ព័ត៌មានអន្ដរជាតិ

អ៊ីរ៉ង់ ព្រមានថានឹងផលិតអាវុធនុយក្លេអ៊ែរ បើត្រូវអាមេរិកវាយប្រហារមែន

បានផុស

២០ វិនាទី មុន

នៅ

ថ្ងៃអង្គារ ១ មេសា ២០២៥

ដោយ

Chheang

លោក Ali Larijani ទីប្រឹក្សាជាន់ខ្ពស់របស់មេដឹកនាំកំពូលអ៊ីរ៉ង់ បានព្រមានថា ប្រទេសរបស់លោកអាចពិចារណាផលិតអាវុធនុយក្លេអ៊ែរ បើត្រូវវាយប្រហារដោយសហរដ្ឋអាមេរិក ឬសម្ព័ន្ធមិត្តរបស់អាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Larijani បានប្រាប់ទូរទស្សន៍រដ្ឋកាលពីថ្ងៃចន្ទទី៣១ខែមីនាឆ្នាំ២០២៥ថា៖ «យើងមិនឆ្ពោះទៅរកអាវុធនុយក្លេអ៊ែរទេ ប៉ុន្តែបើអ្នកធ្វើអ្វីខុសក្នុងបញ្ហានុយក្លេអ៊ែរអ៊ីរ៉ង់ អ្នកនឹងបង្ខំឲ្យអ៊ីរ៉ង់ឆ្ពោះទៅរករឿងនោះ ព្រោះយើងត្រូវតែការពារខ្លួន»។

លោកបានបន្ថែមថា៖ «អ៊ីរ៉ង់មិនចង់ធ្វើបែបនេះទេ ប៉ុន្តែវានឹងគ្មានជម្រើសផ្សេងទៀតឡើយ»។

ការលើកឡើងរបស់មន្ត្រីជាន់ខ្ពស់របស់លោក Ayatollah Khamenei ធ្វើឡើងបន្ទាប់ពីការព្រមានរបស់ប្រធានាធិបតីអាមេរិក លោក ដូណាល់ ត្រាំ ជុំវិញការប្រើកម្លាំងយោធា បើអ៊ីរ៉ង់មិនយល់ព្រមធ្វើកិច្ចព្រមព្រៀងនុយក្លេអ៊ែរ។ កាលពីថ្ងៃទី៣០ខែមីនា លោក ត្រាំ បាននិយាយថា៖ «បើពួកគេមិនធ្វើកិច្ចព្រមព្រៀងទេ វានឹងមានការទម្លាក់គ្រាប់បែក។ វានឹងក្លាយជាការទម្លាក់គ្រាប់បែកមិនដូចអ្វីដែលពួកគេធ្លាប់ឃើញពីមុនមកទេ»។

ក្រោយត្រូវលោក ត្រាំ ព្រមាន អ៊ីរ៉ង់បានបញ្ចេញមីស៊ីលក្រោមដីរបស់ខ្លួន ត្រៀមទប់ទល់នឹងការវាយប្រហារពីអាមេរិក។ មន្ត្រីអ៊ីរ៉ង់ បានចេញផ្សាយវីដេអូជាច្រើនដែលរៀបរាប់លម្អិតអំពីលេណដ្ឋានក្រោមដីដែលមានកម្លាំងខ្លាំង និងបំពាក់ដោយប្រព័ន្ធការពារ ព្រមទាំងអាវុធដូចជា មីស៊ីល Kheibar Shekan (រយៈចម្ងាយ៩០០ម៉ាយ), Haj Qassem (៨៥០ម៉ាយ), Ghadr-H (១ ២៤០ម៉ាយ), Sejjil (១ ៥៥០ម៉ាយ), និង Emad (១ ០៥០ម៉ាយ)។

ប្រធានាធិបតីអ៊ីរ៉ង់លោក Masoud Pezeshkian បាននិយាយថា សាធារណរដ្ឋអ៊ីស្លាមនឹងមិនចូលរួមការចរចាដោយផ្ទាល់ជាមួយសហរដ្ឋអាមេរិក ជុំវិញកម្មវិធីនុយក្លេអ៊ែររបស់ខ្លួនឡើយ។ ចំណែកឯមេដឹកនាំកំពូលរបស់អ៊ីរ៉ង់ បានព្រមានថា អាមេរិកនឹងប្រឈមមុខនឹងការសងសឹកយ៉ាងខ្លាំងក្លា បើមហាអំណាចលើពិភពលោកមួយនេះហ៊ានប្រើសកម្មភាពយោធា៕

ដោយ៖ ឈាង

ចុចអាន៖ អ៊ីរ៉ង់ តម្រង់ក្បាលមីស៊ីលរបស់ខ្លួនទៅលើមេឃ ក្រោយ ត្រាំ គំរាមទម្លាក់គ្រាប់បែក