ព័ត៌មានអន្ដរជាតិ

ហ្វីលីពីន៖ ការទិញ F-16 ពីអាមេរិក មិនមែនទុកសម្រាប់គំរាមប្រទេសណាមួយទេ

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ៣ មេសា ២០២៥

ដោយ

Chheang

រដ្ឋាភិបាលហ្វីលីពីន បានឲ្យដឹងនៅថ្ងៃទី៣ខែមេសាឆ្នាំ២០២៥នេះថា ការទិញយន្តហោះចម្បាំង F-16 ចំនួន ២០គ្រឿងពីសហរដ្ឋអាមេរិក គឺជាផ្នែកមួយនៃកិច្ចខិតខំប្រឹងប្រែងទំនើបកម្មយោធារបស់ខ្លួនតែប៉ុណ្ណោះ ហើយមិនមានគោលបំណងគំរាមកំហែងដល់ប្រទេសណាមួយឡើយ រួមទាំងប្រទេសចិនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រុមប្រឹក្សាសន្តិសុខជាតិ លោក Jonathan Malaya បាននិយាយថា៖ «យើងចង់ធានាដល់សាធារណៈរដ្ឋប្រជាមានិតចិនថា ការទិញយន្តហោះចម្បាំង F-16 ដែលបានគ្រោងទុក ទៅកាន់ឃ្លាំងអាវុធហ្វីលីពីន មិនប៉ះពាល់ដល់ផលប្រយោជន៍របស់ភាគីទីបីណាមួយទេ»។

កាលពីពេលថ្មីៗនេះ ក្រសួងការបរទេសសហរដ្ឋអាមេរិក បានអនុម័តការលក់ផ្នែកយោធាដល់ហ្វីលីពីន ដោយរួមបញ្ចូលយន្តហោះ F-16 ចំនួន ២០គ្រឿងដែលមានតម្លៃប្រហែល ៥,៥៨ពាន់លានដុល្លារ។

ការអនុម័តនេះ មានគោលបំណងពង្រឹងសមត្ថភាពល្បាតដែនទឹករបស់ហ្វីលីពីន និងធ្វើឲ្យប្រសើរឡើងនូវអន្តរប្រតិបត្តិការរវាងយោធាអាមេរិក និងហ្វីលីពីន។

ការអនុម័តនេះទៀតសោតធ្វើឡើងបន្ទាប់ពីដំណើរទស្សនកិច្ចរបស់រដ្ឋមន្ត្រីការពារជាតិអាមេរិក លោក Pete Hegseth ទៅកាន់ទីក្រុងម៉ានីល ក្នុងអំឡុងពេលដែលលោកបានអះអាងឡើងវិញនូវការប្តេជ្ញាចិត្តរបស់ទីក្រុងវ៉ាស៊ីនតោនចំពោះសន្ធិសញ្ញាការពារគ្នាទៅវិញទៅមកជាមួយហ្វីលីពីន និងបានសន្យាដាក់ពង្រាយសមត្ថភាពកម្រិតខ្ពស់ ដើម្បីពង្រឹងការទប់ស្កាត់ប្រឆាំងនឹងការគំរាមកំហែងរួមទាំងសកម្មភាពរបស់ចិននៅសមុទ្រចិនខាងត្បូងផងដែរ។

សមុទ្រចិនខាងត្បូងនៅតែជាតំបន់ដែលមានជម្លោះជាមួយនឹងការទាមទារទឹកដីត្រួតស៊ីគ្នាដែលពាក់ព័ន្ធនឹងប្រទេសចិន និងប្រទេសអាស៊ីអាគ្នេយ៍មួយចំនួន រួមទាំងហ្វីលីពីនផងដែរ។

តុលាការមជ្ឈត្តកម្មអន្តរជាតិ បានសម្រេចក្នុងឆ្នាំ២០១៦ថា ការទាមទារពង្រីកដែនទឹករបស់ចិនមិនមានមូលដ្ឋានផ្លូវច្បាប់ ដែលជាការសម្រេចចិត្តដែលទីក្រុងប៉េកាំងមិនទទួលស្គាល់៕

ដោយ៖ ឈាង

ចុចអាន៖ អាមេរិក បើកភ្លើងបៃតង លក់យន្តហោះចម្បាំងតម្លៃជាង ៥ពាន់លានដុល្លារឲ្យហ្វីលីពីន