រញ្ជួយដីនៅមីយ៉ាន់ម៉ា៖ គ្រាន់តែអគារ ខុនដូ Sky Villa មួយមានអ្នកស្លាប់ជាង១០០នាក់

សាកសពបុរស៣នាក់ និងក្មេង១នាក់ទៀតត្រូវបានរកឃើញនៅខុនដូ Sky Villa ក្នុងទីក្រុង Mandalay ភាគកណ្តាល​ប្រទេសមីយ៉ាន់ម៉ា ដែលនាំឲ្យ​​ចំនួន​សាកសព​​​កើន​ដល់​ជាង ១០០នាក់ ដែល​ត្រូវ​បាន​រក​ឃើញ​ក្នុងខុនដូនេះ។ នេះបើយោងតាមការចេញផ្សាយរបស់​ Eleven Media Group។

នៅថ្ងៃទី ២៤ខែមេសា វេលាម៉ោង ១០:៤០ព្រឹកក្រុមជួយសង្គ្រោះបានរកឃើញ បុរសពីរនាក់។ ក្រោយមកនៅម៉ោង​១១​ព្រឹក​សាក​សព​បុរស​ម្នាក់ និង​ក្មេង​ម្នាក់ទៀតក៏ត្រូវបានរកឃើញ។ គ្រាន់តែអគារខុនដូ Sky Villaនេះមួយមាន សាកសព​ជាង​១០០​នាក់ ដោយមនុស្ស ៥២​នាក់ត្រូវបានជួយសង្គ្រោះនៅរស់រានមានជីវិត។

យោងតាមកងពន្លត់អគ្គិភ័យភូមា និងក្រុមជំនួយសង្គមនៅតែធ្វើប្រតិបត្តិការសម្អាត និងប្រតិបត្តិការស្វែងរកសាកសពនៅខុនដូដែលដួលរលំនេះនៅឡើយ។

គួរបញ្ជាក់ថាខុនដូ Sky Villa ត្រូវបានសាងសង់ដោយក្រុមហ៊ុនសំណង់ NTL និងបានប្រកាសលក់ដោយធានាថាអគារការពារការរញ្ជួយដី។

គួររម្លឹកថា គ្រោះរញ្ជួយដីកម្រិត ៧.៧ រ៉ិចទ័រ ដែលជាកម្លាំងរញ្ជួយខ្លាំងបំផុតក្នុងរយៈពេលមួយសតវត្សមិនធ្លាប់មាន បានវាយប្រហារភាគកណ្តាលប្រទេសមីយ៉ាន់ម៉ា កាលពីថ្ងៃទី២៨ខែមីនា ធ្វើឲ្យអគារជាច្រើនដួលរលំ។

យោងតាម Mizzima News គ្រោះរញ្ជួយដីនេះបណ្ដាលឲ្យមនុស្សចំនួន ៥,៣៥២នាក់ស្លាប់, របួស ៧,១០៨នាក់ និងបាត់ខ្លួនចំនួន ៥៣៨នាក់។ ប៉ុន្តែបើតាមក្រុមប្រឹក្សារដ្ឋបាលរដ្ឋរបស់របបយោធា មានមនុស្ស ៣,៧២៧ នាក់បានស្លាប់, ១២៩នាក់កំពុងបាត់ខ្លួន និង ៥,១០៦ នាក់បានរងរបួស។ លើសពីនេះមនុស្សប្រមាណ ៤ ម៉ឺនកំពុងស្នាក់នៅក្នុងតង់បណ្ដោះអាសន្ន ខ្វះទឹកស្អាតដែលបង្កើននិភ័យឆ្លងជំងឺផ្សេងៗ៕

អត្ថបទ៖ ប៊ុន សុភាព