មីយ៉ាន់ម៉ា រារាំងមិនឲ្យមានការដឹកជំនួយ យកទៅជួយជនរងគ្រោះដោយរញ្ជួយដី នៅតំបន់ក្រុមប្រឆាំង

តាមការបញ្ជាក់ពីការិយាល័យឧត្តមស្នងការសិទ្ធិមនុស្សអង្គការសហប្រជាជាតិ (OHCHR) កាលពីថ្ងៃសុក្រទី៤ខែមេសាឆ្នាំ២០២៥, របបយោធាមីយ៉ាន់ម៉ា បានរារាំងមិនឲ្យមានការដឹកជំនួយមនុស្សធម៌ចាំបាច់ យកទៅជួយជនរងគ្រោះដោយរញ្ជួយដីនៅតាមតំបន់ដែលក្រុមប្រឆាំងគ្រប់គ្រងនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក James Rodehaver ប្រធាន OHCHR ប្រចាំនៅមីយ៉ាន់ម៉ា និយាយថា របបយោធាបានប្រើយុទ្ធសាស្រ្តវាយប្រហារក្បួនដឹកជំនួយ ដើម្បីរារាំងមិនឲ្យយកទៅជួយអ្នក ដែលមិនគាំទ្ររដ្ឋប្រហារឆ្នាំ២០២១។ អ្នកនៅតាមតំបន់ជាច្រើនជាពិសេស Sagaing កំពុងត្រូវការជំនួយចាំបាច់ យើងមិនអាចបណ្តែតបណ្តោយឲ្យពេលវេលាកន្លងផុតទៅបានទេ ព្រោះពួកគេកំពុងត្រូវការជំនួយបន្ទាន់បំផុត។

យោងតាម OHCHR, ទោះបទឈប់បាញ់ចូលជាធរមាននៅថ្ងៃទី២ខែមេសាក៏ដោយ ប៉ុន្តែកងកម្លាំងលោក មីន អ៊ុងឡាំង នៅតែបើកការវាយប្រហារអាកាសជាច្រើនលើកច្រើនសា ជាពិសេសការវាយឆ្មក់លើក្បួនដឹកជំនួយតែម្តង។

ពាក់ព័ន្ធរឿងនេះដែរ ប្រទេសចិនបានអង្វរករដល់ភាគីទាំងអស់នៅក្នុងប្រទេសមីយ៉ាន់ម៉ា សូមឈប់បា​ញ់ប្រហារលើក្បួនដែលដឹកជំនួយសង្គ្រោះបន្ទាន់យកទៅជួយជនរងគ្រោះដោយរញ្ជួយដី តទៅទៀត។ 

ថ្លែងក្នុងសន្និសីទកាសែតកាលពីថ្ងៃពុធទី២ខែមេសាឆ្នាំ២០២៥ អ្នកនាំពាក្យក្រសួងការពារជាតិចិនលោក Guo Jiakun និយាយថា រដ្ឋាភិបាលទីក្រុងប៉េកាំង សូមអំពាវនាវដល់ភាគីទាំងអស់នៅក្នុងប្រទេសមីយ៉ាន់ម៉ា ត្រូវធានាសុវត្ថិភាពដល់កម្មករសង្គ្រោះរញ្ជួយដី និងក្បួនដឹកគ្រឿងជំនួយពីរដ្ឋចិន និងប្រទេសផ្សេងទៀត ខណៈជំនួយដែលផ្តល់ដោយកាកបាទក្រហមចិន បានទៅដល់ប្រទេសមីយ៉ាន់ម៉ាហើយ និងកំពុងធ្វើដំណើរទៅកាន់តំបន់រងគ្រោះដោយគ្រោះមហន្តរាយនៅទីក្រុង Mandalay។

សូមជម្រាបជាថ្មី គ្រោះរញ្ជួយដីកម្រិតធ្ងន់៧.៧រ៉ិចទ័រ ជាមួយជម្រៅ១០គីឡូម៉ែត្រ មានចំណុចកណ្តាលក្បែរទីក្រុង Mandalay បានវាយប្រហារទីក្រុងធំលំដាប់ទី២របស់មីយ៉ាន់ម៉ាមួយនេះ យ៉ាងដំណំ ដោយសម្លាប់មនុស្សនិងបំផ្លាញសំណង់អគារភាគច្រើនឲ្យខ្ទេចហ្មត់ រាបដូចកន្ទេល។

យោងតាមសមាគម​សំឡេង​ប្រជាធិបតេយ្យ​ភូមា​ (DVB) គិតត្រឹមព្រឹកថ្ងៃសៅរ៍ទី៥ខែមេសាឆ្នាំ២០២៥ តួលេខមនុស្សស្លាប់បានកើនឡើងដល់ជិត៤ពាន់នាក់ហើយ៕

អត្ថបទ៖ សុខ សុវណ្ណ

ចុចអាន៖ មីន អ៊ុងឡាំង ទៅប្រជុំនៅបាងកក ខណៈមនុស្សស្លាប់ដោយរញ្ជួយដីនៅមីយ៉ាន់ម៉ា កើនដល់ជិត ៤ពាន់