ព័ត៌មានអន្ដរជាតិ

ប៉ូលិសឥណ្ឌូណេស៊ីចេញបទបញ្ជាឲ្យអ្នកសារព័ត៌មាននិងអ្នកស្រាវជ្រាវបរទេសសុំអនុញ្ញាត ខណៈសមាគមសារព័ត៌មានបរិហារតប

បានផុស

២១ វិនាទី មុន

នៅ

ថ្ងៃសុក្រ ៤ មេសា ២០២៥

ដោយ

អគ្គស្នងការនគរបាលជាតិឥណ្ឌូណេស៊ី ឧត្តមសេនីយ៍ Listyo Sigit Prabowo បានចេញបទបញ្ជាតម្រូវឲ្យមានលិខិតបញ្ជាក់សម្រាប់អ្នកសារព័ត៌មាននិងអ្នកស្រាវជ្រាវបរទេសនៅក្នុងប្រទេសឥណ្ឌូណេស៊ី ហើយក្នុងបទបញ្ជាចេញចុងក្រោយនេះតម្រូវឲ្យប៉ូលិសបង្រ្កាបសកម្មភាពសារព័ត៌មានបរទេសថែមទៀត ខណៈសមាគមអ្នកសារព័ត៌មានបានហៅបទបញ្ជានេះថារំលោភសេរីភាព។ នេះបើយោងតាមការចេញផ្សាយរបស់ Tempo.com នៅថ្ងៃទី០៤ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទបញ្ជានេះបង្គាប់ឲ្យនគរបាលចាប់ខ្លួនជនបរទេសដែលកំពុងធ្វើសកម្មភាពសារព័ត៌មាន និងស្រាវជ្រាវនៅក្នុងទីតាំងជាក់លាក់ដូចមានចែងក្នុងបទបញ្ជា ខណៈទីតាំងដែលបានយោងក្នុងមាត្រានេះ ត្រូវបានកំណត់ស្របតាមបទប្បញ្ញត្តិនៃច្បាប់។

មិនត្រឹមចំពោះសកម្មភាពអ្នកសារព័ត៌មានបរទេសប៉ុណ្ណោះទេ បទបញ្ជានគរបាលក៏គ្រប់គ្រងសកម្មភាពស្រាវជ្រាវដែលត្រូវតែទទួលបានការអនុញ្ញាតពីស្ថាប័ននគរបាលដូចគ្នាដែរ។

ទាក់ទងបញ្ហានេះនាយកវិទ្យាស្ថានជំនួយផ្នែកច្បាប់សម្រាប់សារព័ត៌មាន លោក Mustafa Layong បានរិះគន់តម្រូវការសុំច្បាប់របស់ប៉ូលិសចំពោះជនបរទេសដែលធ្វើសកម្មភាពសារព័ត៌មាន និងស្រាវជ្រាវនេះ។

បើតាមលោក Mustafa Layong ការតាមដានជនបរទេសជាបន្ទុករបស់អន្តោប្រវេសន៍នោះទេ។ លោកថា«នេះគឺជាការរំលោភលើកាតព្វកិច្ច និងមុខងាររបស់ប៉ូលិស ខណៈលក្ខខណ្ឌនៃទីតាំងជាក់លាក់ អាចជាមធ្យោបាយមួយដើម្បីការពារទីតាំងគម្រោងយុទ្ធសាស្ត្រជាតិ (PSN) ឬទីតាំងដែលចាត់ទុកថាមានសារៈសំខាន់ដោយរដ្ឋាភិបាល»។

លោក Mustafa បានបញ្ជាក់ថា ប្រទេសឥណ្ឌូណេស៊ី ក្នុងនាមជាប្រទេសប្រជាធិបតេយ្យ ត្រូវតែគោរពគោលការណ៍សិទ្ធិមនុស្សជាសកល។ ជាឧទាហរណ៍ ការការពារ និងលើកកម្ពស់សេរីភាពសារព័ត៌មានសម្រាប់បុគ្គលគ្រប់រូប រួមទាំងអ្នកសារព័ត៌មានបរទេសផងដែរ។ លោកMustafa មានការសង្ស័យថាបទប្បញ្ញត្តិនេះត្រូវបានបង្កើតឡើងដើម្បីរឹតបន្តឹងសិទ្ធិ និងចលនានៃអ្នកសារព័ត៌មាន។

ក្រោយមានប្រតិកម្មជាច្រើន ប៉ូលិសឥណ្ឌូណេស៊ី បានចេញមកបកស្រាយថា ការចេញលិខិតបញ្ជាក់នោះមិនតម្រូវឱ្យអ្នកសារព័ត៌មានបរទេសរាយការណ៍។ នាយឧត្តមសេនីយ៍ Sandi Nugroho ប្រធានផ្នែកទំនាក់ទំនងសាធារណៈរបស់ប៉ូលិសជាតិឥណ្ឌូណេស៊ីបានបំភ្លឺថា បទបញ្ជាប៉ូលិសមិនហាមឃាត់អ្នកកាសែតបរទេស ឬអ្នកស្រាវជ្រាវពីការបំពេញភារកិច្ចរបស់ពួកគេនៅក្នុងប្រទេសឥណ្ឌូណេស៊ីដោយគ្មានលិខិតបញ្ជាក់របស់ប៉ូលីសនោះទេ។

លោកបានបញ្ជាក់ថា៖ «បើគ្មានលិខិតបញ្ជាក់ទេ អ្នកសារព័ត៌មានបរទេសនៅតែអាចបំពេញភារកិច្ចរបស់ខ្លួនក្នុងប្រទេសឥណ្ឌូណេស៊ី ដរាបណាពួកគេមិនបំពានច្បាប់ និងបទប្បញ្ញត្តិជាធរមាន។ លិខិតបញ្ជាក់នេះមិនចាំបាច់ទេ ប៉ុន្តែវាមានគោលបំណងធានាសុវត្ថិភាពរបស់ពលករបរទេស ជាពិសេសនៅតំបន់ជម្លោះដូចជាកោះប៉ាពួ»។

ប្រធានមូលនិធិជំនួយផ្នែកច្បាប់របស់ឥណ្ឌូណេស៊ី (YLBHI) លោក Muhammad Isnur បានរិះគន់បទប្បញ្ញត្តិប៉ូលីសឥណ្ឌូណេស៊ីថ្មីដែលផ្តល់សិទ្ធិឱ្យត្រួតពិនិត្យអ្នកកាសែត និងអ្នកស្រាវជ្រាវបរទេសដែលគ្របដណ្តប់ព្រឹត្តិការណ៍នៅក្នុងប្រទេស ថាជាការរំលោភច្បាប់សារព័ត៌មាន៕