ត្រឹមមួយថ្ងៃដើមខែមេសា ប្រទេសអាស៊ីអាគ្នេយ៍ចំនួន៣ កើតគ្រោះអគ្គិភ័យរន្ធត់ដំណាលគ្នា

បើកទំព័រឆ្នាំ២០២៥មិនទាន់បានពាក់កណ្តាលផ្លូវស្រួលបួលផង ពិភពលោកបានជួបគ្រោះផ្ទួនៗដូចជាធ្លាក់យន្តហោះនិងគ្រោះធម្មជាតិជាដើម ប៉ុន្តែអ្វីដែលគេនឹកស្មានមិនដល់នោះគឺថា គ្រាន់តែចូលខែមេសាភ្លាម មានករណីអគ្គិភ័យដ៏រន្ធត់កើតឡើងក្នុងប្រទេសអាស៊ីអាគ្នេយ៍ចំនួន៣ដំណាលគ្នា ក្នុងនោះមានទាំងកម្ពុជាផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. កម្ពុជា

អគ្គិភ័យបានឆាបឆេះរោងចក្រមួយកន្លែងយ៉ាងសន្ធោសន្ធៅនាវេលាម៉ោង១០ព្រឹក តាមបណ្ដោយផ្លូវជាតិលេខ៤ ទល់មុខស្ថានីយប្រេងឥន្ទនៈ PTT ចន្លោះគីឡូម៉ែត្រ​លេខ ​២៧​-២៨ ក្នុងស្រុក​អង្គ​ស្នួល​ ខេត្ត​កណ្ដាល​។ ករណីនេះត្រូវបានកម្លាំងជំនាញបង្ការ និងពន្លត់អគ្គិភ័យជាច្រើនអង្គភាពចេញអន្តរាគមន៍ភ្លាមៗរហូតគ្រប់គ្រងស្ថានការណ៍បានទាំងស្រុង។

បើតាមការឲ្យដឹងពីលោកឧត្ដមសេនីយ៍ឯក នេត វន្ថា ប្រធាននាយកដ្ឋានបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ, រោងចក្រដែលត្រូវអគ្គិភ័យឆាបឆេះនេះ គឺជារោងចក្រផលិតជាតិស្នោ និងជ័រ។ លោកបន្ថែមថា ករណីនេះបណ្ដាលឲ្យឆេះរោងចក្រចំនួន២អគារទាំងស្រុង រួមទាំងសម្ភារៈមួយចំនួនធំ។

២. ម៉ាឡេស៊ី

ករណី​អគ្គិភ័យដ៏ធំមួយ បានកើត​ឡើង​បន្ទាប់​ពី​ការផ្ទុះ​​ឆេះ​​បំពង់បង្ហូរឧស្ម័ននៅ​សង្កាត់​ Putra Heights ទីក្រុង Subang Jaya ក្នុង​ប្រទេស​ម៉ាឡេស៊ី ខណៈអណ្តាតភ្លើងបាន​រាលដាលដល់តំបន់លំនៅដ្ឋានក្បែរនោះ របួសមនុស្ស២៥នាក់។ អគ្គិភ័យ​នេះ បង្កឡើងដោយការលេចធ្លាយបំពង់បង្ហូរឧស្ម័ន​ដែល​មាន​ប្រវែង​​ប្រហែល​៥០០​ម៉ែត្រនៅ​តំបន់ Jalan Putra Harmoni នាវេលាម៉ោង ៨​និង​១០​ព្រឹក។

៣. ថៃ

ទូកទេសចរណ៍មួយគ្រឿង មានដឹកភ្ញៀវនិងនាវិកសរុប៣៦នាក់ បានឆាបឆេះក្បែរកោះ Maiton នៃសមុទ្រភូកេតនាវេលាម៉ោង៩ព្រឹក ប៉ុន្តែជាសំណាងល្អ មិនមានមនុស្សបាត់បង់ជីវិតទេ គ្រាន់តែរបួស៦នាក់ ខណៈអ្នកខ្លះលោតចុះពីទូកហែលទៅគោក។ ទូក Thana Marine 555 បានចេញពីផែ Tha Chalong ក្នុងដំណើរឆ្ពោះទៅកោះ Mai Thon ហើយក៏ជួបបញ្ហាម៉ាស៊ីន បណ្តាលឲ្យឆាបឆេះតែម្តង៕

អត្ថបទ៖ សុខ សុវណ្ណ

ចុចអាន៖ ទូកទេសចរណ៍ផ្ទុកមនុស្ស ៣៦នាក់ ផ្ទុះឆេះនៅ ថៃ