ព័ត៌មានអន្ដរជាតិ

របបសឹកមីយ៉ាន់ម៉ា ប្រកាសបទឈប់បាញ់បណ្ដោះអាសន្ន ព្រោះគ្រោះរញ្ជួយដី

បានផុស

២៨ នាទីutes មុន

នៅ

ថ្ងៃព្រហស្បតិ៍ ៣ មេសា ២០២៥

ដោយ

Chheang

ដើម្បីឆ្លើយតបទៅនឹងគ្រោះរញ្ជួយដីកម្រិត៧,៧រ៉ិចទ័រដែលបានវាយប្រហារប្រទេសមីយ៉ាន់ម៉ាកាលពីថ្ងៃទី២៨ខែមីនា របបសឹកយោធាបានប្រកាសបទឈប់បាញ់ជាបណ្តោះអាសន្ន ដើម្បីសម្រួលដល់ប្រតិបត្តិការជួយសង្គ្រោះ។

សកម្មភាពជួយសង្គ្រោះក្រោយគ្រោះរញ្ជួយដីនៅមីយ៉ាន់ម៉ា (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទឈប់បាញ់ នឹងត្រូវបានអនុវត្តរហូតដល់ថ្ងៃទី២២ខែមេសា ក្នុងគោលបំណងផ្តល់បរិយាកាសសុវត្ថិភាពជាងមុន សម្រាប់កិច្ចខិតខំប្រឹងប្រែងមនុស្សធម៌នៅក្នុងតំបន់ដែលរងផលប៉ះពាល់ ខណៈតួលេខអ្នកស្លាប់កើនឡើងដល់ជិត ៤ ០០០នាក់ និងមនុស្សរាប់ម៉ឺននាក់បាត់បង់ផ្ទះសម្បែងរស់នៅ។

សេចក្ដីថ្លែងការណ៍របស់របបសឹក ធ្វើឡើងបន្ទាប់ពីមានប្រកាសស្រដៀងគ្នាពីបណ្ដាក្រុមប្រដាប់អាវុធនៅក្នុងប្រទេសមីយ៉ាន់ម៉ាស្ដីពីបទឈប់បាញ់ជាផ្នែកឯកតោភាគី។

របបសឹក បាននិយាយថា វិធានការនេះមាន «គោលបំណងពន្លឿនកិច្ចខិតខំប្រឹងប្រែងសង្គ្រោះ និងការកសាងឡើងវិញ និងការរក្សាសន្តិភាព និងស្ថិរភាព» ប៉ុន្តែបានព្រមានដល់គូប្រជែងថា ខ្លួននឹងធ្វើការវាយបកទៅនឹងការវាយប្រហារ សកម្មភាពបំផ្លិចបំផ្លាញ ឬ «ការប្រមូលផ្តុំ ការរៀបចំ និងការពង្រីកទឹកដីដែលនឹងធ្វើឲ្យខូចដល់សន្តិភាព»។

ទីភ្នាក់ងារអង្គការសហប្រជាជាតិ ក្រុមសិទ្ធិមនុស្ស និងរដ្ឋាភិបាលបរទេស បានជំរុញឲ្យភាគីទាំងអស់នៅក្នុងសង្គ្រាមស៊ីវិលរបស់មីយ៉ាន់ម៉ា បញ្ឈប់ការប្រយុទ្ធគ្នា ហើយផ្តោតលើការជួយអ្នកដែលរងផលប៉ះពាល់ដោយការរញ្ជួយដី ដែលជាគ្រោះធម្មជាតិដ៏ធំបំផុតមិនមានក្នុងរយៈពេលជាច្រើនទសវត្សរ៍មកនេះ។

ទន្ទឹមនឹងការប្រកាសបទឈប់បាញ់ របបសឹកបានឲ្យដឹងថា ប្រមុខយោធាលោក Min Aung Hlaing នឹងធ្វើដំណើរទៅកាន់ទីក្រុងបាងកកនៅថ្ងៃព្រហស្បតិ៍នេះ សម្រាប់កិច្ចប្រជុំកំពូលនៃបណ្តាប្រទេសអាស៊ីខាងត្បូង ដែលក្នុងនោះមានទាំងប្រទេសមីយ៉ាន់ម៉ា និងប្រទេសថៃ ជាកន្លែងដែលលោកនឹងពិភាក្សាអំពីដំណោះស្រាយចំពោះគ្រោះរញ្ជួយដី៕