ព័ត៌មានអន្ដរជាតិ

តើចិននិងវៀតណាម នឹងចុះកិច្ចព្រមព្រៀងអ្វីខ្លះក្នុងដំណើរទស្សនកិច្ចរបស់លោក ស៊ី ចំពេលពិភពលោកតានតឹងខ្លាំង?

បានផុស

១ ម៉ោង មុន

នៅ

ថ្ងៃចន្ទ ១៤ មេសា ២០២៥

ដោយ

ប្រធានាធិបតី ស៊ី ជីនពីង បានធ្វើដំណើរបំពេញទស្សនកិច្ចផ្លូវរដ្ឋទៅកាន់ប្រទេសអាស៊ីអាគ្នេយ៍ចំនួន៣ រួមមានប្រទេសវៀតណាម ប្រទេសកម្ពុជា និងប្រទេសម៉ាឡេស៊ី ដោយចាប់ផ្តើមពីទីក្រុងហាណូយនៅថ្ងៃចន្ទទី១៤ខែមេសានេះរហូតដល់ថ្ងៃទី១៨ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរទស្សនកិច្ចរបស់ប្រធានាធិបតីចិនក្នុងពេលនេះ ចំពេលដែលប្រធានាធិបតីសហរដ្ឋអាមេរិកលោក ដូណាល់ ត្រាំ បង្កើតនូវបរិយាកាសសង្គ្រាមពាណិជ្ជកម្មជាមួយមហាយក្សចិន ក៏ដូចជាមួយចំណែកលើប្រទេសវៀតណាមដែលនឹងតំឡើងអត្រាពន្ធរហូតជិត៥០%ពីអត្រាពន្ធបច្ចុប្បន្ន មិនធ្លាប់មានប៉ុណ្ណោះ។

ការចាប់ផ្តើមដំណើរទស្សនកិច្ចទៅកាន់ទីក្រុងហាណូយ តើភាគីចិននិងវៀតណាម គ្រោងនឹងធ្វើអ្វីខ្លះសម្រាប់ពង្រឹងទំនាក់ទំនងទ្វេភាគី?

តាមសេចក្តីរាយការណ៍របស់រ៉យទ័រដែលបានដកស្រង់ប្រភពមន្ត្រីជាន់ខ្ពស់វៀតណាម ក្នុងដំណើរទស្សនកិច្ចនេះ វៀតណាមនិងចិនគ្រោងចុះហត្ថលេខាលើកិច្ចព្រមព្រៀងរហូតដល់៤០ឯណោះ។

ខាងក្រោមនេះជាទិន្នន័យសំខាន់ ដែលត្រូវស្វែងយល់ក្នុងដំណើរទស្សនកិច្ចរបស់ប្រធានាធិបតីស៊ី ជីនពីងទៅកាន់ប្រទេសវៀតណាមរយៈពេល២ថ្ងៃ ដោយផ្តើមពីថ្ងៃទី១៤មេសានេះ ដែលភាគីទាំងពីរនឹងពិភាក្សានិងចុះហត្ថលេខា។

សម្រាប់រយៈពេលត្រីមាសដំបូងក្នុងឆ្នាំ២០២៥នេះ វៀតណាមនាំចូលពីទីផ្សារចិនមានតម្លៃ៣០ពាន់លានដុល្លារ ខណៈការនាំចេញទៅទីផ្សារសហរដ្ឋអាមេរិកមានតម្លៃ៣១,៤ពាន់លានដុល្លារ។ យោងទិន្នន័យគយវៀតណាម ដែលរាយការណ៍ដោយរ៉យទ័រ។
វៀតណាមទទួលបានវិនិយោគទុនចិនយ៉ាងច្រើនក្នុងប៉ុន្មានឆ្នាំចុងក្រោយនេះ ចាប់តាំងពីរដ្ឋបាលរបស់លោក ដូណាល់ ត្រាំ ក្នុងអាណត្តិដំបូងរបស់គាត់ ដែលព្យាយាមដាក់របាំងពន្ធគយលើក្រុមហ៊ុនដែលមានមូលដ្ឋានផលិតក្នុងប្រទេសចិន
ឧបនាយករដ្ឋមន្ត្រីវៀតណាម លោក Bui Thanh Son បាននិយាយកាលពីថ្ងៃសៅរ៍ថា ប្រទេសទាំងពីរកំណត់ចុះហត្ថលេខាលើកិច្ចព្រមព្រៀងប្រមាណ៤០ក្នុងវិស័យជាច្រើន។
អគ្គលេខាធិការបក្សកម្មុយនិស្តវៀតណាម To Lam ត្រូវបានស្រង់សម្តីផ្សាយនៅលើបណ្តាញព័ត៌មានរដ្ឋចុះផ្សាយនៅថ្ងៃចន្ទនេះថា ទីក្រុងហាណូយចង់បង្កើនកិច្ចសហប្រតិបត្តិការ ក្នុងវិស័យការពារជាតិ សន្តិសុខ និងហេដ្ឋារចនាសម្ព័ន្ធ ជាពិសេសការភ្ជាប់ផ្លូវដែក។
វៀតណាមបានយល់ព្រមប្រើប្រាស់កញ្ចប់ប្រាក់កម្ចីរបស់ចិនដើម្បីកសាងផ្លូវដែកថ្មីភ្ជាប់ប្រទេសទាំងពីរ ដែលជាមធ្យោបាយបង្កើនទំនុកចិត្តដើម្បីបង្កើនពាណិជ្ជកម្មទ្វេភាគី និងភ្ជាប់ទំនាក់ទំនង។
ទោះបីយ៉ាងណា មិនទាន់មានសេចក្តីរាយការណ៍ណាមួយផ្សព្វផ្សាយថា កិច្ចព្រមព្រៀងប្រើប្រាស់កម្វីត្រូវបានប្រកាសនោះទេ
ក្នុងដំណើរទស្សនកិច្ចនេះដែរ ប្រទេសចិនវិញ ក៏ស្វែងរកដៃគូចុះហត្ថលេខាទិញយន្តហោះផលិតនៅស្រុកចិន COMAC ដែលរហូតមកដល់ពេលនេះត្រូវបានគេរាយការណ៍ស្វែងរកដៃគូទិញបរទេសយ៉ាងលំបាក បើទោះបីជាប្រកាសពីផលិតយន្តហោះដឹកអ្នកដំណើរពាណិជ្ជកម្មប្រកបដោយភាពជោគជ័យប៉ុន្មានឆ្មាំក្តី។
កាលថ្ងៃអាទិត្យក្រុមហ៊ុនអាកាសចរណ៍តម្លៃទាបរបស់វៀតណាម VietJet និង ក្រុមហ៊ុនផលិតយន្តហោះ COMAC បានចុះហត្ថលេខាយោគយល់គ្នានៅទីក្រុងហាណូយ។ យោងសេចក្តីរាយការណ៍របស់ រ៉យទ័រ។ ទោះបីកិច្ចព្រមព្រៀងមិនទាន់បានប្រកាសជាផ្លូវការនៅឡើយ ប៉ុន្តែសេចក្តីរាយការណ៍កន្លងមកបានលើកឡើងថា ក្រុមហ៊ុនអាកាសចរណ៍វៀតណាម បានចុះហត្ថលេខាជួយយន្តហោះចំនួន២គ្រឿងពីក្រុមហ៊ុនចិន COMAC៕