តំបន់ខ្លះនៅ ថៃ នឹងជួបព្យុះត្រូពិក ថ្ងៃបុណ្យចូលឆ្នាំ

នាយកដ្ឋានឧតុនិយមថៃ បានចេញការព្យាករថា តំបន់មួយចំនួននៅប្រទេសថៃ ជាពិសេសខេត្តភាគខាងជើង នឹងជួបព្យុះត្រូពិក ក្នុងអំឡុងពិធីបុណ្យសង្ក្រាន្តឆ្នាំថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Bangkok Post បានដកស្រង់ប្រភពពីនាយកដ្ឋាន ដែលចេញព្រឹត្តិបត្រព័ត៌មានកាលពីថ្ងៃអង្គារទី៨ខែមេសាឆ្នាំ២០២៥ថា ចាប់ពីថ្ងៃទី១២ដល់១៤ខែមេសា តំបន់ភាគខាងលើប្រទេសថៃ នឹងជួបព្យុះត្រូពិក ដែលបង្កឲ្យមានភ្លៀងធ្លាក់ លាយឡំជាមួយផ្គររន្ទះនិងខ្យល់កន្ត្រាក់។ ដូច្នេះពលរដ្ឋនៅតាមបណ្តាខេត្តភាគខាងជើង ត្រូវរក្សាការប្រុងប្រយ័ត្នខ្ពស់ជានិច្ច ហើយកុំធ្វើដំណើរទៅណាបើមិនចាំបាច់។

ខេត្តទាំងនោះមានដូចជា Chiang Mai, Chiang Rai, Lamphun, Lampang, Mae Hong Son, Phayao, Phrae, Nan, Uttaradit, Sukhothai, Phitsanulok, Phetchabun, Kamphaeng Phet, Tak, Nakhon Sawan និង Uthai Thani។

សេចក្តីប្រកាសនេះ កើតឡើងត្រឹមមួយថ្ងៃប៉ុណ្ណោះ បន្ទាប់ពីនាយកដ្ឋានខាងលើ បានចេញការព្រមានអំពីព្យុះខែប្រាំង ដែលនឹងវាយប្រហារខ្លាំងលើខេត្តចំនួន៤៨ ភាគច្រើននៅភាគខាងជើង រហូតដល់ចុងសប្តាហ៍ ដោយសារតែឥទ្ធិពលនៃប្រព័ន្ធសម្ពាធខ្ពស់និងម៉ាសខ្យល់ត្រជាក់ ពីស​មុទ្រចិនខាងត្បូង។

យ៉ាងណាមិញ បន្ទាប់ពីព្យុះនេះហើយនោះ ប្រទេសថៃ ក៏នឹងត្រូវវាយប្រហារដោយរលកកម្តៅផងដែរ ដោយមានការព្យាករថា សីតុណ្ហភាពនៅតំបន់មួយចំនួន នឹងកើនឡើងដល់ក្បែរ៤០អង្សាសេ ជាពិសេសនៅភាគខាងត្បូងតែម្តង៕

អត្ថបទ៖ សុខ សុវណ្ណ

ចុចអាន៖ ថៃ ព្រមានថា ៤៨ខេត្ត នឹងជួបព្យុះខែប្រាំងដ៏ខ្លាំង