រុស្ស៊ី វាយប្រហារស្រុកកំណើតលោក ហ្សេលេនស្គី សម្លាប់មនុស្ស១៨នាក់ ក្នុងនោះមានកុមារ ៩នាក់

ក្រោយប្រធានាធិបតីអាមេរិក ដូណាល់ ត្រាំ អះអាងថា លោក ពូទីន និង ហ្សេលេនស្គី ត្រៀមខ្លួនរួចរាល់ហើយក្នុងការស៊ីញេលើកិច្ចព្រមព្រៀងសន្តិភាពនោះ ស្រាប់តែកាលពីថ្ងៃសុក្រទី៤ខែមេសាឆ្នាំ២០២៥ រុស្ស៊ី បាញ់មីស៊ីលវាយប្រហារស្រុកកំណើតមេដឹកនាំអ៊ុយក្រែន បណ្តាលឲ្យមនុស្សចំនួន១៨នាក់ស្លាប់ ក្នុងនោះរួមមានទាំងកុមារ៩នាក់ផងដែរ ខណៈច្រើននាក់ទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, មីស៊ីល Iskander-M របស់រុស្ស៊ីបានវាយប្រហារអគារកម្ពស់១០ជាន់ ក្នុងទីក្រុង Kryvyi Rih បង្កការបំផ្លិចបំផ្លាញធ្ងន់ធ្ងរ។

ភ្លាមៗក្រោយការបាញ់មីស៊ីលនេះ មេដឹកនាំអ៊ុយក្រែន លោកហ្សេលេនស្គី បានបង្ហោះសារថ្កោលទោសលើបណ្តាញហើយនិយាយថា «រុស្ស៊ីនៅតែបន្តវាយប្រហារ ហើយហេតុផលតែមួយគត់គឺ រុស្ស៊ីមិនចង់បានបទឈប់បាញ់ទេ»។

មុនការវាយប្រហារនេះ លោក ត្រាំ បានប្រាប់ទៅអ្នកសារព័ត៌មានថា មេដឹកនាំរុស្ស៊ីនិងអ៊ុយក្រែន ត្រៀមខ្លួនរួចរាល់ហើយក្នុងការចុះហត្ថលេខាលើកិច្ចព្រមព្រៀងសន្តិភាព ដែលសម្របសម្រួលដោយទីក្រុងវ៉ាស៊ីនតោន ប៉ុន្តែលោកមិនលាតត្រដាងព័ត៌មានលម្អិតឡើយ គ្រាន់តែអះអាងថា លោកបានទាក់ទងទាំងជាមួយ ពូទីន និង ហ្សេលេនស្គី ហើយក៏ពិភាក្សាប្រកបដោយផ្លែផ្កាជុំវិញដំណើរនេះដែរ។

សូមជម្រាបថា នេះមិនមែនទើបលើកដំបូងឡើយ ដែលរុស្ស៊ី បើកការវាយប្រហារស្រុកកំណើតលោក ហ្សេលេនស្គី។ ជាក់ស្តែង កាលពីដើមខែមុន កងកម្លាំងលោកពូទីន ក៏បាញ់មីស៊ីលសម្លាប់មនុស្ស៤នាក់និងរបួស៣១នាក់ផងដែរនៅទីនោះ៕

អត្ថបទ៖ សុខ សុវណ្ណ

ចុចអាន៖ រុស្ស៊ីបាញ់មីស៊ីលវាយប្រហារស្រុកកំណើត លោក​ ហ្សេលេនស្គី ចំពេលមេដឹកនាំអឺរ៉ុបជួបគ្នានៅ​ បែលហ្ស៊ិក