ព័ត៌មានអន្ដរជាតិ

ស្រុះគ្នាណាស់ពលរដ្ឋមីយ៉ាន់ម៉ាធ្វើឲ្យប្រទេសក្លាយជាទីក្រុងខ្មោចម្សិលមិញ

បានផុស

៤ years មុន

នៅ

ថ្ងៃព្រហស្បតិ៍ ២៥ មីនា ២០២១

ដោយ

ប្រទេសមីយ៉ាន់ម៉ានៅថ្ងៃពុធម្សិលមិញបានក្លាយជាទីក្រុងខ្មោចដែលបានធ្វើឲ្យអាម៉ាស់ចំពោះរបបយោធាដែលបានអះអាងថ្មីៗនេះថា ប្រទេសមានភាពប្រក្រតីវិញ ប៉ុន្តែត្រូវបានប្រជាជនស្ទើរទូទាំងប្រទេសជាពិសេសនៅទីក្រុងធំៗទាំងអស់បានស្ថិតនៅក្នុងផ្ទះ និងបិទទ្វារអាជីវកម្មពេញមួយថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាជនទូទាំងប្រទេសមីយ៉ាន់ម៉ាបាននាំគ្នាធ្វើការ«តវ៉ាស្ងប់ស្ងាត់មួយថ្ងៃ»ដែលជាផ្នែកមួយនៃយុទ្ធនាការណ៍ប្រឆាំងរបស់ពួកគេទៅនឹងរបបយោធាដែលបានកាន់កាប់អំណាចដោយការធ្វើរដ្ឋប្រហារថ្ងៃ១កុម្ភៈដើម្បីផ្តួលរំលំរដ្ឋាភិបាលជាប់ឆ្នោតដោយលទ្ធិប្រជាធិបតេយ្យ។

ចាប់តាំងពីពាក់កណ្តាលខែកុម្ភៈមក ទីក្រុងធំៗជាច្រើនទូទាំងប្រទេសត្រូវបានគេមើលឃើញពីភាពវឹកវរទាំងយប់-ថ្ងៃតាមរយៈការបង្ក្រាបបណ្តាលឲ្យស្លាប់របស់ទាហាន និងប៉ូលិសទៅលើអ្នកតរ៉ា។

ហាង និងផ្សារបានកាត់បន្ថយពេលវេលារកស៊ីរបស់ពួកគេកាន់តែខ្លី ដោយសារប្រឈមនឹងបញ្ហាញឹកញាប់ពេករវាងកម្លាំងសន្តិសុខ និងហ្វូងតវ៉ារាប់សិបពាន់នាក់នៅតាមដងវិថីនានា។ អាជីវកម្មជាច្រើនបានបិទទ្វារលឿន។

ផ្លូវដែលតែងតែមានចរាចរណ៍ទាំងយប់ថ្ងៃកក់កុញត្រូវបានបិទដោយរបាំងរបស់កម្លាំងសន្តិសុខដើម្បីទប់ស្កាត់អ្នកតវ៉ាដែលចេះតែកើនឡើងជាលំដាប់។

ដើមសប្តាហ៍មុននេះ របបយោធាមីយ៉ាន់ម៉ាបានប្រឹងប្រែងយ៉ាងខ្លាំងដើម្បីឲ្យអាជីវកម្មបើកទ្វារឡើងវិញដោយកម្លាំងសន្តិសុខឲ្យតែឃើញមនុស្សម្នាបានចាប់បង្ខំបោសសំអាតផ្លូវនានានៅទីក្រុង។

បន្ទាប់មកពួកគេផ្សព្វផ្សាយតាមប្រព័ន្ធផ្សព្វរបស់យោធា និងគ្រប់គ្រងដោយរដ្ឋថា សកម្មភាពអាជីវកម្ម ដូចជា ផ្សារ និងហាងទំនើបនៅទីក្រុងយ៉ាំងហ្គោនដែលជាមណ្ឌលពាណិជ្ជកម្មរបស់ប្រទេសបានបើកដំណើរការធម្មតាដែលបញ្ជាក់ថា «ស្ថានភាពប្រទេសជាតិប្រក្រតីវិញ»។

ជាការឆ្លើយតបនឹងការអះអាងថា ស្ថានភាពប្រក្រតីរបស់របបយោធា ប្រជាជនទូទាំងប្រទេសបាននាំគ្នាបើកយុទ្ធនាការណ៍តាមអនឡាញថា«តវ៉ាស្ងប់ស្ងាត់»មួយថ្ងៃដែលបញ្ជាក់ថា ការអះអាងរបស់របបយោធាផ្ទុយស្រឡះ។

នៅថ្ងៃពុធ ម្សិលមិញ ដងថិវីនៅទូទាំងទីក្រុងធំៗរបស់ប្រទេសមីយ៉ាន់ម៉ាដូចជា ទីក្រុងយ៉ាំងហ្គោន ម៉ាន់ដាឡាយ ណាយពីដោ មុនីវ៉ា និងទីក្រុងជាច្រើនទៀតត្រូវបានស្ងាត់ជ្រងំស្ទើរទាំងស្រុង។

អាជីវកម្មធំៗដូចជាផ្សារទំនើប ហាង សេវាកម្មដឹកជញ្ជូន ផ្សារតាមតំបន់ជាដើមបានបើកតែរយៈពេលខ្លីនាពេលព្រឹកដើម្បីឲ្យប្រជាជនទិញអ្វីដែលចាំបាច់ ហើយបន្ទាប់មកបិទអស់ស្ងាត់អស់ ខណៈអ្នកតវ៉ាក៏អត់ធ្វើសកម្មភាពដែរ។

អ្នកស្រុកឈ្មោះ U Kyaw Thiha រស់នៅក្នុងទីក្រុងបាននិយាយថា ៖«ខ្ញុំមិនដែលឃើញទីក្រុងស្ងប់ស្ងាត់បែបនេះទេក្នុងជីវិតរបស់ខ្ញុំ។ វាស្ងាត់ខ្លាំងជាងខ្លាចកូវីដ-១៩»។

បុរសអាយុ៤០ឆ្នាំបាននិយាយថា ការតវ៉ានៅថ្ងៃពុធគឺជាសក្ខីភាពនៃប្រជាជនសាមគ្គីគ្នាដែលបង្ហាញពីការប្រឆាំងនឹងរបបយោធា។

លោកថា ៖«យើងគ្មានមេដឹកនាំប្រាប់ពួកយើងឲ្យធ្វើអ្វីទេ។ ប្រជាជនពេញចិត្តធ្វើ និងសាមគ្គីគ្នាដោយមនសិការដើម្បីប្រឆាំងនឹងរបបផ្តាច់ការ»៕

ប្រែសម្រួល៖ វីរបុត្រ
ប្រភព៖ Irrawaddy