ហ្វីលីពីន បំបែកកំណត់ត្រាថ្មីមានអ្នកឆ្លងកូវីដជិត ១ ម៉ឺនករណីក្នុងរយៈពេល ២៤ ម៉ោងចុងក្រោយ

ប្រទេសហ្វីលីពីនបានរាយការណ៍ពីករណីឆ្លង​ថ្មីនៃជំងឺកូវីដ ១៩ ចំនួន ៩,៨៣៨ នាក់កាលពីថ្ងៃសុក្រដែលជាការកើនឡើងខ្ពស់បំផុតចាប់តាំងពីរោគរាតត្បាតមួយនេះបានផ្ទុះឡើង ។

ការរីករាលដាលនៃការឆ្លងថ្មីៗនេះបានបង្ខំឲ្យអាជ្ញាធរបង្កើនការរឹតបន្តឹងកាន់តែខ្លាំងឡើងនៅក្នុងរដ្ឋធានីម៉ានីលទៅកាន់ខេត្តជុំវិញ ប៉ុន្តែសេវាកម្មសាសនាក្នុងមួយថ្ងៃៗមានចំនួនអ្នកចូលព្រះវិហារកើនឡើងរហូតដល់ទៅ ១០ ភាគរយ ខណៈវិហារត្រូវបានអនុញ្ញាតឲ្យបើកនៅសប្តាហ៍មុនថ្ងៃបុណ្យ Easter ។

ប្រទេសហ្វីលីពីនដែលកំពុងប្រឈមមុខនឹងការផ្ទុះឡើងដ៏អាក្រក់បំផុតទី ២ នៅអាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ីបានរកឃើញករណីឆ្លងថ្មី ៣ ថ្ងៃជាប់គ្នាក្នុងរយៈពេល ៥ ថ្ងៃចុងក្រោយនេះ ខណៈដែលករណីឆ្លងសរុបបានកើនឡើងដល់ ៧០២,៨៥៦ ករណី ។

ទន្ទឹមនោះក្រសួងសុខាភិបាលបាននិយាយថា ចំណែកអ្នកស្លាប់ដោយសារជំងឺកូវីដ ១៩ បានកើនឡើងដល់ ១៣,១៤៩ នាក់ បន្ទាប់ពីមានអ្នកស្លាប់ថ្មីចំនួន ៥៤ នាក់ត្រូវបានកត់ត្រាកាលពីថ្ងៃសុក្រ ។

បន្ថែមពីនេះក្រុមអ្នកស្រាវជ្រាវនៃសាកលវិទ្យាល័យហ្វីលីពីនបានព្រមានថា ករណីឆ្លងជំងឺកូវីដ ១៩ អាចនឹងមានចំនួនពី ១០,០០០ ទៅ ១១,០០០ ករណីក្នុងមួយថ្ងៃនៅចុងខែមីនានេះ ដោយសារអត្រានៃការឆ្លងជំងឺកូវីដ ១៩ បំប្លែងខ្លួនប្រភេទថ្មីក៏កំពុងកើនឡើងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ហ្វីលីពីន រកឃើញអ្នកឆ្លងកូវីដថ្មីប្រចាំថ្ងៃមិនធ្លាប់មានជិត ៩ ពាន់ករណី

ចុចអាន ៖ ហ្វីលីពីន សម្រេចបិទព្រះវិហារ និងរារាំងការធ្វើដំណើរ ខណៈករណីឆ្លងកូវីដកាន់តែកើនឡើង