រុស្សី ផលិតវ៉ាក់សាំងកូវីដទី ៣ ក្រោយជោគជ័យសាកល្បងដំណាក់កាលទី ២

ក្រសួងវិទ្យាសាស្ត្រ និងឧត្តមសិក្សារុស្ស៊ីបាននិយាយនៅថ្ងៃព្រហស្បតិ៍នេះថា មជ្ឈមណ្ឌលស្រាវជ្រាវ Chumakov របស់ប្រទេសរុស្ស៊ីបានចាប់ផ្តើមផលិតវ៉ាក់សាំងប្រឆាំងជំងឺកូវីដ ១៩ ទីបីរបស់ខ្លួនដែលមានឈ្មោះថា CoviVac ជាផ្លូវការ ។

រដ្ឋមន្រ្តីវិទ្យាសាស្ត្រ និងឧត្តមសិក្សារុស្ស៊ីលោក Valery Falkov បានដាក់ចេញនូវកញ្ចប់វ៉ាក់សាំងដំបូងបង្អស់ដែលមានស្លាកលេខ 0001 ។

ក្រសួងបាននិយាយនៅក្នុងសេចក្តីថ្លែងការណ៍មួយថា “នេះមានន័យថា វ៉ាក់សាំងទីបីរបស់រុស្ស៊ីចូលទៅក្នុងចលនាស៊ីវិល ហើយនឹងអាចប្រើប្រាស់នៅតាមតំបន់ក្នុងប៉ុន្មានថ្ងៃខាងមុខ” ។

ក្រៅពីវ៉ាក់សាំងថ្មីនេះប្រទេសរុស្ស៊ីក៏គ្រោងនឹងផលិតវ៉ាក់សាំងការពារកូវីដចំនួន ៨៨ លានដូសទៀតនៅខែមិថុនា ឆ្នាំ ២០២១ រួមមានទាំងវ៉ាក់សាំង Sputnik V ចំនួន ៨៣ លានដូស និងវ៉ាក់សាំង EpiVacCorona ចំនួន ៥.៤ លានដូស ។

យោងតាមអាជ្ញាធរបានឲ្យដឹងថា វ៉ាក់សាំងបច្ចុប្បន្នត្រូវបានណែនាំសម្រាប់មនុស្សដែលមានអាយុចន្លោះពី ១៨ ទៅ ៦០ ឆ្នាំ បន្ទាប់ពីការសាកល្បងដំណាក់កាលទី ២ ។

គួរបញ្ជាក់ថា វ៉ាក់សាំង CoviVac ដែលចុះបញ្ជីក្នុងខែកុម្ភៈបានក្លាយជាវ៉ាក់សាំងទីបីដែលត្រូវបានបង្កើតឡើងនៅក្នុងប្រទេសរុស្ស៊ី បន្ទាប់ពីវ៉ាក់សាំង Sputnik V និងវ៉ាក់សាំង EpiVacCorona ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ វ៉ាក់សាំង EpiVacCorona របស់រុស្ស៊ីអនុញ្ញាតឲ្យប្រើប្រាស់លើមនុស្សអាយុលើស ៦០ ឆ្នាំ

ចុចអាន ៖ លោក Putin នឹងចាក់វ៉ាក់សាំង Sputnik V បញ្ចប់ការរិះគន់របស់បរទេស