ព័ត៌មានអន្ដរជាតិ

យន្តហោះក្រុមហ៊ុនអាមេរិកឆេះ ជម្លៀសអ្នកដំណើរ អ្នកបម្រើលើយន្តហោះ ជិត៣០០នាក់

បានផុស

២៨ វិនាទី មុន

នៅ

ថ្ងៃអង្គារ ២២ មេសា ២០២៥

ដោយ

យោងការចេញផ្សាយរបស់សារព័ត៌មានអាមេរិក អ្នកដំណើរ អ្នកបម្រើលើយន្តហោះ របស់ក្រុមហ៊ុនអាកាសចរណ៍ Delta ជិត៣០០នាក់ត្រូវបានជម្លៀសចេញភ្លាមៗ នៅពេលដែល ជើងហោះហើររបស់យន្តហោះនៃក្រុមហ៊ុន Delta របស់សហរដ្ឋអាមេរិកនេះ បានឆេះម៉ាស៊ីននៅឯអាកាសយានដ្ឋានរដ្ឋ Florida កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីរដ្ឋបាលអាកាសចរណ៍សហព័ន្ធ (FAA) របស់សហរដ្ឋអាមេរិក បាននិយាយថា ឧប្បត្តិហេតុនេះបានកើតឡើងបន្ទាប់ពីម៉ោង ១១ព្រឹកម៉ោងក្នុងស្រុកនៅឯអាកាសយានដ្ឋានអន្តរជាតិ Orlando។ ទីភ្នាក់ងារនេះបាននិយាយថា យន្តហោះប្រភេទ Airbus A330 ដែលរៀបចំសម្រាប់ការហោះឡើងទៅកាន់ទីក្រុង Atlanta នៅពេលដែលភ្លើងបានឆាបឆេះឡើង។

តាមការចេញផ្សាយរបស់សារព័ត៌មានអាមេរិក cbs17.com ក្រុមហ៊ុនអាកាសចរណ៍ Delta បាននិយាយថា អណ្តាតភ្លើងត្រូវបានគេសង្កេតឃើញជាលើកដំបូងចេញពីបំពង់កន្ទុយយន្តហោះ។ នៅក្នុងឧបទ្ទវហេតុនោះ មានអ្នកដំណើរ២៨២នាក់ អ្នកបម្រើការលើយន្តហោះ១០នាក់ និងអ្នកបើកយន្តហោះ២នាក់។

ទោះបីជាយ៉ាងណា ក្រុមហ៊ុនអាកាសចរណ៍មិនបានលើកឡើងពីរបាយការណ៍បឋមពីការរងរបួស។

ក្នុងរយៈពេលចុងក្រោយនេះ វិស័យអាកាសចរណ៍អាមេរិកហាក់រងនូវការវាយប្រហារដោយឧបទ្ទវហេតុផ្សេងៗជាញឹកញាប់ ដែលជាកត្តាបង្កឲ្យមានក្តីបារម្ភចំពោះសុវត្ថិភាពនៃការធ្វើដំណើរតាមផ្លូវអាកាសដ៏មមាញឹករបស់សហរដ្ឋអាមេរិក។

ទីភ្នាក់ងារនេះបានបញ្ជាក់ថា FAA កំពុងបើកការស៊ើបអង្កេត។

អ្នកតំណាងក្រុមហ៊ុនអាកាសចរណ៍បាននិយាយថា អ្នកដំណើរទាំង២៨២នាក់នៅលើជើងហោះហើរត្រូវបានត្រឡប់ទៅស្ថានីយវិញ ដែលក្រុមហ៊ុនអាកាសចរណ៍កំពុងរៀបចំដើម្បីហោះហើរពួកគេទៅកាន់គោលដៅរបស់ពួកគេ៕