ម៉ាឡេស៊ី ប្រឈមមុខនឹងគ្រោះធម្មជាតិ២ដំណាលគ្នា ក្នុងពេលតែមួយ

នៅប្រទេសម៉ាឡេស៊ី ជាពិសេសរដ្ឋ Johor កំពុងប្រឈមមុខនឹងគ្រោះធម្មជាតិ២ដំណាលគ្នាក្នុងពេលតែមួយ នោះគឺរលកកម្តៅនិងជំនន់ទឹកភ្លៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Star នៅថ្ងៃពុធទី២៣ខែមេសាឆ្នាំ២០២៥, អាជ្ញាធរក្នុងរដ្ឋនេះ បានចេញការព្រមានឲ្យប្រជាជនត្រូវប្រុងប្រយ័ត្នខ្ពស់ចំពោះគ្រោះធម្មជាតិក្នុងសប្តាហ៍នេះ នោះគឺដោយសារតែការផ្លាស់ប្តូរខ្យល់មូសុងនិងបម្រែបម្រួលអាកាសធាតុ។

លោក Anuar Abd Manap ប្រធានគណៈកម្មាធិការផ្នែកបម្រែបម្រួលអាកាសធាតុនិងគ្រប់គ្រងគ្រោះមហន្តរាយរដ្ឋ Johor បានឲ្យដឹងថា «ពលរដ្ឋត្រូវត្រៀមខ្លួនប្រឈមមុខនឹងបញ្ហាទាំងនេះ។ យើងបានឈានចូលរដូវក្តៅហើយ និងថែមទាំងប្រឈមជាមួយព្យុះដែលបង្កជាជំនន់ទឹកភ្លៀងទាំងមិននឹកស្មានដល់ថែមទៀតផង នៅតំបន់មួយចំនួន។ គំរូអាកាសធាតុបច្ចុប្នន្ន មិនស្រួលព្យាករដូចមុនទេ»។

យោងតាមគណៈកម្មាធិការនេះ កម្តៅនៅ Johor នឹងក្តៅខ្លាំង ដោយសីតុណ្ហភាពអាចហក់ដល់៣៥អង្សាសេ ដែលបង្កជាបញ្ហាប្រឈមដល់ក្រុមមនុស្សងាយរងគ្រោះ ជាពិសេសមនុស្សចាស់តែម្តង។

ទោះបីជាយ៉ាងណាក៏ដោយ គណៈកម្មាធិការនេះ នឹងកោះប្រជុំគ្នានៅដើមខែក្រោយ ដើម្បីរិះរកវិធីទប់ស្កាត់និងដោះស្រាយ ព្រមទាំងចាត់វិធានការចាំបាច់នានាដើម្បីធានាសុវត្ថិភាពជូនពលរដ្ឋ៕

អត្ថបទ៖ សុខ សុវណ្ណ

ចុចអាន៖ ទឹកជំនន់​ឆ្នាំ​២០២៤ បណ្តាល​ឲ្យ​ម៉ាឡេស៊ីខាតបង់ប្រាក់ចំនួន២១១លានដុល្លារ