ព័ត៌មានអន្ដរជាតិ

មីយ៉ាន់ម៉ា៖ អ្នកទោសរាប់ពាន់នាក់ត្រូវដោះលែង ក្រោយចលាចលនៅពន្ធនាគារ Magwe បណ្តាលឲ្យអ្នកទោសនយោបាយ២នាក់ស្លាប់

បានផុស

២៥ វិនាទី មុន

នៅ

ថ្ងៃសៅរ៍ ១៩ មេសា ២០២៥

ដោយ

អ្នកទោសនយោបាយមីយ៉ាន់ម៉ាពីរនាក់ត្រូវបានតម្រួតបាញ់សម្លាប់ ខណៈអ្នកទោសជាច្រើននាក់ទៀតបានរងរបួសក្នុងហេតុការណ៍ប៉ះទង្គិចគ្នារវាងអាជ្ញាធរពន្ធនាគារនិងអ្នកទោសនៅពន្ធនាគារ Magwe។ នេះបើយោងតាមការចេញផ្សាយរបស់សារព័ត៌មានThe Irrawaddy កាលពីថ្ងៃ១៨ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមបណ្តាញអ្នកទោសនយោបាយមីយ៉ាន់ម៉ា (PPNM) ដែលឃ្លាំមើលការរំលោភសិទ្ធិមនុស្សនៅក្នុងពន្ធនាគារគ្រប់គ្រងដោយរបបយោធា អ្នកទោសនយោបាយពីរនាក់ត្រូវបានបាញ់សម្លាប់ ហើយអ្នកទោសនយោបាយជាច្រើននាក់ និងអ្នកទោសផ្សេងទៀតបានរងរបួស នៅពេលដែលឆ្មាំពន្ធនាគារបានបើកការបាញ់ប្រហារក្នុងអំឡុងពេលជម្លោះរវាងអាជ្ញាធរពន្ធនាគារនិងអ្នកទោសនៅពន្ធនាគារ Magwe ក្នុងតំបន់ Magwe កាលពីថ្ងៃទី ១៣ខែមេសា។ បុគ្គលិកពន្ធនាគារក៏បានរងរបួសក្នុងពេលកើតហេតុនោះដែរ។

ភាពចលាចលបានកើតឡើងនៅពេលដែលក្រុមកងកម្លាំងការពារប្រជាជនក្នុងតំបន់បានប៉ះទង្គិចជាមួយកងកម្លាំងរបបនៅមុខពន្ធនាគារ នេះបើតាមក្រុមតស៊ូមតិនៅមីយ៉ាន់ម៉ា។

គួរបញ្ជាក់ថា រដ្ឋាភិបាលយោធាមីយ៉ាន់ម៉ាក្រោយការប៉ះទង្គិចនេះ បានផ្តល់ការលើកលែងទោសដល់អ្នកទោសជិត ៤ ៩០០នាក់ ដើម្បីប្រារព្ធពិធីបុណ្យចូលឆ្នាំប្រពៃណីជាតិ។ ឧត្តមសេនីយ៍ Min Aung Hlaing បានលើកលែងទោសបុគ្គលចំនួន ៤ ៨៩៣នាក់ ក្នុងនោះមានជនបរទេស ១៣នាក់ ដែលនឹងត្រូវបញ្ជូនទៅប្រទេសកំណើតរបស់ពួកគេវិញ។

ការលើកលែងទោសនេះ មិនរាប់បញ្ចូលអ្នកដែលត្រូវបានកាត់ទោសពីបទឧក្រិដ្ឋកម្មធ្ងន់ធ្ងរ ដូចជា អំពើឃាតកម្ម និងករណីរំលោភនោះទេ។ គេនៅមិនទាន់ដឹងថា មានអ្នកជាប់ឃុំខាងនយោបាយប៉ុន្មាននាក់ក្នុងចំណោមអ្នកដែលត្រូវបានគេដោះលែងនោះនៅឡើយទេ៕