ថៃ ព្រមានថា ៤៨ខេត្ត នឹងជួបព្យុះខែប្រាំងដ៏ខ្លាំង

នាយកដ្ឋានឧតុនិយមថៃ បានចេញការព្រមានអំពីព្យុះខែប្រាំង ដែលនឹងវាយប្រហារខ្លាំងលើខេត្តចំនួន៤៨ ភាគច្រើននៅភាគខាងជើង រហូតដល់ចុងសប្តាហ៍ ខណៈនេះគឺជាឥទ្ធិពលនៃប្រព័ន្ធសម្ពាធខ្ពស់និងម៉ាសខ្យល់ត្រជាក់ ពីស​មុទ្រចិនខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Khaosod នៅថ្ងៃអង្គារទី៨ខែមេសាឆ្នាំ២០២៥, ខេត្តទាំងនោះនឹងមានភ្លៀងធ្លាក់ខ្លាំង ខ្យល់កន្ត្រាក់ លាយឡំជាមួយផ្គររន្ទះ ខណៈនាយកដ្ឋាន ព្រមានឲ្យប្រជាពលរដ្ឋមានការប្រុងប្រយ័ត្ន។

ដោយសារតែការព្យាករអំពីឥទ្ធិពលខ្លាំង អាជ្ញាធរថៃ បានព្រមានដល់ពលរដ្ឋសូមផ្អាកការធ្វើដំណើរសិន បើមិនចាំបាច់ ហើយចៀសវាងជ្រកភ្លៀងនៅក្រោមដើមឈើធំៗ ឬផ្ទាំងប៉ាណូ និងមិនត្រូវស្ថិតនៅក្នុងសំណង់ណាដែលមើលទៅមានសភាពទ្រុឌទ្រោមនោះទេ។

លើសពីនេះសម្រាប់តំបន់ឆ្នេរវិញ ថៃបានព្រមានឲ្យអ្នកចេញទូក សូមផ្អាកសិន ព្រោះថារលកសមុទ្រនឹងមានកម្ពស់ចន្លោះពី១ទៅជាង២ម៉ែត្រ ហើយពលរដ្ឋក៏គួរចៀសវាងការស្ថិតនៅមាត់សមុទ្រសិនដែរ ពេលមានព្យុះ។

យ៉ាងណាបន្ទាប់ពីព្យុះនេះ ប្រទេសថៃ ក៏នឹងត្រូវវាយប្រហារដោយរលកកម្តៅផងដែរ ដោយមានការព្យាករថា សីតុណ្ហភាពនៅតំបន់មួយចំនួន នឹងកើនឡើងដល់ក្បែរ៤០អង្សាសេ ជាពិសេសនៅភាគខាងត្បូង។ 

ហេតុដូច្នេះ អាជ្ញាធរបានណែនាំឲ្យពលរដ្ឋត្រូវត្រៀមខ្លួន ចំពោះបម្រែបម្រួលអាកាសធាតុ ព្រោះវាអាចប៉ះពាល់ខ្លាំងដល់សុខភាព៕

អត្ថបទ៖ សុខ សុវណ្ណ

ចុចអាន៖ បាងកក ជួបព្យុះខែប្រាំង ចុងសប្តាហ៍នេះ