ផុតរញ្ជួយដី, មីយ៉ាន់ម៉ា ព្រមានពីហានិភ័យបាក់ទំនប់, ប្រជាជនរាប់ពាន់នាក់ប្រឈមគ្រោះថ្នាក់

ប្រទេសមីយ៉ាន់ម៉ា បានព្រមានឲ្យពលរដ្ឋរបស់ខ្លួននៅតំបន់វាលទំនាបត្រូវប្រយ័ត្នខ្លួនឲ្យមែនទែន បន្ទាប់ពីដឹងថា ទំនប់ទឹកនៅទីក្រុងណៃពិដោ ត្រូវរងការខូចខាតយ៉ាងធ្ងន់ធ្ងរបន្ទាប់ពីគ្រោះរញ្ជួយដី ដោយមានហានិភ័យបាក់ធ្លាយ គំរាមកំហែងដល់អាយុជីវិតប្រជាជនរាប់ពាន់នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Khaosod កាលពីថ្ងៃពុធទី២ខែមេសាឆ្នាំ២០២៥, រូបភាពពីផ្កាយរណប Thaichote បង្ហាញឲ្យឃើញពីផលប៉ះពាល់យ៉ាងដំណំនៃទំនប់ Sinthay Lelway ក្នុងតំបន់ Tatkhon។

អាស្រ័យហេតុដូច្នេះហើយ ទើបរដ្ឋាភិបាលមីយ៉ាន់ម៉ា ចេញការព្រមានឲ្យពលរដ្ឋរស់នៅតំបន់ទាបៗ ត្រូវប្រយ័ត្នខ្លួនក្នុងកម្រិតខ្ពស់បំផុត ព្រោះថាករណីអាក្រក់ណាមួយអាចកើតឡើងគ្រប់ពេលវេលា។

ស្របពេលជាមួយគ្នានោះ រដ្ឋាភិបាលមីយ៉ាន់ម៉ា ក៏បញ្ជាឲ្យស្ថាប័នពាក់ព័ន្ធ ចុះទៅពិនិត្យនិងវាយតម្លៃអំពីស្ថានភាពរបស់ទំនប់នេះ ឲ្យបានជាប់លាប់ផងដែរ។

សូមជម្រាបជាថ្មី គ្រោះរញ្ជួយដីកម្រិតធ្ងន់៧.៧រ៉ិចទ័រ ជាមួយជម្រៅ១០គីឡូម៉ែត្រ មានចំណុចកណ្តាលក្បែរទីក្រុង Mandalay បានវាយប្រហារទីក្រុងធំលំដាប់ទី២របស់មីយ៉ាន់ម៉ាមួយនេះ យ៉ាងដំណំ ដោយសម្លាប់មនុស្សនិងបំផ្លាញសំណង់អគារភាគច្រើនឲ្យខ្ទេចហ្មត់ រាបដូចកន្ទេល។

យោងតាមសមាគម​សំឡេង​ប្រជាធិបតេយ្យ​ភូមា​ (DVB) គិតត្រឹមព្រឹកថ្ងៃព្រហស្បតិ៍ទី៣ខែមេសាឆ្នាំ២០២៥ តួលេខមនុស្សស្លាប់ដោយសារគ្រោះរញ្ជួយដីកម្រិតធ្ងន់៧.៧រ៉ិចទ័រដ៏សាហាវ បានកើនឡើងដល់ ៣ ៨៦៦នាក់ហើយ ខណៈ ៥ ៤៥៥នាក់របួសនិង៧១៩នាក់បាត់ខ្លួន៕

អត្ថបទ៖ សុខ សុវណ្ណ

ចុចអាន៖ របប​សឹក​មីយ៉ាន់ម៉ា ប្រកាស​បទ​ឈប់បាញ់​បណ្ដោះអាសន្ន ព្រោះ​គ្រោះរញ្ជួយដី