ព័ត៌មានអន្ដរជាតិ

ហួសហេតុ សូម្បីពិធីបុណ្យសពក៏យោធាមីយ៉ាន់ម៉ាបាញ់ប្រហារដែរ

បានផុស

៤ years មុន

នៅ

ថ្ងៃចន្ទ ២៩ មីនា ២០២១

ដោយ

សាក្សីបាននិយាយថា នៅថ្ងៃអាទិត្យ ម្សិលមិញនេះ កម្លាំងសន្តិសុខយោធាមីយ៉ាន់ម៉ាបានបាញ់ទៅលើមនុស្សដែលជួបជុំគ្នាក្នុងពិធីបុណ្យសពមួយក្នុងចំណោមមនុស្ស១១៤នាក់ដែលត្រូវបានសម្លាប់កាលពីថ្ងៃសៅរ៍ ដែលបានក្លាយជាថ្ងៃ ថ្លុកឈាមបំផុត ចាប់តាំងពីរដ្ឋប្រហារយោធាថ្ងៃទី១កុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមនុស្ស៣នាក់ដែលបានប្រាប់ទីភ្នាក់ងារសារព័ត៌មាន Reuters ថា ភ្លាមៗនៅថ្ងៃអាទិត្យនោះនៅមិនមានសេចក្តីរាយការណ៍ពីស្លាប់ណាមួយក្នុងពិធីបុណ្យសពដែលត្រូវបានបាញ់ប្រហារនៅតំបន់ Bago ជិតទីក្រុងយ៉ាំងហ្គោនទេ។

ស្ត្រីឈ្មោះ Aye ដែលបម្រើការនៅ Thae Maung Maung បាននិយាយពីសិស្សអាយុ២០ឆ្នាំម្នាក់ក្នុងចំណោមអ្នកស្លាប់កាលពីថ្ងៃសៅរ៍ថា ៖«នៅពេលយើងកំពុងច្រៀងចម្រៀងបដិវត្តដើម្បីគាត់ ស្រាប់តែកម្លាំងសន្តិសុខមកដល់ ហើយក៏បាញ់លើពួកយើង»។

សាក្សីប្រាប់ថា បើទោះជាការបាញ់ទៅលើពិធីបុណ្យសពនោះមិនទាន់មានសេចក្តីរាយការណ៍ពីការស្លាប់ ប៉ុន្តែកន្លែងផ្សេងទៀតនាថ្ងៃអាទិត្យម្សិលមិញ មនុស្ស៣នាក់ត្រូវបានសម្លាប់។ មនុស្សម្នាក់ត្រូវបានសម្លាប់នៅពេលកម្លាំងទាហានបាញ់ពេលយប់ទៅលើក្រុមអ្នកតវ៉ាជិតរដ្ឋធានីណាយពិដោ។

នៅថ្ងៃអាទិត្យមិនមានសេចក្តីរាយការណ៍ពីការតវ៉ាទ្រង់ទ្រាយធំឡើយនៅទីក្រុងយ៉ាំងហ្គោន ឬទីក្រុងធំលំដាប់ទី២ម៉ាន់ដាឡាយ ដែលជាកន្លែងមនុស្សស្លាប់ច្រើនបំផុតកាលពីថ្ងៃសៅរ៍ចំពេល«ទិវាអបអរសាទរកងកម្លាំងប្រដាប់អាវុធ»របស់ប្រទេសមីយ៉ាន់ម៉ា។

ដោយសារមនុស្សស្លាប់ច្រើនពេក ពិធីបុណ្យសពត្រូវបានរៀបចំតាមទីកន្លែងផ្សេងៗជាច្រើន។

យ៉ាងហោចណាស់ក្មេង៦នាក់ដែលមានអាយុពី១០ឆ្នាំដល់១៦ឆ្នាំស្ថិតក្នុងចំណោមអ្នកស្លាប់១១៤នាក់កាលពីថ្ងៃសៅរ៍។ អ្នកតវ៉ាបានហៅជនរងគ្រោះថាជា«ផ្កាយធ្លាក់ពីលើមេឃ»។

មហាអំណាចលោកខាងលិចបានថ្កោលទោសយ៉ាងខ្លាំងចំពោះថ្ងៃថ្លុកឈាម។ អ្នករាយការណ៍ពិសេសរបស់អង្គការសហប្រជាជាតិប្រចាំប្រទេសមីយ៉ាន់ម៉ាបាននិយាយថា កងទព័កំពុងសម្លាប់រង្គាល់ និងបានអំពាវនាវឲ្យពិភពលោកឲ្យផ្តាច់ខ្លួនពីរបបយោធា និងបញ្ឈប់ការផ្គត់ផ្គងអាវុធ៕

ប្រែសម្រួល៖ វីរបុត្រ
ប្រភព៖ Reuters