របបយោធា​មី​យ៉ាន់​ម៉ា​ប្រកាស​បន្ត​បទ​ឈប់​បាញ់​ដល់​ថ្ងៃ​ទី​៣០ ខែមេសា

ប្រមុខ​​យោធាមីយ៉ាន់ម៉ាបានប្រកាស​​បន្តបទឈប់បាញ់ដែលខ្លួនបានប្រកាស​ជាឯកតោភាគី​ បន្ទាប់ពីមានការរញ្ជួយដីដ៏សាហាវកាលពីខែមុនចំនួនមួយសប្តាហ៍ទៀត ដល់ថ្ងៃទី៣០ ខែមេសា។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី២៣ខែមេសានេះ។

ក្រោយស្ងាត់ស្ងៀមមិនឆ្លើយតបទៅនឹងការបន្តបទឈប់បាញ់ឬក៏មិនបន្តកាលពីម្សិលមិញ របបយោធាមីយ៉ាន់ម៉ា នៅថ្ងៃនេះ​បាន​ប្រកាសថា ខ្លួននឹងបន្តបទឈប់បាញ់ជាឯកតោភាគីរយៈពេលមួយសប្តាហ៍ទៀត ចាប់ពីថ្ងៃទី ២៣ ដល់ថ្ងៃទី ៣០ខែមេសា បន្ទាប់ពីបទឈប់បាញ់រយៈពេល២០​ថ្ងៃដំបូងដែលបានចាប់ផ្តើមតាំងថ្ងៃទី ២ ខែមេសា បានផុតកំណត់។

បើតាមក្រសួងព័ត៌មានរបស់របបនេះ វិធានការនេះនឹងជួយពន្លឿនការកសាងឡើងវិញនៅក្នុងតំបន់ដែលរងផលប៉ះពាល់ដោយ​រញ្ជួយដី ជាពិសេសចំពោះកិច្ចខិតខំប្រឹងប្រែងដើម្បីសាងសង់ឡើងវិញនូវការិយាល័យរដ្ឋាភិបាលដែលរងការខូចខាតដូចជា អគារនាយកដ្ឋាន កន្លែងសាធារណៈ និងមធ្យោបាយដឹកជញ្ជូន។

ទោះបីជាមានការប្រកាសបទឈប់បាញ់ក៏ដោយ ក៏កងកម្លាំងរបប​យោធាបានបន្តបើកការវាយប្រហារតាមអាកាសជារៀងរាល់ថ្ងៃនៅទូទាំងប្រទេស។ យោងតាមក្រសួងសិទ្ធិមនុស្ស​របស់រដ្ឋាភិបាល​រួបរួម​ជាតិ (NUG) ដែលប្រឆាំងរប​ប​យោធា របប​នេះបានវាយប្រហារដោយគ្រាប់ផ្លោងចំនួន៩២ លើកនិងការវាយប្រហារតាមអាកាសនៅទូទាំង១២តំបន់ និងរដ្ឋចំនួន១៥ របស់ប្រទេសមីយ៉ាន់ម៉ា ចន្លោះពីថ្ងៃទី ២៨ខែមីនាដល់ថ្ងៃទី ៨ខែមេសា បានសម្លាប់មនុស្ស៧២នាក់ និងរបួស ៩១នាក់

សូមបញ្ជាក់ថា យោងតាម​ការ​បញ្ចេញ​​ព័ត៌មាន​របស់​របបយោធា​មីយ៉ាន់​ម៉ា​ ចំនួនអ្នកស្លាប់ពីការរញ្ជួយដីកាលពីថ្ងៃទី ២៨ខែមីនាបានកើនឡើងដល់ ៣៧៣៥នាក់ របួស៥១០៨ នាក់និង ១២០ នាក់ទៀតកំពុងបាត់ខ្លួន​នៅឡើយ​ គិតត្រឹមថ្ងៃអាទិត្យ ។ ប៉ុន្តែ​បើ​យោង​តាម Mizzima News បានរាយការណ៍ថា មានអ្នកស្លាប់​រហូត​ដល់​​៥៣៥២នាក់ របួស ៧១០៨នាក់ និងបាត់ខ្លួន ៥៣៨នាក់ ដោយទីក្រុង Mandalay មានអ្នកស្លាប់ និងរងការបំផ្លិចបំផ្លាញច្រើនបំផុត៕

អត្ថបទ៖ ប៊ុន សុភាព