ត្រឹម២ថ្ងៃ រន្ទះបាញ់សម្លាប់មនុស្ស៦១នាក់ ក្នុងរដ្ឋ Bihar ប្រទេសឥណ្ឌា

ក្នុងរយៈពេលត្រឹម២ថ្ងៃប៉ុណ្ណោះ រដ្ឋ Bihar ភាគខាងកើតប្រទេសឥណ្ឌា មានមនុស្សរហូតដល់ទៅ៦១នាក់ ត្រូវរន្ទះបាញ់ស្លាប់យ៉ាងរន្ធត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីអាជ្ញាធររដ្ឋនៅថ្ងៃសៅរ៍ទី១២ខែមេសាឆ្នាំ២០២៥, អ្នកទាំងនេះត្រូវរន្ទះបាញ់ស្លាប់នៅថ្ងៃព្រហស្បតិ៍និងថ្ងៃសុក្រ ទូទាំងរដ្ឋអំឡុងពេលមានព្យុះខ្លាំង។

ទោះបីជាយ៉ាងណាក៏ដោយ នាយកដ្ឋានឧតុនិយមរដ្ឋព្រមានថា ប៉ុន្មានថ្ងៃខាងមុខទៀត រន្ទះនឹងនៅតែឆ្វេចឆ្វាចពេញមេឃដោយសារព្យុះមិនទាន់ធូរស្រាល ដូច្នេះពលរដ្ឋគួរកុំចេញទៅណាផ្តាស ពេលមេឃខ្មៅឬភ្លៀង។

កាលពីឆ្នាំមុន អ្នកជំនាញព្រមានថា បម្រែបម្រួលអាកាសធាតុ កំពុងជំរុញឲ្យកើតមានរន្ទះបាញ់សម្លាប់មនុស្សក្នុងអត្រាកើនឡើងគួរឲ្យព្រួយបារម្ភ នៅក្នុងប្រទេសឥណ្ឌា ខណៈមួយឆ្នាំៗ រន្ទះបានបាញ់សម្លាប់មនុស្សជិត១ ៩០០នាក់ នៅក្នុងប្រទេសដែលមានប្រជាជនច្រើនបំផុតលើពិភពលោកមួយនេះ។

ចំណែកក្រុមអ្នកស្រាវជ្រាវដែលដឹកនាំដោយសាកលវិទ្យាល័យ Fakir Mohan នៅរដ្ឋ Odisha ភាគខាងកើតប្រទេសឥណ្ឌា បានចេញរបាយការណ៍ថា មានករណីរន្ទះបាញ់សម្លាប់មនុស្សចំនួន ១០១ ៣០៩នាក់ ចន្លោះឆ្នាំ ១៩៦៧ ដល់២០២០ ប៉ុន្តែចំនួន បានហក់ឡើងខ្លាំងបំផុតចន្លោះឆ្នាំ២០១០និង២០២០៕

អត្ថបទ៖ សុខ សុវណ្ណ

ចុចអាន៖ មិនធ្លាប់មាន! អូស្ត្រាលី កើត​មាន​រន្ទះបាញ់ជាង ១​លាន​ដង​ក្នុង​ពេលត្រឹម​២៤​ម៉ោង