ព័ត៌មានអន្ដរជាតិ

ក្រុមជួយសង្គ្រោះនៅថៃ សម្រុកជួយខ្លាំង ពេលឮសម្រែក «ជួយផងៗ!»

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ៣ មេសា ២០២៥

ដោយ

ក្រុមជួយសង្គ្រោះក្នុងប្រទេសថៃប្រមាណ៤៨នាក់ប្រញាប់ប្រញាល់ចូលជួយសង្គ្រោះនៅទីតាំងបាក់រលំអគារកម្ពស់ជាង៣០ជាន់ បន្ទាប់ពីបានឮសំឡេងស្រែកឱ្យជួយពីក្រោមគំនរអគារដួលរលំដោយឥទ្ធិពលនៃការរញ្ជួយដីដែលបានវាយប្រហារក្នុងប្រទេសមីយ៉ាន់ម៉ា។

ក្រុមជួយសង្គ្រោះសម្រុកជួយជនរងគ្រោះ ក្រោយឮសម្រែកស្រែកឲ្យជួយ។ Khaosod

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានថៃ Khaosod បានរាយការណ៍ថា ក្រុមជួយក្រុមសង្គ្រោះបានប្រញាប់ប្រញាល់បញ្ជូនក្រុមការងារប្រមាណ៤៨នាក់ដើម្បីចូលជួយសង្គ្រោះ បន្ទាប់ពីបានឮសំឡេងស្រែកស្រដៀងនឹងពាក្យ «ជួយផងៗ» ចេញពីក្រោមអគារដួលរលំដោយការរញ្ជួយដីកាលពីថ្ងៃទី២៨ខែមីនាក្នុងទីក្រុងបាងកក។

នៅយប់ឈានចូលថ្ងៃទី៣ខែមេសាឆ្នាំ២០២៥នេះ មានសេចក្តីរាយការណ៍ថា មជ្ឈមណ្ឌលប្រតិបត្តិការជួយសង្គ្រោះមួយក្រុមបានប្រញាប់ប្រញាល់បញ្ជូនក្រុមការងាររបស់ខ្លួនចូលជួយរុករកអ្នករងគ្រោះនៅក្រោមអគារដែលដួលរលំដោយការរញ្ជួយដី បន្ទាប់ពីបានឮសំឡេងស្រែកចេញពីតំបន់ B។

សេចក្តីរាយការណ៍នោះ បានបន្តថា ភ្លាមៗនោះ បុគ្គលិកជួយសង្គ្រោះក៏បានបញ្ជាក្រុមការងារនៅខាងក្រៅឱ្យបញ្ឈប់សកម្មភាព និងកុំឱ្យមានសម្លេងប្រមាណជាង១០នាទី បន្ទាប់ពីបានឮសម្លេងឆ្លើយតបពីអ្នករងគ្រោះជាប់នៅក្រោមអគារដែលដួលរលំ ជាសំឡេងស្រដៀងនឹងពាក្យ «ជួយផងៗ»។

បន្ទាប់មកក៏ប្រញាប់ប្រញាល់បញ្ជូនក្រុមជួយសង្គ្រោះមកពីអង្គភាពជាច្រើនសរុបប្រមាណ៤៨នាក់ចូលទៅកាន់នៅចំណុចដែលបានឮសំឡេងទាំងនោះ ដើម្បីបើកផ្លូវចូលត្រួតពិនិត្យនិងជួយសង្គ្រោះ ដោយរំពឹងថា មានអ្នកនៅរស់រានមានជីវិតនៅឡើយ។

ប្រទេសថៃទទួលរងឥទ្ធិពលធ្ងន់ធ្ងរជាងគេបន្ទាប់ពីប្រទេសមីយ៉ាន់ម៉ា។ តាមរបាយការណ៍ យ៉ាងហោចណាស់មនុស្ស ១៩ នាក់បានស្លាប់ ប្រហែល៧០នាក់នៅតែបាត់ខ្លួន និង ១៥នាក់ផ្សេងទៀតត្រូវបានបញ្ជាក់ថាស្លាប់ បន្ទាប់ពីការដួលរលំនៃអគារខ្ពស់នៅទីក្រុងបាងកក។ ប្រតិបត្តិការជួយសង្គ្រោះកំពុងបន្តនៅឡើយ ហើយតួលេខទាំងនេះអាចផ្លាស់ប្តូរនៅពេលដែលកិច្ចខិតខំប្រឹងប្រែងនៅតែបន្ត៕

ភ្នាក់ងារ