ប៉ូឡូញ ចល័តយន្តហោះចម្បាំងយ៉ាងបន្ទាន់បំផុត ក្រោយរុស្ស៊ី វាយអ៊ុយក្រែន កៀកព្រំដែនខ្លួន

ប្រទេសប៉ូឡូញ បានប្រញាប់ប្រញាល់ចល័តយន្តហោះចម្បាំង ដើម្បីធានាសុវត្ថិភាពដែនអាកាសរបស់ខ្លួន បន្ទាប់ពីរុស្ស៊ី បើកការវាយប្រហារលើភាគខាងលិចប្រទេសអ៊ុយក្រែន ដែលស្ថិតនៅកៀកព្រំដែនរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព័ត៌មាននៃការដាក់ពង្រាយយ៉ាងបន្ទាន់បំផុតនេះ ត្រូវបានបញ្ជាក់ដោយបញ្ជាការដ្ឋានប្រតិបត្តិការកងទ័ពអាកាសប៉ូឡូញ ដែលបង្ហោះលើបណ្តាញសង្គម X នៅថ្ងៃព្រហស្បតិ៍ទី២៤ខែមេសាឆ្នាំ២០២៥ថា «ដោយសារតែសកម្មភាពដែនអាកាស រយៈចម្ងាយឆ្ងាយរបស់សហព័ន្ធរុស្ស៊ី ដែលកំពុងបើកការវាយប្រហារលើទីតាំងនៅភាគខាងលិចប្រទេសអ៊ុយក្រែននោះ យន្តហោះប៉ូឡូញ និងសម្ព័ន្ធមិត្ត បានចាប់ផ្តើមប្រតិបត្តិការនៅក្នុងដែនអាកាសប៉ូឡូញ»។

ការចល័តនេះទៀតសោត កើតឡើងបន្ទាប់ពីរុស្ស៊ី មិនមែនត្រឹមវាយប្រហារនៅភាគខាងលិចប្រទេសអ៊ុយក្រែន ពោលកងកម្លាំងរបស់លោកពូទីន ក៏បាញ់ស្រោចលើរដ្ឋធានាកៀវ ផងដែរ ដោយបណ្តាលឲ្យមនុស្សចំនួន៦នាក់ បាត់បង់ជីវិតនិងជាង៦០នាក់ទៀត រងរបួស។ 

តាមការចុះផ្សាយរបស់ BBC, ការបាញ់ស្រោចនេះបង្កជាអគ្គិភ័យនៅទីតាំងចំនួន៦កន្លែង និងកម្ទេចអគារ​នានា ធ្វើឲ្យបំណែកថ្មបាក់សង្កត់លើមនុស្ស ខណៈអភិបាលក្រុងកៀវលោក Vitali Klitschko បញ្ជាក់ថា មានកុមារចំនួន៦នាក់ ស្ថិតក្នុងចំណោមមនុស្សរងរបួស ហើយត្រូវបញ្ជូនទៅកាន់មន្ទីរពេទ្យ។

ស្របពេលជាមួយគ្នានោះ ក្រសួងមហាផ្ទៃអ៊ុយក្រែន បានឲ្យដឹងថា ទីក្រុង Sumy, Kharkiv និង Zhytomyr ក៏ត្រូវវាយប្រហារដែរ គ្រាន់តែរដ្ឋធានី កៀវ រងគ្រោះខ្លាំងជាងគេ៕

អត្ថបទ៖ សុខ សុវណ្ណ

ចុចអាន៖ រុស្ស៊ី បាញ់ស្រោចលើរដ្ឋធានី កៀវ សម្លាប់មនុស្ស៩នាក់ ក្រោយ ត្រាំ ស្តីបន្ទោស ហ្សេលេនស្គី