​ជំនន់​ទឹកភ្លៀង​​​​​​វាយ​ប្រហារ​កុង​ហ្គោ សម្លាប់មនុស្ស ៣៣នាក់ ​ខណៈ​សង្គ្រាមស៊ីវិល​​មិនស្រាកស្រាន្ត​

ចំនួនអ្នកស្លាប់ដោយសារគ្រោះ​​ទឹកជំនន់នៅក្នុងរដ្ឋធានី Kinshasa របស់សាធារណរដ្ឋប្រជាធិបតេយ្យកុងហ្គោ (DRC) ដែល​ហែកហួរ​ដោយសារ​សង្គ្រាម​ស៊ីវិល​នោះ​ បានកើនឡើងដល់ ៣៣នាក់ ខណៈដែលអាជ្ញាធរកំពុងស្វះស្វែងជួយជម្លៀស​មនុស្សរាប់រយនាក់ដែលជាប់នៅក្នុងផ្ទះរបស់ពួកគេ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៨ខែមេសានេះ។

រដ្ឋមន្ត្រីមហាផ្ទៃកុងហ្គោ លោក Jacquemin Shabani បានប្រកាស​​តាមទូរទស្សន៍រដ្ឋកាលពីល្ងាចថ្ងៃអាទិត្យថា មនុស្ស១០នាក់ទៀតបានបញ្ជាក់ថាស្លាប់ គិតត្រឹមល្ងាចថ្ងៃអាទិត្យ ដោយបន្ថែមពីលើចំនួនអ្នកស្លាប់២៣នាក់កាលពីប៉ុន្មាន​ថ្ងៃមុន នាំឲ្យចំនួនសរុបកើនដល់៣៣នាក់ ដោយអ្នកស្លាប់ភាគច្រើនគឺបណ្តាលមកពីជញ្ជាំងផ្ទះនិងអគារបាក់រលំភ្លាមៗបន្ទាប់ពីទឹកជំនន់ចូលមក។

ទឹកជំនន់នេះបណ្ដាលមកពីភ្លៀងធ្លាក់ខ្លាំងតាំងពីសប្តាហ៍មុន ដែលបណ្តាលឱ្យទន្លេ Ndjili ដ៏សំខាន់ចាប់ផ្ដើមហូរហៀរនិងជន់លិចអគាររាប់រយ​។ ទោះបីស្ថានការណ៍បានប្រសើរឡើងបន្តិចកាលពីថ្ងៃចន្ទ ប៉ុន្តែផ្លូវមួយចំនួននៅតែមិនអាចធ្វើចរាចរណ៍បាន ក្នុងនោះមានផ្លូវដ៍សំខាន់ទៅកាន់អាកាសយានដ្ឋាន ដែលភ្ជាប់ទីក្រុង Kinshasa ទៅកាន់តំបន់ផ្សេងទៀត ក៏ត្រូវបានខូចខាតដោយសារទឹកជំនន់នេះដែរ។

ទឹកជំនន់ក៏បានរារាំងដល់លទ្ធភាពទទួលបានទឹកស្អាតនៅក្នុងសង្កាត់យ៉ាងហោចណាស់១៦ បន្ទាប់ពីប្រព័ន្ធទឹក​​ស្អាត​រងផល​​ប៉ះពាល់។ រដ្ឋាភិបាលបានបង្កើតជម្រកសង្គ្រោះបន្ទាន់យ៉ាងហោចណាស់ចំនួន៤​កន្លែង​ ដែលកំពុងបម្រើដល់គ្រួសារដែលផ្លាស់ទីលំនៅរាប់រយនាក់។ ទោះយ៉ាងណា អ្នកស្រុកជាច្រើនបានស្តីបន្ទោសរដ្ឋាភិបាលថា មិនបានឆ្លើយតបឱ្យបានលឿនទាន់ពេលចំពោះគ្រោះមហន្តរាយនេះនោះទេ។

គួររម្លឹកថាក្នុងឆ្នាំ ២០២២មនុស្សយ៉ាងហោចណាស់ ១០០នាក់បានស្លាប់ក្នុងអំឡុងពេលទឹកជំនន់ស្រដៀងគ្នានេះនៅក្នុងទីក្រុង Kinshasa ។

គ្រោះមហន្តរាយនេះកើតឡើងចំពេលដែលរដ្ឋាភិបាលកំពុងប្រយុទ្ធប្រឆាំងនឹងគ្រោះមហន្តរាយមនុស្សធម៌នៅភាគខាងកើតនៃប្រទេស ចម្ងាយជាង២៦០០ គីឡូម៉ែត្រ ពីទីក្រុង Kinshasa ជាកន្លែងដែលមានការប្រយុទ្ធគ្នាជាច្រើនទសវត្សរ៍ជាមួយពួកឧទ្ទាមដែលបានកើនឡើងនៅក្នុងខែកុម្ភៈឆ្នាំនេះ និងកាន់តែអាក្រក់ទៅៗដែលជាវិបត្តិមនុស្សធម៌ដ៏ធំបំផុតមួយរបស់ពិភពលោក៕

អត្ថបទ៖ ប៊ុន សុភាព