គ្រាប់បែកដៃនិងគ្រាប់កាំភ្លើងជាង៦,០០០គ្រាប់ ដឹកទៅ មីយ៉ាន់ម៉ា ត្រូវ ថៃ ស្ទាក់ចាប់បាន

ការ​ស្លាប់​ជន​ស៊ីវិល​​ក្នុង​ការ​បង្ក្រាប​របស់​យោធា​មីយ៉ាន់ម៉ាលើ​ការតវ៉ា បានកើន​​​ឡើង​ដល់​៥២១​​នាក់​​ហើយ​ ខណៈ​ក្រុម​ឧទ្ទាម​ប្រដាប់​ដោយ​អាវុធ​ភាគ​តិច​​ កាលពី​ថ្ងៃ​អង្គារទី​៣០ខែ​មីនា​ បាន​គំរាមវាយ​ប្រហារ​រដ្ឋាភិបាល​យោធា ប្រសិន​បើ​មិន​បញ្ឈប់​សម្លាប់​ជន​ស៊ីវិលទេនោះ។

មហា​អំណាច​ពិភព​លោក ​បាន​បង្កើន​ការ​ថ្កោល​ទោស​ចំពោះ​ការ​បង្ក្រាប​ដ៏​សាហាវ​ឃៅ​ទៅ​លើ​អ្នក​តវ៉ា​ប្រឆាំង​នឹង​រដ្ឋ​ប្រហារ​ដែល​ទាមទារ​ស្តារ​ឡើង​វិញ​នូវ​រដ្ឋាភិបាល​ជាប់​ឆ្នោត និង​ដោះ​​លែង​មេ​ដឹក​នាំ​ស៊ីវិលលោកស្រី អ៊ុងសាន ស៊ូជី។

ប្រជាពលរដ្ឋប្រមាណ៣,០០០នាក់ បានរត់ភៀសខ្លួនឆ្លងកាត់ព្រៃ ដើម្បីស្វែងរកសុវត្ថិភាពចូលក្នុងព្រំដែនថៃ។

អ្នកនាំពាក្យក្រសួងការបរទេសថៃ លោក Tanee Sangrat បានច្រានចោលរបាយការណ៍ដែលថា អាជ្ញាធរថៃបានរុញច្រានជនភៀសខ្លួនទាំងនោះមកវិញ។

លោកនិយាយថា “អាជ្ញាធរថៃ នឹងបន្តមើលថែអ្នកដែលមកដល់ក្នុងប្រទេសថៃ ហើយវាយតម្លៃពីស្ថានភាពដែលកំពុងវិវត្តនិងតម្រូវការចាំបាច់”។

ប៉ូលិសថៃនិយាយថា ពួកគេស្ទាក់ចាប់បានកេសចំនួន១០ ដែលមានផ្ទុកគ្រាប់បែកដៃចំនួន១១២គ្រាប់ និងគ្រាប់កាំភ្លើង៦,០០០គ្រាប់ នៅខេត្តឈៀងរ៉ៃ។ គ្រាប់ទាំងនេះ ត្រូវបានគេកំណត់ទិសដៅនាំទៅកាន់តំបន់ព្រំដែន Tachileik ដ៏ល្បីល្បាញរបស់ប្រទេសមីយ៉ាន់ម៉ា។

អគ្គលេខាធិការអង្គការសហប្រជាជាតិ លោក Guterres បានជំរុញឲ្យអាជ្ញាធរមីយ៉ាន់ម៉ា អនុវត្តការផ្លាស់ប្តូរទៅរកលទ្ធិប្រជាធិបតេយ្យឲ្យបានខ្ជាប់ខ្ជួន។

លោក Guterres បានប្រាប់សន្និសីទសារព័ត៌មានថា “វាមិនអាចទទួលយកបានទេដែលត្រូវឃើញអំពើហឹង្សាប្រឆាំងនឹងមនុស្សក្នុងកម្រិតខ្ពស់ដូច្នេះ មនុស្សជាច្រើនត្រូវបានសម្លាប់”។

លោកគូសបញ្ជាក់ថា “យើងត្រូវការការឯកភាពគ្នា និងការប្តេជ្ញាចិត្តបន្ថែមទៀតពីសហគមន៍អន្តរជាតិក្នុងការដាក់សម្ពាធដើម្បីធ្វើឲ្យប្រាកដថា ស្ថានភាពត្រូវបានស្តារឡើងវិញ”៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ វីដេអូគួរឲ្យសង្វេគ! ជនជាតិមីយ៉ាន់ម៉ា ភៀសខ្លួនទាំងទូកៗចូលព្រំដែនថៃ អ្នកខ្លះរបួសពេញខ្លួន