolvej, អ្វីដែលគេចាប់សញ្ញាឃើញ គឺមិនមានចលនាឡើយ ហើយក៏មិនទាន់ដឹងច្បាស់ដែរថាតើ ពួកគេត្រូវជាប់ក្រោមគំនរអគារនៅជម្រៅជ្រៅប៉ុនណា។

ដោយមិនទាន់រាប់បញ្ចូលទាំងតួលេខថ្មីនេះ, ចំនួនមនុស្សស្លាប់ដោយសារបាក់រលំអគារសវនកម្មក្នុងខណ្ឌចតុចក្រនៃទីក្រុងបាកក បានកើនឡើងដល់១៣នាក់ហើយ ខណៈ៩នាក់រងរបួសនិង៧៣នាក់រកមិនទាន់ឃើញ។

នៅប្រទេសមីយ៉ាន់ម៉ាឯណោះ ចំនួនមនុស្សស្លាប់ដោយសារការរញ្ជួយដីដ៏ខ្លាំងក្លា បានកើនឡើងដល់ ៣ ០៣៤​នាក់ហើយ បន្ទាប់​ពី​សាកសពចំនួន ១ ៨០៧​នាក់ ត្រូវ​បាន​យក​ចេញពីគំនរបាក់បែកនៃអគារដែលដួលរលំនៅទីក្រុង Mandalay។

ប្រទេសមីយ៉ាន់ម៉ា បានប្រកាសកាន់ទុក្ខថ្នាក់ជាតិរយៈពេល១សប្តាហ៍ ពោលគឺរហូតដល់ថ្ងៃទី៦ខែមេសា ដោយទង់ជាតិត្រូវបង្ហូតពាក់កណ្តាលដង។

របបយោធាក៏ប្រកាសដែរថា នៅថ្ងៃអង្គារទី១ខែមេសា នឹងមានការស្មិងស្មាធិ៍រយៈពេល១នាទី ដើម្បីរម្លឹកឧទ្ទិសដល់វិញ្ញាណក្ខន្ធជនរងគ្រោះដែលបាត់បង់ជីវិត ដោយគ្រោះរញ្ជួយដីដ៏សាហាវនេះ៕

អត្ថបទ៖ សុខ សុវណ្ណ

ចុចអាន៖ មីយ៉ាន់ម៉ា កាន់ទុក្ខមួយសប្តាហ៍ ខណៈរកឃើញមនុស្សស្លាប់ដោយរញ្ជួយដី ច្រើនឡើងៗ